‘Meda Talairawarawa Vua na Kalou, me Kua ga Vua na Tamata’

Sereki ena “Dra Talei” i Karisito

NA IVAKARAITAKI levu duadua ni loloma i Jiova oya nona solia na Luvena e dua bau ga e vakatubura me mai cabora na nona bula uasivi me keda ivoli. Nida tamata ivalavala ca, ena vinakati me dua e sereki keda, me vaka ni sega ni dua vei keda e “volia rawa na wekana, se solia rawa vua na Kalou na kenai voli . . . ka me bula tikoga ko koya.” (Same 49:​6-9) Eda vakavinavinaka gona vua na Kalou ni “solia . . . na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu”!​​—Joni 3:​16.

Ena sala cava e sereki keda kina na ivoli? Meda dikeva mada oqo e va na sala eda sereki kina ena vuku ni loloma uasivi duadua e vakaraitaka na Kalou o Jiova.

Sereki Keda na iVoli

Kena imatai, na isoro i Jisu e sereki keda mai na ivalavala ca e vakadewa mai vei keda o Atama. Eda sucu ivalavala ca kece. Io, eda okati meda ivalavala ca nida se gonedramidrami sara mada ga, ni bera nida rawa ni cakacala se beca na lawa i Jiova. Rawa vakacava oqo? E kaya na Roma 5:​12: “Sa curu ki vuravura nai valavala ca e na vuku ni tamata e lewe dua [Atama], kei na mate e na vuku ni valavala ca.” Me vaka nida luve i Atama, na tamata ivalavala ca, e sa mai takavi keda tale ga na nona ivalavala ca. Ia, na ivoli duadua ga e sa qai rawa kina nida sereki mai na ivau ni ivalavala ca eda sucukaya mai. (Roma 5:​16) Sa “mate ko koya [Jisu] e na vuku ni tamata kecega,” ena nona colata na itotogi e dodonu me tau vei keda na kawa i Atama ena vuku ni noda ivalavala ca.​​—Iperiu 2:9; 2 Korinica 5:​21; 1 Pita 2:​24.

Kena ikarua, na ivoli e sereki keda mai na itotogi ni ivalavala ca, na mate. “Sa kenai sau ni valavala ca na mate.” (Roma 6:​23) Ena vuku ni nona mate vakaisoro na Luve ni Kalou, sa na rawa kina ni bula tawamudu na tamata talairawarawa. Io, “o koya sa vakabauta na Luvena, sa rawata na bula tawa mudu: ko koya sa sega ni vakabauta na Luvena, ena sega ni raica na bula.”​​—Joni 3:​36.

E rawa nida sereki mai na ivesu ni ivalavala ca kevaka eda vakabauta na Luve ni Kalou. E okati kina na noda veisautaka na noda bula me salavata kei na loma ni Kalou. Meda gole tani mai na sala cala eda muria tiko, da qai cakava sara na ka e vakamarautaka na Kalou. E kaya na yapositolo o Pita ni dodonu meda ‘veivutuni da qai saumaki mai, me bokoci kina na noda ivalavala ca.’​​—Cakacaka 3:​19.

Kena ikatolu, na isoro i Jisu e rawa ni vinaka kina noda lewaeloma. O ira kece era yalataki ira vei Jiova ra qai papitaiso mera tisaipeli i Luvena era vakila na vakacegu. (Maciu 11:​28-​30) Dina nida tamata ivalavala ca, eda marautaka dina noda qarava na Kalou ni vinaka na noda lewaeloma. (1 Timoci 3:9; 1 Pita 3:​21) Eda na lomani, ena vinaka tale ga na noda lewaeloma kevaka eda vakatusa na noda ivalavala ca da qai biuta.​—Vosa Vakaibalebale 28:13.

Yavu ni Noda iNuinui

Kena itinitini, nida vakabauta na ivoli, eda na sega ni nuiqawaqawataka na noda veiwekani kei na Kalou. A vola na yapositolo o Joni: “Kevaka sai valavala ca e dua, sa dua na noda Dautataro [se, “Dauveivuke,” NW] vei Tamada, ko Jisu Karisito.” (1 Joni 2:1) Me baleta na nona  itavi ni Dauveivuke o Jisu, a vola na yapositolo o Paula: “Sa rawarawa kina vua me vakabulai ira sara era sa lako mai vua na Kalou e na vukuna, ni sa bula tikoga ko koya me masulaki ira.” (Iperiu 7:​25) Ni se takavi keda tiko na ivalavala ca, eda na gadreva tiko ga na veiqaravi ni Bete Levu o Jisu Karisito me vukei keda meda savasava tiko ga ena mata ni Kalou. E qaravi keda vakacava o Jisu me vaka ni o koya na bete levu?

Ena 33 S.K., ni oti e 40 na siga na vakaturi nei Jisu, a lesu tale i lomalagi me lai cabora kina na nona “dra talei” vua na Kalou. Oqo sa na rawa kina vei Jisu me sereki ira na tamata talairawarawa mai na ivalavala ca kei na mate ena dua na gauna sa tu oqo e matada. * (1 Pita 1:​18, 19) Koya gona, e dodonu meda lomani Jisu Karisito, da qai talairawarawa vua!

Sa dodonu tale ga meda lomani Jiova, da qai talairawarawa vua baleta ni a vakarautaka vakayalololoma na sala meda “vakabulai” kina. (1 Korinica 1:​30, VV) Eda dinautaka vua na noda bula ena gauna oqo kei na inuinui ni bula tawamudu e se bera mai. Oya na vuna ‘meda talairawarawa kina vua na Kalou, me kua ga vua na tamata.’​—Cakacaka 5:29.

[iVakamacala e ra]

[Kato/iYaloyalo ena tabana e 9]

O BAU KILA?

• A kau cake i lomalagi o Jisu mai na Ulunivanua ni Veiolive.​—Cakacaka 1:9, 12.

• O iratou ga na yapositolo yalodina i Jisu eratou a raica nona kau cake i lomalagi.​—Cakacaka 1:2, 11-13.