“ʻOku Totonu pe ke Fai ki he Pule ʻa e ʻOtua ʻi he Pule ʻa e Tangata”

Fakahaofi ʻe he “Taʻataʻa Maʻongoʻonga”

KO E ngāue lahi taha ʻo e ʻofa ʻa Sihová ʻa ʻene ʻomai ko ia hono ʻAlo tofu-pē-taha-ne-fakatupú ke feilaulauʻi ʻene moʻui fakaetangata haohaoá ko ha huhuʻí. ʻI he tuʻunga ko e faʻahinga taʻehaohaoa ʻo e tangatá, ʻoku tau fiemaʻu lahi ha fakahaofi pehē, koeʻuhi ʻoku ʻikai ha tangata taʻehaohaoa ia ʻe ‘lava ke ne huhuʻi ha taha, pe ke ʻange kia Elohimi hano tatala . . . ko e pehe ke ne moʻui atu ʻo lauikuonga.’ (Sāme 49:​6-9) He fakamālōʻia moʻoni ē ko kitautolu ki he ʻOtuá ʻi heʻene “foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata”!—Sione 3:16.

ʻOku anga-fēfē hono ʻomai ʻe he huhuʻí ʻa e fakahaofí? Tau lāulea angé ki he ngaahi founga ʻe fā ʻa ia ʻoku tau maʻu ai ʻa e tauʻatāina ko ha ola ia ʻo e ngāue tuʻu-ki-muʻa ko eni ʻo e ʻofá ʻi he tafaʻaki ʻa Sihova ko e ʻOtuá.

Fakatauʻatāina ʻi he Huhuʻí

ʻUluakí, ʻe lava ʻe he feilaulau ʻa Sīsuú ʻo fakahaofi kitautolu mei he angahala tukufakaholó. ʻOku fanauʻi kotoa kitautolu ʻi he angahala. ʻIo, ʻoku tau angahalaʻia naʻa mo e ki muʻa ke tau malava ʻo maumauʻi ʻa e lao ʻa Sihová. ʻO anga-fēfē? ʻOku pehē ʻe he Loma 5:12: “[Naʻe] hoko ʻa e angahala ki mamani, ʻi he tangata pe taha [ʻĀtama]; mo e hoko ʻa e mate ʻi he angahala.” ʻI he tuʻunga ko e fānau ʻa ʻĀtama angahalaʻiá, kuo tau maʻu tukufakaholo ai ʻa hono tuʻunga taʻehaohaoá. Kae kehe, ko e totongi ʻo e huhuʻí ʻoku ʻai ai ke malava ʻo fakatauʻatāinaʻi kitautolu mei he haʻisia ki he angahala tukufakaholó. (Loma 5:16) Ko Sīsū naʻá ne “kamata ʻa e mate maʻa e tangata taki taha,” ʻo ne fua ʻa e ngaahi nunuʻa ʻo e angahala ʻa e fānau ʻa ʻĀtamá.—Hepelu 2:9; 2 Kolinito 5:21; 1 Pita 2:24.

Ko hono uá, ʻe lava ʻe he huhuʻí ʻo fakatauʻatāinaʻi kitautolu mei he ngaahi nunuʻa fakatupu mate ʻa angahalá. “Ko e totogi oe agahala koe mate.” (Loma 6:​23, PM) Ko e tautea ki he angahalá ko e mate. Fakafou ʻi heʻene pekia fakaefeilaulaú, naʻe ʻai ai ʻe he ʻAlo ʻo e ʻOtuá ke malava ʻa e moʻui taʻengatá ki he faʻahinga talangofua ʻo e tangatá. Ko e moʻoni, “ko ia ʻoku ne [ngāueʻi ʻa e] tui pikitai ki he ʻAlo ʻoku ne maʻu ʻa e moʻui taʻengata: ka ko ia ʻoku ʻikai te ne talangofua ki he ʻAlo ʻe ʻikai te ne mamata ia ki he moʻui.”—Sione 3:36.

Fakatokangaʻi ʻe lava ke fakahaofi kitautolu mei he ngaahi uesia ʻo e angahalá ʻo kapau pē te tau ngāueʻi ʻa e tui ki he ʻAlo ʻo e ʻOtuá. ʻOku kau heni ʻa hono fai ʻa e ngaahi liliu ʻi heʻetau moʻuí pea ʻai ia ke fehoanaki mo e finangalo ʻo e ʻOtuá. Kuo pau ke tau talitekeʻi ha ʻalunga hala pē kuo tau tuli nai ki ai pea kuo pau ke tau ngāue ke fai ʻa e meʻa ʻoku fakahōifua ki he ʻOtuá. Naʻe pehē ʻe he ʻapositolo ko Pitá ʻoku fiemaʻu ke tau ‘fakatomala, pea tafoki, koeʻuhi ke tamateʻi ʻetau ngaahi angahalá.’—Ngāue 3:19.

