“Míwlẹ Ma Hà Nọ Ma Setonuna Jiwheyẹwhe Hú Gbẹtọ”

Tundote Gbọn “Ohùn . . . Akuẹgegenu” Dali

DOHIA owanyi Jehovah tọn he klohugan wẹ Visunnu dopo akàn etọn didohlan nado yí ogbẹ̀ pipé gbẹtọvi tọn etọn do sanvọ́ taidi ofligọ de. Taidi gbẹtọvi mapenọ lẹ, mí tindo nuhudo tundote enẹ tọn tlala, na gbẹtọvi mapenọ depope “ma tin he sọgan fli mẹmẹsunnu etọn gbọn nudepope mẹ, mọ e ma sọgan na mẹflikuẹ Jiwheyẹwhe na ewọ . . . na ewọ nido tin to ogbẹ̀ whepoponu” gba. (Psalm 49:6-9) Lehe mí dopẹ́ na Jiwheyẹwhe dọ “e yí Ovi detọ́n etọn dopo akàn namẹ, na mẹdepope he yí ì sè ma nado dọ̀n, ṣigba e nido tindo ogbẹ̀ madopodo” do sọ!—Johanu 3:16.

Nawẹ ofligọ lọ nọ tún mí dote gbọn? Mì gbọ mí ni gbadopọnna aliho ẹnẹ he mẹ mí nọ yin hinhẹn jẹ mẹdekannu te lẹ taidi kọdetọn dohia owanyi tọn pligidi he Jehovah Jiwheyẹwhe dohia mí tọn.

Mẹdekannujẹ Gbọn Ofligọ Dali

Tintan, avọ́sinsan Jesu tọn sọgan tún mí dote sọn ylando he mí dugu etọn mẹ. Mímẹpo wẹ yin jiji do ylando mẹ. Mọwẹ, mí tlẹ ko yin ylandonọ whẹpo mí do sọgan gbàsẹ́n Jehovah tọn. Gbọnna? Lomunu lẹ 5:12 dọmọ: “Ylando gbọn omẹ dopo [Adam] dè biọ aihọn mẹ, podọ okú gbọn ylando dali.” Taidi ovi Adam ylandonọ lọ tọn lẹ, mí dugu ninọmẹ mapenọ-yinyin etọn tọn. Ṣigba, ofligọ lọ nina hẹn ẹn yọnbasi na mí nado jẹ mẹdekannu sọn nuyiwadomẹji ylando he mí dugu etọn tọn mẹ. (Lomunu lẹ 5:16) Jesu “dọ́ okú pọ́n na gbẹtọ lẹ dopodopo,” bo hẹn agbàn kọdetọn ylando tọn na kúnkan Adam tọn lẹ.—Heblu lẹ 2:9; 2 Kọlintinu lẹ 5:21; 1 Pita 2:24.

Awetọ, ofligọ lọ sọgan de mí sọn nugandomẹgo okú tọn he ylando nọ hẹnwa lẹ mẹ. “Okú wẹ ale ylando tọn.” (Lomunu lẹ 6:23) Yasanamẹ ylando tọn wẹ yin okú. Gbọn okú avọ́sinsan etọn tọn gblamẹ, Visunnu Jiwheyẹwhe tọn hẹn ogbẹ̀ mavọmavọ yọnbasi na gbẹtọvi tonusetọ lẹ. Na nugbo tọn, “mẹhe yise to Ovi mẹ tindo ogbẹ̀ madopodo: mẹhe ma yise to Ovi mẹ ma to na mọ ogbẹ̀.”—Johanu 3:36.

Doayi e go dọ mí ma sọgan yin tuntundote sọn nugandomẹgo ylando tọn lẹ mẹ adavo mí yí yise zan to Visunnu Jiwheyẹwhe tọn mẹ. Ehe bẹ diọdo bibasi to gbẹzan mítọn mẹ nado hẹn ẹn sọgbe hẹ ojlo Jiwheyẹwhe tọn hẹn. Mí dona gbẹ́ oylan depope he mí sọgan to wiwà dai bo dona wà nuhe na hẹn homẹhun Jiwheyẹwhe. Apọsteli Pita dọna mí dọ mí dona ‘lẹnvọjọ bo diọ na yè nido súnsún ylando mítọn lẹ sẹ̀.’—Owalọ lẹ 3:19.

