“Dapat Namon Tumanon ang Dios Subong Manuggahom sa Baylo Sang mga Tawo”

Ginhilway Paagi sa “Hamili nga Dugo”

ANG pinakadaku nga buhat sang gugma ni Jehova amo ang pagpadala sang iya bugtong nga Anak sa paghalad sang iya himpit tawhanon nga kabuhi subong gawad. Subong mga makasasala, kinahanglan gid naton ang amo nga gawad, kay wala sing di-himpit nga tawo ang “sarang nga mas-a makatubos sang iya utod, ukon makahatag sa Dios sing gawad sa iya . . . agod nga magkabuhi sia sing dayon.” (Salmo 49:6-9) Nagapasalamat gid kita nga “ginhatag [sang Dios] ang iya bugtong nga Anak, agod nga ang tagsatagsa nga magtuo sa iya indi malaglag kundi makatigayon sing kabuhi nga wala sing katapusan”!—Juan 3:16.

Paano kita ginahilway sang gawad? Binagbinagon naton ang apat ka paagi nga matigayon naton ang kahilwayan subong resulta sining pinakadaku nga buhat sang gugma ni Jehova nga Dios.

Ginhilway Paagi sa Gawad

Una, ang halad ni Jesus nagahilway sa aton gikan sa napanubli nga sala. Kita tanan natawo sa sala. Huo, mga makasasala kita bisan antes pa naton malapas ang kasuguan ni Jehova. Paano? Ang Roma 5:12 nagasiling: “Paagi sa isa ka tawo [si Adan] nagsulod ang sala sa kalibutan kag ang kamatayon paagi sa sala.” Subong mga anak sang makasasala nga si Adan, napanubli naton ang iya pagkadihimpit. Apang, bangod ginbayaran na ang gawad para sa aton, mahimo na kita mahilway gikan sa pag-ulipon sang napanubli nga sala. (Roma 5:16) ‘Natilawan [ni Jesus] ang kamatayon para sa tagsa ka tawo,’ ginlukdo ang mga resulta sang sala tungod sa mga anak ni Adan.—Hebreo 2:9; 2 Corinto 5:21; 1 Pedro 2:24.

Ikaduha, ang gawad nagahilway sa aton gikan sa makamamatay nga mga epekto sang sala. “Ang bayad nga ginabayad sa sala amo ang kamatayon.” (Roma 6:23) Ang silot sa sala amo ang kamatayon. Paagi sa mahalaron nga kamatayon sang Anak sang Dios, ang masinulundon nga katawhan posible na nga magkabuhi sing dayon. Sa pagkamatuod, “sia nga nagatuo sa Anak makatigayon sing kabuhi nga wala sing katapusan; sia nga wala nagatuman sa Anak indi makatigayon sing kabuhi.”—Juan 3:36.

Talupangda nga mahilway lamang kita sa mga epekto sang sala kon magtuo kita sa Anak sang Dios. Nagakahulugan ini sang paghimo sing mga pagbag-o sa aton kabuhi kag pagpahisanto sini sa kabubut-on sang Dios. Dapat naton talikdan ang aton anay sayop nga dalanon kag himuon kon ano ang kalahamut-an sa Dios. Si apostol Pedro nagsiling nga dapat kita ‘maghinulsol kag magliso agod mapanas ang aton mga sala.’—Binuhatan 3:19.

Ikatlo, ang halad ni Jesus nagahilway sa aton gikan sa pagsukmat sang konsiensia. Ang tanan nga nagdedikar kay Jehova kag nangin bawtismado nga mga disipulo sang iya Anak nalugpayan. (Mateo 11:28-30) Walay sapayan sang aton pagkadihimpit, nalipay gid kita sa pag-alagad sa Dios nga may matinlo nga konsiensia. (1 Timoteo 3:9; 1 Pedro 3:21) Paagi sa pagtu-ad sang aton mga sala kag sa pag-untat sa paghimo sini, ginapakitaan kita sing kaluoy kag nangin matinlo ang aton konsiensia.—Hulubaton 28:13.

Nagahatag sing Bulig kag Paglaum

Sa katapusan, paagi sa pagtuo sa gawad, wala na kita nahangawa sa aton tindog sa atubangan sang Dios. Si apostol Juan nagsulat: “Kon ang bisan sin-o makahimo sing sala, may mananabang kita upod sa Amay, si Jesucristo.” (1 Juan 2:1) Tuhoy sa katungdanan ni Jesus subong mananabang, si apostol Pablo nagsulat: “Sarang man  niya maluwas sing bug-os yadtong mga nagapalapit sa Dios paagi sa iya, bangod pirme sia nagakabuhi agod makitluoy para sa ila.” (Hebreo 7:25) Mientras may mantsa kita sang sala, kinahanglan naton ang serbisyo sang Mataas nga Saserdote nga si Jesucristo agod matigayon ang matarong nga tindog sa Dios. Paano nagpanghikot si Jesus subong mataas nga saserdote para sa aton?

Kap-atan ka adlaw pagkatapos sang iya pagkabanhaw sang 33 C.E., si Jesus nagkayab sa langit, diin ginpresentar niya ang balor sang iya “hamili nga dugo” sa Dios. Subong resulta, sa dili madugay hilwayon ni Jesus ang matinumanon nga katawhan gikan sa sala kag kamatayon. a (1 Pedro 1:18, 19) Gani, wala ka bala nagaugyon nga si Jesucristo takus nga higugmaon kag tumanon naton?

Dugang pa, si Jehova nga Dios takus nga higugmaon kag tumanon naton. Mahigugmaon nga naghimo sia sing kahimusan para sa aton “kahilwayan paagi sa gawad.” (1 Corinto 1:30) Utang naton sa iya indi lamang ang aton karon nga kabuhi kundi ang aton man paglaum nga matigayon ang kabuhi nga walay katapusan. Busa, may rason gid kita nga “tumanon ang Dios subong manuggahom sa baylo sang mga tawo.”—Binuhatan 5:29.

[Nota]

[Kahon/Mga retrato sa pahina 9]

NAHIBALUAN MO BALA?

• Si Jesus nagkayab sa langit gikan sa Bukid sang Olibo.—Binuhatan 1:9, 12.

• Ang matutom nga mga apostoles lamang ni Jesus ang nakasaksi sang iya pagkayab.—Binuhatan 1:2, 11-13.