Ko hono tolú, ko e feilaulau naʻe foaki ʻe Sīsuú ʻoku fakatauʻatāinaʻi ai kitautolu mei ha konisēnisi halaia. Ko e tokotaha kotoa ʻoku nau fai ha fakatapui kia Sihova pea hoko ko ha kau ākonga papitaiso ʻa hono ʻAló ʻoku nau hokosia ʻa e fiemālie. (Mātiu 11:​28-30) Neongo ʻa ʻetau taʻehaohaoá, ʻoku tau maʻu ʻa e fiefia loloto ʻi he tauhi ki he ʻOtuá ʻaki ha konisēnisi maʻa. (1 Timote 3:9; 1 Pita 3:21) ʻAki hono vete ʻetau ngaahi angahalá pea siʻaki kinautolú, ʻe fakahaaʻi mai ai ʻa e meesi kia kitautolu pea tau maʻu ʻa e fakanonga mei ha konisēnisi kuo fakahohaʻasi.—Palovepi 28:13.

Tokonaki ʻa e Tokoni mo e ʻAmanaki

Ko hono fakaʻosí, ʻaki hono ngāueʻi ʻa e tui ki he huhuʻí, ʻoku fakahaofi ai kitautolu mei he manavahē felāveʻi mo hotau tuʻunga ʻi he ʻao ʻo e ʻOtuá. Naʻe tohi ʻe he ʻapositolo ko Sioné: “Ka kuo fai ha angahala ʻe ha taha, ʻoku tau maʻu ha taukapo ki he Tamai, ko Sisu Kalaisi.” (1 Sione 2:1) ʻI he fekauʻaki mo e fatongia ʻo Sīsū ko ha taukapó, naʻe tohi  ʻe he ʻapositolo ko Paulá: “Ko ia ai foki ʻoku ne mafai ke fakamoʻui opeope ʻa kinautolu ʻoku haʻu ki he ʻOtua ʻiate ia, ko ʻene moʻui maʻu ai pe ke hufekina kinautolu.” (Hepelu 7:25) Kehe pē ʻoku tau maʻu ha momoʻi angahala, te tau fiemaʻu ʻa e ngaahi ngāue ʻa e Taulaʻeiki Lahi ko Sīsū Kalaisí ke ne tokoniʻi kitautolu ke tau maʻu ha tuʻunga totonu mo e ʻOtuá. Naʻe anga-fēfē ʻa e ngāue ʻa Sīsū ko ha taulaʻeiki lahi maʻa kitautolú?

Hili ʻa e ʻaho ʻe 40 mei heʻene toetuʻu ʻi he 33 T.S., naʻe ʻalu hake ʻa Sīsū ki hēvani, ʻa ia naʻá ne ʻoatu ai ʻa e mahuʻinga ʻo hono “taʻataʻa maʻongoʻonga” ki he ʻOtuá. Ko hono olá, ʻe vavé ni ke fakatauʻatāinaʻi ʻe Sīsū ʻa e faʻahinga talangofua ʻo e tangatá mei he angahalá mo e maté. * (1 Pita 1:​18, 19) Ko ia ai, ʻikai ʻokú ke loto-tatau ʻoku tuha ʻa Sīsū Kalaisi mo ʻetau ʻofá mo e talangofuá?

Tānaki atu ki ai, ʻoku tuha ʻa Sihova ko e ʻOtuá mo ʻetau ʻofá mo e talangofuá. Naʻá ne anga-ʻofa ʻo ʻai ke malava ʻa hotau “fakatauʻatāinaʻi ʻe he huhuʻí.” (1 Kolinito 1:​30, NW) ʻOku tau moʻuaʻaki kiate ia ʻo ʻikai ko e moʻui pē ʻoku tau maʻu he taimi ní ka ko ha toe ʻamanaki pē ʻoku tau maʻu ke fiefia ʻi he moʻui taʻengatá. Ko ia ai, ʻoku tau maʻu ʻa e ʻuhinga kotoa ke tau “fai ki he pule ʻa e ʻOtua ʻi he pule ʻa e tangata.”—Ngāue 5:29.

[Fakamatala ʻi lalo]

[Puha/Fakatātā ʻi he peesi 9]

NAʻÁ KE ʻILOʻI?

• Naʻe ʻalu hake ʻa Sīsū ki hēvani mei he Moʻunga ʻŌlivé.—Ngāue 1:​9, 12.

• Ko e kau ʻapositolo faitōnunga pē ʻa Sīsuú naʻa nau siotonu ʻi heʻene ʻalu haké.—Ngāue 1:​2, 11-13.