E Mataʻutia le Oti!

NA TUSI se tusitala Peretania e suafa iā Arnold Toynbee e faapea: “O le taimi lava e fanau mai ai se tasi, e ono mafai ona oti i so o se taimi.” Na ia toe faaopoopo mai: “E lē maʻalofia le tupu o lenei mea.” Pagā lo tatou faavauvau pe a maliu sē e pele o le aiga po o se uō mamae foʻi!

Ua loa taimi o pagatia tagata ona o le mataʻutia o le oti. Ua siliga tali i seu se faamoemoega pe a maliu sē e pele iā i tatou. E tatou te aafia uma ai lava i nei faanoanoaga. E leai se tasi e sao mai ai. Na tusi se tusitala o le senituri lona 19: “E tusa lava po o le ā le lelei o tulaga tauaʻoaʻoga, ae e leʻi maua lava ni tali faamalieloto i nei faanoanoaga. E oo foʻi i ē e sili ona atamamai.” O le a pei i tatou o ni tamaiti ua lē mafesoasoania, ua lē iloa faaleleia le tulaga o mea. E lē mafai e ʻoa po o le malosi ona aveesea le faavauvau. E oo foʻi i tagata atamamai e lē o silafia le vaifofō. E fetagisi ē malolosi, e faapena foʻi ma ē vaivai.

Na matuā mafatia le tupu o Tavita ina ua maliu lona atalii o Apisaloma. Ina ua logotala i lona oti, sa ia tagi ma faapea mai: “Loʻu atalii Apisaloma e, loʻu atalii e, loʻu atalii Apisaloma e! ta fia oti e sui ai oe Apisaloma loʻu atalii e, loʻu atalii e!” (2 Samuelu 18:33) Na lē mafai e le tupu malosi o lē na faatoʻilaloina fili malolosi ona fesagaʻia lenei mea, ae na ia moomoo e tuuina atu o ia lava i “le toe fili . . . , o le oti lea,” e sui ai lona atalii.—1 Korinito 15:26.

Pe e mafai ona aveesea le oti? Afai e mafai, o le ā le faamoemoe mo ē ua maliliu? Po o le a tatou toe feiloaʻi i ē pele iā i tatou? Ua saunia e le mataupu o sosoo mai tali faale-Tusi Paia i nei fesili.