‘Ia Anaana i le Atua i lo Tagata’

Laveaʻiina e le “Toto Tāua”

O LE faailoaga sili o le alofa o Ieova, o le foaʻiina mai lea o lona Alo e toʻatasi e ofo atu lona ola lelei atoatoa, o se togiola. I le avea o i tatou o ni ē agasala, tatou te matuā manaʻomia lenei togiola, auā e lē mafaia lava e se tagata lē lelei atoatoa “ona faatau i lona uso, pe avatu i le Atua se togiola mo ia . . . ina ia ola pea ia e faavavau.” (Salamo 49:6-9) Maʻeu lo tatou loto faafetai ona ‘ua au mai e le Atua lona Atalii e toʻatasi, ina ia lē fano se tasi e faatuatua iā te ia, a ia maua e ia le ola e faavavau’!—Ioane 3:16.

E faapefea ona laveaʻiina i tatou e le togiola? Seʻi o tatou iloiloina ni vala se fā ua tatou maua ai le saʻolotoga, ona o lenei faailoaga sili o le alofa o Ieova.

Faasaʻolotoina Ona o le Togiola

Muamua, ua laveaʻiina i tatou mai le agasala ona o le taulaga a Iesu. Na tatou fananau uma mai e agasala. Ioe, na tatou agasala a o leʻi iloa le tulafono a Ieova. E faapefea? Ua faapea mai le Roma 5:12: “Faapei ona oo mai o le agasala i le lalolagi i le tagata [Atamu] e toʻatasi, o le oti foʻi ona o le agasala.” Talu ai o tatou o fanau a Atamu lea na agasala, ua tatou aafia ai foʻi i tulaga lē lelei atoatoa. Peitaʻi, ua mafai ona tatou saʻoloto mai noataga o le agasala tuufaasolo, ona o le totogiina o le togiola. (Roma 5:16) Na ‘oo le oti iā Iesu ona o tagata uma,’ ma na ia tauaveina āuga o agasala o fanau a Atamu.—Eperu 2:9; 2 Korinito 5:21; 1 Peteru 2:24.

Lona lua, ua faasaʻoloto e le togiola i tatou mai le oti. “O le oti, o le totogi lea o le agasala.” (Roma 6:23) Ioe, o le faasalaga mo agasala, o le oti lea. Ua saunia e le Alo o le Atua se avanoa e ola ai e faavavau tagata usiusitai uma, e ala i lona maliu faataulagaina. Ioe, “o lē faatuatua i le Alo, ua iā te ia le ola faavavau; a o lē lē faatuatua i le Alo e lē iloa e ia le ola.”—Ioane 3:36.

Seʻi matau mai, e faatoʻā mafai ona laveaʻiina i tatou mai le agasala, pe a faatuatua i le Alo o le Atua. E aofia ai le faia o ni suiga i le olaga e ōgatusa ma le finagalo o le Atua. E ao ona teena so o se ala leaga atonu na tatou ola ai, ma fai mea e faafiafia ai le finagalo o le Atua. Na taʻua e Peteru e manaʻomia ona tatou ‘salamō ma liliu, ina ia sōloiesea a tatou agasala.’—Galuega 3:19.

Lona tolu, ua faasaʻolotoina i tatou e le taulaga a Iesu mai le mauaina o se lotofuatiaifo lē lelei. Ua maua e i latou uma o ē ua tuuina atu iā Ieova, ma avea ma soo papatisoina a lona Alo le faamāfanafanaga. (Mataio 11:28-30) Ua tatou olioli tele i le auauna atu i le Atua ma se lotofuatiaifo mamā, e ui i lo tatou tulaga lē lelei atoatoa. (1 Timoteo 3:9; 1 Peteru 3:21) E alofagia i tatou ma maua se faamāfanafanaga mai se lotofuatiaifo ua ōia, pe a faaali ma lē toe faia a tatou agasala.—Faataoto 28:13.

Ua Saunia se Fesoasoani ma se Lumanaʻi

O le manatu mulimuli, o le a tatou lē toe popole e tusa ai o o tatou tulaga i luma o le Atua, pe a faatuatua i le togiola. Na tusi Ioane: “Pe afai foʻi e agasala se tasi, o iā te i tatou le fautua i luma o le Tamā, o Iesu Keriso lea.” (1 Ioane 2:1) Na tusi Paulo e uiga i le matafaioi a Iesu o se fesoasoani: ‘E mafai iā  te ia ona faaola pea lava i ē faalatalata atu i le Atua ona o ia, auā o loo soifua pea ia e fautua mo i latou.’ (Eperu 7:25) Talu ai ua matuā pisia i tatou i le agasala, e manaʻomia ai la le galuega a le Ositaulaga Sili o Iesu Keriso, ina ia tatou maua ai se tulaga lelei ma le Atua. Na faapefea ona gaoioi Iesu o se ositaulaga sili mo i tatou?

Ina ua mavae aso e 40 talu ona faatūina Iesu i le 33 T.A., sa ia toe afio atu i le lagi lea na ia tauaao ai le aogā o lona “toto tāua” i le Atua. O le iʻuga, ua toeitiiti ona faasaʻoloto lea e Iesu tagata usiusitai uma mai le agasala ma le oti. * (1 Peteru 1:18, 19) O lea la, ua alagatatau ona tatou alolofa ma usiusitai atu iā Iesu Keriso.

E lē gata i lea, e tatau ona tatou alolofa ma usiusitai atu iā Ieova le Atua. Ua ia saunia ma le alofa lo tatou “togiola.” (1 Korinito 1:30) Na ia foaʻi mai le ola lea ua tatou ʻaeʻae ai i le taimi lenei, aemaise le avanoa e ola fiafia ai e faavavau. O lea la, e tele māfuaaga tatou te ‘anaana ai i le Atua i lo tagata.’—Galuega 5:29.

[Faamatalaga pito i lalo]

[Pusa/Ata i le itulau 9]

PE NA E SILAFIA?

• Na afio aʻe Iesu i le lagi mai le mauga o Olive.—Galuega 1:9, 12.

• E na o soo faamaoni o Iesu na molimauina lona afio aʻe i le lagi.—Galuega 1:2, 11-13.