“Re Swanetše Go Kwa Modimo E Le Mmuši Go E Na Le Batho”

Re Lopolotšwe ka “Madi a Bohlokwa”

PONTŠHO e kgolo ya lerato yeo Jehofa a e dirilego, ke ya ge a be a romela Morwa wa gagwe yo a tswetšwego a nnoši gore a fane ka bophelo bja gagwe bjo bo phethagetšego e le topollo. Ka ge re le batho ba nago le sebe, re tloga re nyaka go lopollwa sebeng ka ge go se le o tee gare ga batho ba sa phethagalago yo a ka ‘lopollago ngwanabo, a ntšha sa go mmoelanya le Modimo e le gore a ka phela go ya go ile.’ (Psalme 49:6-9) Re thaba kudu gore Modimo o ‘gafile Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego’!—Johane 3:16.

Topollo e re lokolla bjang? Anke re hlahlobeng ditsela tše nne tšeo ka tšona re hunologago ka baka la pontšho ye e bohlokwa ya lerato leo le bontšhitšwego ke Jehofa Modimo.

Re Lokollwa ka Topollo

Tsela ya pele, sehlabelo sa Jesu se kgona go re lokolla sebeng seo re belegwego re e-na le sona. Ka moka ga rena re belegetšwe sebeng. E bile re ba le sebe le pele ga ge re ka roba molao wa Jehofa. Ka tsela efe? Baroma 5:12 e re: “Ka motho o tee [Adama] sebe se tsene lefaseng, gomme lehu la tsena ka sebe.” Ka gobane re bana ba Adama yo a nago le sebe, go se phethagale ga rena re go feteditšwe ke yena. Lega go le bjalo, go lefša ga topollo go dira gore re lokologe sebeng seo re belegwego re e-na le sona. (Baroma 5:16) Jesu o ‘kwele lehu ka baka la motho yo mongwe le yo mongwe,’ a rwala ditla-morago tša sebe bakeng sa bana ba Adama.—Baheberu 2:9; 2 Bakorinthe 5:21; 1 Petro 2:24.

Ya bobedi, topollo e ka re lokolla go ditla-morago tše kotsi tša sebe. “Moputso woo sebe se o lefago ke lehu.” (Baroma 6:23) Kotlo ya sebe ke lehu. Ka lehu la gagwe la sehlabelo, Morwa wa Modimo o dirile gore batho ba kwago ba kgone go phela ka mo go sa felego. Ee, “yo a dumelago go Morwa o na le bophelo bjo bo sa felego; yo a sa kwego Morwa a ka se ke a bona bophelo.”—Johane 3:36.

Ela hloko gore re ka lopollwa go ditla-morago tša sebe ge feela re dumela go Morwa wa Modimo. Se se bolela gore re swanetše go fetoša tsela yeo re phelago ka yona gomme re phele go ya ka thato ya Modimo. Re swanetše go tlogela mokgwa le ge e le ofe o mobe woo re ka bago re tšwela pele re phela ka ona, ke moka re leke ka matla go dira seo se kgahlago Modimo. Moapostola Petro o boletše gore re swanetše go ‘itshola gomme re sokologe e le gore dibe tša rena di phumolwe.’—Ditiro 3:19.

Ya boraro, sehlabelo sa Jesu se hlwekiša matswalo a rena a nago le molato. Batho bohle ba a homotšega ge ba ineela go Jehofa e bile ba fetoga barutiwa ba kolobeditšwego ba Morwa wa gagwe. (Mateo 11:28-30) Re thaba kudu ge re hlankela Modimo ka matswalo a hlwekilego le ge re se ra phethagala. (1 Timotheo 3:9; 1 Petro 3:21) Ge re ipolela dibe gomme re kgaotša go di dira, Modimo o a re gaugela gomme re ba le matswalo a hlwekilego.

Topollo e a re Thuša e Bile e re Nea Kholofelo

Ya bone, ka go ba le tumelo topollong re a kgonthišega gore re na le tswalano e botse le Modimo. Moapostola Johane o ngwadile gore: “Ge e ba motho a ka dira sebe, re na le mothuši go Tate, e lego Jesu Kriste.” (1 Johane 2:1) Moapostola Paulo ge a ngwala ka tema ya Jesu bjalo ka mothuši, o itše: “O kgona le go phološa ka  mo go feletšego bao ba batamelago Modimo ka yena, gobane o phela ka mehla gore a ba phophothele.” (Baheberu 7:25) Ge feela re dutše re e-na le sebe, re tla dula re nyaka gore Moperisita yo Mogolo Jesu Kriste a re phophothele bakeng sa go re thuša gore re amogelwe ke Modimo. Ke ka tsela efe Jesu a hlanketšego e le moperisita yo mogolo?

Ka morago ga matšatši a masome-nne Jesu a tsošitšwe bahung ka 33 C.E., o ile a rotogela legodimong moo a ilego a nea Modimo mohola wa ‘madi a gagwe a bohlokwa.’ Ka baka leo, kgaufsinyana Jesu o tla lokolla batho ba kwago sebeng le lehung. * (1 Petro 1:18, 19) Ka gona, na ga o dumele gore re swanetše go rata Jesu Kriste le go mo kwa?

Ka godimo ga moo, re swanetše go rata Jehofa Modimo le go mo kwa. O dirile gore re ‘lokollwe ka topollo’ ka gobane a re rata. (1 Bakorinthe 1:30) Ga re mo kolote feela bophelo bjo re bo phelago ga bjale, eupša re mo kolota le bophelo bjo bo sa felego bjoo re tla bo phelago nakong e tlago. Ka gona, re na le mabaka a mantši a gore re ‘kwe Modimo e le mmuši go e na le batho.’—Ditiro 5:29.

[Mongwalo wa ka tlase]

[Lepokisi/Diswantšho go letlakala 9]

NA O BE O TSEBA?

• Jesu o rotogetše legodimong a le Thabeng ya Mehlware.—Ditiro 1:9, 12.

• Jesu o bonwe feela ke baapostola ba gagwe ba botegago ge a be a rotogela legodimong.—Ditiro 1:2, 11-13.