Mate e Sega ni Drotaki Rawa!

“NI DUA e sucu, e macala ni dua na siga ena mate,” e vola na daunitukutuku makawa mai Peritania, o Arnold Toynbee. A kuria ena nona kaya: “E sega ni rawa ni vakacalai na vakasama nida na mate kece ga.” Dua dina na ka mosimosi ni takali e dua na wekada se itokani lomani!

Io, na mate e dua na ituvaki mosimosi e sega ni drotaka rawa na kawatamata ena loma ni vica na udolu na yabaki. Ni takali gona e dua na wekada lomani, eda vakila sara ga e kea ni vakaiyalayala ga na ka e rawa nida cakava. E sega ni dua e drotaka rawa na mate. Eda na sotava kece ga. Rawa ni tukuni nida vakataki ira tale na gonelalai ni yaco na ituvaki oqo​​—⁠ena noda sega ni kila na ka meda cakava me veisautaka na leqa sa yaco. Se da mani vakaiyau se da kaukaua, e sega ni rawa ni vakabula na wekada sa mate. O ira mada ga na vuku, e sega vei ira na kena ivakamacala e veivakacegui. Era lolosi na malumalumu, ra lolosi sara tale ga na kaukaua.

Na tui o Tevita e Isireli makawa a sotava na ituvaki oqori ena gauna a takali kina o Apisalomi, na luvenatagane. Ena gauna e rogoca kina na itukutuku ni leqa, a tagi na tui qai kaya: “Isa lei, na luvequ Apisalomi, Isa, na luvequ, na luvequ Apisalomi! Ke’u a mate me kemui sosomi ke sa vinaka, Isa Apisalomi, na luvequ, na luvequ!” (2 Samuela 18:33) E sega ni cakava rawa e dua na ka na tui qaqa oqo, e dina ga ni a dau vakamalumalumutaki ira na nona meca kaukaua. Ena levu ni rarawa e luvuci Tevita, a bolea me rawai koya “na i otioti ni meca . . . ko mate,” me sosomitaki luvena.​—1 Korinica 15:​26, VV.

Ena guce beka o mate? Ke vaka kina, na cava na nodra inuinui na sa mate? Eda na sota tale beka kei ira na wekada lomani era sa mate? Ena saumi vakaivolatabu na veitaro oqori ena ulutaga e tarava.