“Nnyịn Inyene Ndikop Uyo Abasi Nte Andikara Utu Ke Uyo Owo”

Ẹda “Ọsọn̄urua Iyịp” Ẹfak Nnyịn

AKAKAN ima oro Jehovah amade owo ekedi ndidọn̄ ikpọn̄-ikpọn̄ edibon Eyen esie edinọ mfọnmma uwem esie nte ufak. Sia nnyịn idide mme anamidiọk, imenen̄ede iyom utọ ufak oro, koro baba anana-mfọnmma owo kiet “ikemeke ndifak eyen-ete, inyụn̄ ikemeke ndinọ Abasi n̄kpọ usio-isop esie . . . man enye osụk odu uwem ke nsinsi.” (Psalm 49:6-9) Nnyịn iwụt esịtekọm didie ntem ke emi Abasi “[ọkọnọde] ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem”!—John 3:16.

Didie ke ufak anyan̄a nnyịn? Ẹyak ineme usụn̄ inan̄ oro iwọrọde ke ufụn ke ntak ata akamba ima Jehovah Abasi emi.

Edisio ke Ufụn ebe ke Ufak

Akpa, uwa Jesus ekeme ndifak nnyịn nsio ke ndammana idiọkn̄kpọ. Kpukpru nnyịn ikadada idiọkn̄kpọ imana. Ke nditịm ntịn̄, nnyịn ikedi mme anamidiọk idem mbemiso ikokponde ikem ndibiat ibet Jehovah. Ntak edide ntre? Rome 5:12 ọdọhọ ete: ‘Idiọkn̄kpọ okoto owo kiet [Adam] odụk ererimbot, n̄kpa onyụn̄ oto idiọkn̄kpọ oro.’ Sia nnyịn idide nditọ Adam oro akanamde idiọk, nnyịn ikadada unana mfọnmma imana ito enye. Nte ededi, ufak oro ẹkekpede anam nnyịn ikeme ndiwọrọ ke ufụn ndammana idiọkn̄kpọ. (Rome 5:16) Jesus ‘ama atabi n̄kpa ke ibuot kpukpru owo,’ oro edi obiom mme utịp idiọkn̄kpọ ke ibuot nditọ Adam.—Mme Hebrew 2:9; 2 Corinth 5:21; 1 Peter 2:24.

Udiana, ufak ekeme ndinam nnyịn ibọhọ ndiọi utịp idiọkn̄kpọ. “N̄kpọ eyenutom idiọkn̄kpọ edi n̄kpa.” (Rome 6:23) N̄kpa ufak Eyen Abasi anam okopitem ubonowo ekeme ndidu uwem ke nsinsi. Kamse, “owo eke ọbuọtde idem ke Eyen enyene nsinsi uwem; owo eke ọsọn̄de ibuot ye Eyen idikwe uwem.”—John 3:36.

N̄kọm omokụt ke ẹkeme ndifak nnyịn nsio ke utịp idiọkn̄kpọ n̄kukụre edieke ibuọtde idem ke Eyen Abasi. Emi esịne ndinam mme ukpụhọde ke uwem nnyịn nnyụn̄ ndu uwem ekekem ye uduak Abasi. Ana itre idiọk uwem ekededi oro ikodude, inyụn̄ inam se inemde Abasi esịt. Apostle Peter ọkọdọhọ ke inyene ‘ndikabade esịt nnyụn̄ n̄wọn̄ọde n̄kpọn̄ idiọk man ẹsọhi mme idiọkn̄kpọ nnyịn ẹfep.’—Utom 3:19.

Ọyọhọ ita, uwa Jesus iyakke esịt obiom nnyịn. Kpukpru mbon oro ẹyakde idem ẹnọ Jehovah ẹnyụn̄ ẹkabarede ẹdi mme mbet Eyen esie oro ẹnade baptism, ẹkop ndọn̄esịt. (Matthew 11:28-30) Kpa ye oro idide mme anana-mfọnmma owo, nnyịn imenen̄ede ikop idatesịt ndida edisana ubieresịt nnam n̄kpọ Abasi. (1 Timothy 3:9; 1 Peter 3:21) Edieke iyararede idiọkn̄kpọ nnyịn inyụn̄ ikpọn̄de mmọ, ẹyetua nnyịn mbọm, esịt oyonyụn̄ efịghede nnyịn.—Mme N̄ke 28:13.

Ufak Ọnọ Nnyịn Un̄wam ye Idotenyịn

Ke akpatre, edieke ibuọtde idem ke ufak, oro idiyakke nnyịn ikop ndịk ikere m̀mê Abasi ada nnyịn didie. Apostle John ekewet ete: “Edieke owo ekededi anamde idiọkn̄kpọ, nnyịn imenyene andin̄wam emi odude ye Ete, kpa Jesus Christ.” (1 John 2:1) Apostle Paul ekewet ntem aban̄a utom oro Jesus  anamde nte andin̄wam: “Enye ekeme n̄ko ndinyan̄a mmọ emi ẹsan̄ade ke enye ẹkpere Abasi ọyọhọ ọyọhọ, koro enye odu uwem kpukpru ini ndinam n̄kpeubọk nnọ mmọ.” (Mme Hebrew 7:25) Ọkpọkọm inyene ata ekpri ndo idiọkn̄kpọ, nnyịn iyoyom Jesus Christ Akwa Oku an̄wam nnyịn inyene eti idaha ye Abasi. Didie ke Jesus akanam n̄kpọ nte akwa oku ke ibuot nnyịn?

Ke usen aba ẹma ẹkebe tọn̄ọ Jesus ekeset ke isua 33 E.N., enye ama ọdọk aka heaven akayak ekọmurua “ọsọn̄urua iyịp” esie ọnọ Abasi. Emi ayanam Jesus ọsọp osio ubonowo ke ufụn idiọkn̄kpọ ye n̄kpa. * (1 Peter 1:18, 19) Mmọn̄ọ, ndi afo ukwe ke odot ima Jesus Christ inyụn̄ ikop uyo esie?

Adianade do, odot ima Jehovah Abasi inyụn̄ ikop uyo esie. Ima akanam enye ‘osio nnyịn ke ufụn ebe ke ufak.’ (1 Corinth 1:30) Enye ọnọ nnyịn uwem oro idude idahaemi ye idotenyịn ekededi oro inyenede ndidu uwem ke nsinsi. Mmọdo, ke kpukpru usụn̄, odot “[ikop] uyo Abasi nte andikara utu ke uyo owo.”—Utom 5:29.

[Ikọ idakisọn̄]

[Ekebe/Mme ndise ke page 9]

NDI AMA ỌFIỌK EMI?

• Jesus okoto ke Obot Olive ọdọk heaven.—Utom 1:9, 12.

• Mme anam-akpanikọ apostle Jesus kpọt ẹkekụt ini emi enye ọkọdọkde heaven.—Utom 1:2, 11-13.