Morto—Un Realidat Teribel!

E HISTORIADÓ britániko Arnold Toynbee a skirbi: “For di momento ku un hende nase e posibilidat t’ei konstantemente ku e por muri un ora pa otro. Anto inevitablemente e posibilidat aki ta bai bira un realidat.” Ki un tristesa morto ta kousa nos ora ku un miembro di famia stimá òf un amigu íntimo muri!

Pa míles di aña kaba morto ta un realidat teribel pa humanidat. Nos ta sinti nos kompletamente impotente ora ku un ser kerí muri. E tristesa aki ta asotá hende sin hasi distinshon di persona. Ni un hende no ta skapa di morto. Un eskritor di siglo 19 a skirbi: “Tristesa ta hasi nos tur mucha atrobe; e ta destruí tur diferensia ku tin den intelekto. Esnan di mas sabí no sa nada.” Nos ta bira manera mucha chikitu, impotente, sin ku nos por kambia e situashon. Rikesa ni poder no por anulá e pèrdida. E hendenan sabí i intelektual no tin kontesta. Esnan fuerte ta yora meskos ku esnan débil.

Rei David di Israel di antigwedat a eksperensiá e tipo di angustia aki ora ku su yu hòmber Absalon a muri. Ora David a haña e notisia di morto, el a kuminsá yora i sklama: “O mi yu Absalon, mi yu, mi yu Absalon! Mihó ta ami a muri na bo lugá, o Absalon, mi yu, mi yu!” (2 Samuel 18:33) Figurá bo, úniko kos ku un rei poderoso ku a dominá enemigunan potente por a hasi tabata di deseá ku mihó ‘morto, e delaster enemigu,’ a mata é na lugá di su yu.—1 Korintionan 15:26.

Tin un solushon pa morto? Si ta asina, ki speransa tin pa e mortonan? Nos lo mira nos sernan kerí un dia bèk? E siguiente artíkulo ta duna kontestanan bíbliko riba e preguntanan aki.