Atọ̀ntọ, avọ́sinsan he Jesu basi lọ hẹn mí jẹ mẹdekannu sọn ayihadawhẹnamẹnu he hoapa mẹ. Mẹhe klan yede do wiwe na Jehovah bo lẹzun devi Visunnu etọn tọn lẹpo nọ tindo homẹmimiọn. (Matiu 11:28-30) Mahopọnna mapenọ-yinyin mítọn, devizọnwiwa hlan Jiwheyẹwhe po ayihadawhẹnamẹnu wiwe de po nọ hẹn ayajẹ sisosiso wá na mí. (1 Timoti 3:9; 1 Pita 3:21) Eyin mí yigbe ylando mítọn lẹ tọn bo doalọtena ylanwiwa, lẹblanu nọ yin didohia mí bọ ayihadawhẹnamẹnu mítọn masọ nọ dotukla mí ba.—Howhinwhẹn lẹ 28:13.

Ofligọ Nọ Hẹn Alọgọ po Todido po Wá

Podọ ẹnẹtọ, gbọn yise yiyizan to ofligọ lọ mẹ dali, mí nọ yin tuntundote sọn obu gando teninọ mítọn to Jiwheyẹwhe nukọn go si. Apọsteli Johanu wlan dọmọ: “Eyin mẹdepope waylan, mí tindo whẹ̀yidọtọ de to Otọ́ dè, Jesu Klisti dodonọ lọ.” (1 Johanu 2:1) Gando adà he Jesu nọ yiwà taidi alọgọtọ de go, apọsteli Paulu wlan dọmọ: “E sọgan whlẹn yé gán ga kakajẹ opodo,  yé he wá Jiwheyẹwhe dè gbọn afọ etọn ji lẹ, na e tin to ogbẹ̀ tẹgbẹ nado nọ vẹvẹ na yé.” (Heblu lẹ 7:25) Dile e na dẹnsọ bọ mí na tindo ohia ylando tọn depope, mí na tindo nuhudo sinsẹ̀nzọn Yẹwhenọ Daho lọ Jesu Klisti tọn, na e nido gọalọna mí nado sọgan yin dodonọ to Jiwheyẹwhe nukọn. Nawẹ Jesu nọ yinuwa taidi yẹwhenọ daho de do ota mítọn mẹ gbọn?

To azán 40 to fọnsọnku etọn godo to owhe 33 W.M. tọn mẹ, Jesu hẹji yì olọn mẹ, fie e ze nuhọakuẹ-yinyin ‘ohùn akuẹgegenu’ tọn etọn donukọnna Jiwheyẹwhe te. Taidi kọdetọn de, Jesu na hẹn mẹdekannujẹ sọn ylando po okú po mẹ wá na gbẹtọvi tonusetọ lẹ to madẹnmẹ. a (1 Pita 1:18, 19) Enẹwutu, be hiẹ ma yigbe dọ Jesu Klisti jẹna owanyi po tonusise mítọn po ya?

To yidogọmẹ, Jehovah Jiwheyẹwhe jẹna owanyi po tonusise mítọn po. E gbọn owanyi dali hẹn tundote yọnbasi na mí gbọn “ofligọ” lọ dali. (1 Kọlintinu lẹ 1:30) Gbọnvona dọ mí duahọ ogbẹ̀ mítọn dintọn do e, mí sọ duahọ todido depope he mí tindo nado duvivi ogbẹ̀ madopodo tọn do e ga. Enẹwutu, mí tindo whẹwhinwhẹ́n lẹpo nado “setonuna Jiwheyẹwhe hú gbẹtọ.”—Owalọ lẹ 5:29.

[Nudọnamẹ Odò Tọn]

[Apotin to weda 9]

BE HIẸ YỌNẸN ẸN?

• Jesu hẹji yì olọn mẹ sọn Osó Olivie tọn ji.

—Owalọ lẹ 1:9, 12.

• Apọsteli nugbonọ Jesu tọn lẹ kẹdẹ wẹ mọ hihẹji yì olọn mẹ etọn.

—Owalọ lẹ 1:2, 11-13.