„Fu di Gado na wi tiriman, meki wi musu gi yesi na en na presi fu libisma”

Wi kisi frulusu nanga yepi fu „trutru warti brudu”

A MORO prenspari sani di Yehovah du fu sori taki a lobi wi, na taki a seni en wan-enkri Manpikin fu gi en volmaakti libisma libi leki wan lusu-paiman. Leki sondu libisma, wi abi a lusu-paiman disi tranga fanowdu, fu di nowan sondu libisma „kan frulusu wan brada srefi na nowan enkri fasi, a no kan gi Gado wan lusu-paiman gi en . . . so taki a ben sa kan libi fu têgo” (Psalm 49:6-9). Wi de nanga tangi na ati trutru taki Gado „gi en wan-enkri Manpikin, so taki ala sma di e bribi na ini en no sa dede, ma sa kisi têgo libi”!—Yohanes 3:16.

Fa a lusu-paiman e frulusu wi? Meki wi poti prakseri na fo fasi fa wi e kisi frulusu nanga yepi fu a tumusi prenspari sani disi di Yehovah Gado du fu sori taki a lobi libisma.

Wi e kisi frulusu nanga yepi fu a lusu-paiman

Na a fosi presi, a lusu-paiman fu Yesus kan frulusu wi fu a sondu di wi kisi. Wi alamala gebore nanga sondu. Iya, wi na sondusma srefi bifo wi man pasa a wet fu Yehovah. Fa so? Romesma 5:12 e taki: „Wán man meki sondu kon na grontapu, èn sondu fu en sei tyari dede kon.” Fu di wi na bakapikin fu Adam di ben abi sondu, meki wi kisi sondu tu. Ma a lusu-paiman di Yesus pai, e frulusu wi fu a makti fu dede (Romesma 5:16). Yesus „dede gi ala sma”, èn na so a e tyari den bakapisi fu sondu gi den bakapikin fu Adam.—Hebrewsma 2:9; 2 Korentesma 5:21; 1 Petrus 2:24.

Na a di fu tu presi, a lusu-paiman kan frulusu wi fu den takru bakapisi fu sondu. „A pai di sma e kisi gi sondu, na dede” (Romesma 6:23). A strafu gi sondu na dede. Fu di a Manpikin fu Gado gi en libi leki ofrandi, meki libisma di e gi yesi na Gado, man kisi têgo libi. Iya, „a sma di e bribi na ini a Manpikin, e kisi têgo libi; a sma di no e gi yesi na a Manpikin, no sa kisi libi.”—Yohanes 3:36.

Luku taki wi kan kisi frulusu fu den bakapisi fu sondu, soso te wi e bribi na ini Gado en Manpikin. Disi wani taki dati wi musu tyari kenki kon na ini wi libi, èn taki wi musu libi akruderi a wani fu Gado. Wi musu tapu nanga ibri takru sani di wi ben e du, èn wi musu du san de fanowdu fu plisi Gado. Na apostel Petrus ben taki dati wi musu ’abi berow èn drai wi libi, so taki Yehovah kan figi wi sondu puru’.—Tori fu den Apostel 3:19.

Na a di fu dri presi, a lusu-paiman fu Yesus e meki taki wi no abi konsensi fonfon moro. Ala sma di e gi densrefi abra na Yehovah èn e tron dopu disipel fu en Manpikin, e kisi trowstu (Mateyus 11:28-30). Awansi wi abi sondu, toku wi kan de koloku trutru fu di wi e dini Gado nanga wan krin konsensi (1 Timoteyus 3:9; 1 Petrus 3:21). Te wi e taki fu den sondu fu wi èn te wi e tapu nanga den, dan Gado sa sori sari-ati gi wi èn a o meki taki wi konsensi no fon wi moro.—Odo 28:13.

A lusu-paiman e yepi wi èn a e gi wi howpu

Te fu kaba, te wi e poti bribi na ini a lusu-paiman, dan wi no sa frede moro taki Gado no sa feni wi bun. Na apostel Yohanes ben skrifi: „Efu wan sma du wan sondu, dan wi abi wan yepiman na a Tata, dati na Yesus Krestes” (1 Yohanes 2:1). Na apostel Paulus ben sori fa  Yesus de wan yepiman, di a skrifi: „A man frulusu den sma krinkrin tu di e kon na Gado nanga yepi fu en, bika a e tan na libi fu ala ten fu taki gi den” (Hebrewsma 7:25). Solanga wi abi sondu ete, wi sa abi a yepi fu a Granpriester Yesus Krestes fanowdu, fu yepi wi abi wan bun banti nanga Gado. Fa Yesus dini leki granpriester gi a bun fu wi?

Fotenti dei baka di Yesus kisi wan opobaka na ini 33 G.T., a opo go na hemel, pe a gi Gado a waarde fu a „trutru warti brudu” fu en. A bakapisi fu dati, na taki heri esi Yesus sa fri libisma di e gi yesi, fu sondu nanga dede (1 Petrus 1:18, 19). * Fu dati ede wi musu lobi Yesus Krestes èn gi yesi na en, a no so?

Boiti dati, wi musu lobi Yehovah Gado èn wi musu gi yesi na en. Na wan lobi-ati fasi „a frulusu wi nanga yepi fu a lusu-paiman” (1 Korentesma 1:30). Tangi fu en taki wi de na libi now, ma tangi fu en sosrefi taki wi abi a howpu tu fu libi fu têgo na grontapu. Fu dati ede wi abi ala reide fu ’gi yesi na Gado na presi fu libisma, fu di en na wi tiriman’.—Tori fu den Apostel 5:29.

[Futuwortu]

[Faki/Prenki na tapu bladzijde 9]

YU BEN SABI DISI?

• Yesus opo go na hemel di a ben de na tapu na Olèifbergi.—Tori fu den Apostel 1:9, 12.

• Soso den getrow apostel fu Yesus ben si fa a go na hemel.—Tori fu den Apostel 1:2, 11-13.