Ded—!Rabis Samting Ya We Yumi Evriwan i Fesem!

INGLIS man ya Arnold Toynbee we hem i man blong raetem histri, i talem se: “Stat long taem we yumi bon, enitaem nomo wan samting i save hapen blong tekemaot laef blong yumi.” Hem i gohed i se: “Yumi evriwan i save se bambae yumi mas ded.” !Nating se i olsem, taem wan famle no wan gudfala fren blong yumi i ded, yumi harem nogud tumas!

Plante taosen yia finis, olgeta man oli fesem rabis samting ya ded. Taem wan famle no fren blong yumi i ded, yumi harem se yumi no gat paoa, yumi no save mekem wan samting blong givhan long hem. Filing ya blong harem nogud i stap kasem yumi evriwan, i no gat wan man we i save ronwe long hem. Long ol yia 1800, wan man blong raetem ol stori i talem se: “Filing blong soasore i mekem se yumi evriwan i kam olsem pikinini bakegen. Man we i skulgud mo man we i no skulgud, be soasore i kasem tufala evriwan sem mak. Nating se man i waes, hem i no save rod blong winim.” Yes, yumi kam olsem pikinini bakegen, yumi no save mekem wan samting, yumi no save jenisim samting we i hapen. Mane mo paoa i no save givimbak hemia we yumi lusum. Ol man we oli waes mo oli skulgud be oli no save talem olsem wanem blong winim. Ol strong man mo ol man we oli no strong, be olgeta evriwan oli krae sem mak.

Filing ya blong harem nogud tumas i kasem Deved, king blong Isrel bifo, taem pikinini blong hem, Absalom, i ded. Taem Deved i harem nius ya se boe blong hem i ded, hem i krae we i krae se: “!Awooo, Pikinini blong mi! !Pikinini blong mi Absalom! !Absalom, pikinini blong mi! !Sipos mi nomo mi tekem ples blong yu, mi ded! !Pikinini blong mi! !Awooo, Absalom, pikinini blong mi!” (2 Samuel 18:33) Deved i wan bigfala king we i bin winim plante strong enemi long faet. Be paoa blong hem i lus olgeta taem boe blong hem i ded. Hem i wantem nomo se ‘ded, we i laswan blong ol enemi’ blong man, i kasem hem be i no kasem boe blong hem.​—1 Korin 15:26.

?Olsem wanem? ?I gat rod blong winim ded? ?Sipos yes, wanem hop we ol dedman oli gat? ?Bambae yumi luk bakegen ol famle mo fren blong yumi we oli ded finis? Ol tok we i kam biaen bambae i givim ansa we i kamaot long Baebol long ol kwestin ya.