“Kinahanglan Sugton Namon an Dios Sugad nga Magmarando Imbes nga an mga Tawo”

Ginluwas Pinaagi han “Hamili nga Dugo”

AN GIDADAKUI nga buhat han gugma ni Jehova amo an iya pagpadara han iya bugtong nga Anak basi maghatag han iya hingpit nga tawhanon nga kinabuhi sugad nga lukat. Sugad nga makasasala nga mga tawo, kinahanglan gud naton ito nga pagluwas, tungod kay waray diri-hingpit nga tawo nga “makakatubos han iya bugto ha bisan ano nga paagi, bisan hin paghatag ngadto ha Dios hin lukat tungod ha iya . . . nga hiya mabuhi ha waray kataposan.” (Salmo 49:6-9) Mapasalamaton gud kita nga an Dios ‘naghatag han iya bugtong nga Anak, basi nga an ngatanan nga natoo ha iya, diri mawara, kondi mamay kinabuhi nga waray kataposan’!—Juan 3:16.

Paonan-o an lukat nagluluwas ha aton? Paghisgotan naton an upat nga paagi diin nakakarawat naton an kagawasan sugad nga resulta hinin daku hinduro nga buhat han gugma ni Jehova nga Dios.

Kagawasan Pinaagi han Lukat

Siyahan, an halad ni Jesus makakaluwas ha aton tikang ha napanunod nga sala. Kita ngatanan natawo nga may sala. Oo, makasasala na kita bisan han waray pa kita makagtalapas han balaud ni Jehova. Kay ano? An Roma 5:12 nasiring: “Tungod ha usa ka tawo [Adan], sinulod an sala ha kalibotan, ngan tungod ha sala an kamatayon.” Sugad nga mga anak han makasasala nga hi Adan, napanunod naton an iya diri-hingpit nga kahimtang. Kondi, tungod kay ginlukat na kita, posible na kita magkaada kagawasan tikang ha napanunod nga sala. (Roma 5:16) Hi Jesus ‘nakatilaw hin kamatayon tungod han tagsa-tagsa nga tawo,’ gin-antos an mga resulta han sala para ha mga anak ni Adan.—Hebreo 2:9; 2 Korinto 5:21; 1 Pedro 2:24.

Ikaduha, an lukat makakahatag ha aton hin kagawasan tikang ha makamaratay nga mga epekto han sala. “An suhol han sala amo an kamatayon.” (Roma 6:23) An sirot han sala amo an kamatayon. Pinaagi han iya kamatayon sugad nga halad, ginpahinabo han Anak han Dios nga magin posible an kinabuhi nga waray kataposan para ha masinugtanon nga katawohan. Oo, “an natoo ha Anak, may kinabuhi nga waray kataposan; kondi adton diri natoo ha Anak, diri makakita han kinabuhi.”—Juan 3:36.

Tigamni nga maluluwas la kita tikang ha mga epekto han sala kon nagbubuhat kita hin pagtoo ha Anak han Dios. Nagkikinahanglan ini hin paghimo hin mga pagbag-o ha aton kinabuhi ngan pagpahiuyon hito ha kaburut-on han Dios. Kinahanglan umundang kita ha bisan ano nga sayop nga paggawi nga bangin aton ginbinuhat hadto ngan buhaton an nakakapalipay ha Dios. Hi apostol Pedro nagsiring nga kinahanglan kita ‘magbasol ngan bumalik basi an aton mga sala mapara.’—Buhat 3:19.

Ikatulo, an halad nga iginhatag ni Jesus nabulig ha aton nga magkaada hin kagawasan tikang ha salaan nga konsensya. An ngatanan nga nagdidedikar ngadto kan Jehova ngan nagigin bawtismado nga mga disipulo han iya Anak nakakaeksperyensya hin pagliaw. (Mateo 11:28-30) Bisan pa han aton pagkadiri-hingpit, nakakabiling kita hin hilarom nga kalipay ha pag-alagad ha Dios nga may limpyo nga konsensya. (1 Timoteo 3:9; 1 Pedro 3:21) Pinaagi ha pagsumat han aton mga sala ngan pagbaya hito, nakarawat kita hin kalooy ngan katalwasan tikang ha pag-abat hin kakonsensya.—Proberbios 28:13.

Naghahatag hin Bulig Ngan Paglaom

Ha kataposan, pinaagi ha pagtoo ha lukat, naluluwas kita tikang ha kahadlok may kalabotan ha aton pagtindog ha atubangan ha Dios. Hi apostol Juan nagsurat: “Kon may makasala, may manlalaban kita ha Amay, hi Jesu-Kristo.” (1 Juan 2:1) May kalabotan ha bahin ni Jesus sugad nga parabulig, hi apostol Pablo nagsurat: “Sadang man gud hiya  makaluwas han ngatanan nga nahirani ha Dios pinaagi ha iya, tungod kay hiya nabuhi ha gihapon basi ha pag-ampo tungod ha ira.” (Hebreo 7:25) Tubtob nga may-ada pa kita mantsa han sala, pagkikinahanglanon naton an bulig han Hitaas nga Saserdote nga hi Jesu-Kristo basi magkaada kita husto nga pagtindog ha atubangan han Dios. Paonan-o ginios hi Jesus sugad nga hitaas nga saserdote para ha aton?

Kwarenta ka adlaw katapos han iya pagkabanhaw han 33 K.P., sinaka hi Jesus ha langit, diin iya iginpresenta ha Dios an bili han iya “hamili nga dugo.” Sugad nga resulta, diri na maiha tatagan na ni Jesus hin kagawasan an masinugtanon nga katawohan tikang ha sala ngan kamatayon. * (1 Pedro 1:18, 19) Salit, diri ka ba nauyon nga hi Jesu-Kristo takos han aton gugma ngan pagsugot?

Dugang pa, hi Jehova nga Dios takos han aton gugma ngan pagsugot. Mahigugmaon nga iya ginpahinabo nga magin posible an aton kagawasan pinaagi han “pagtubos.” (1 Korinto 1:30) Utang naton ha iya diri la an aton kinabuhi yana kondi an bisan ano liwat nga paglaom nga magpahimulos hin kinabuhi nga waray kataposan. Salit, may-ada gud kita hinungdan nga ‘sugton an Dios sugad nga magmarando imbes nga an mga tawo.’—Buhat 5:29, NW.

[Footnote]

[Kahon/Mga Retrato ha pahina 9]

MAARAM KA BA?

• Sinaka hi Jesus ha langit tikang ha Bukid han mga Olibo.—Buhat 1:9, 12.

• An matinumanon nga mga apostol la ni Jesus an nakakita han iya pagsaka.—Buhat 1:2, 11-13.