“Dramm Simboliku” taʼ Valur Għalina
“Dramm Simboliku” taʼ Valur Għalina
KEMM ikun diffiċli li nifhmu sew ċerti siltiet Skritturali kieku partijiet oħra tal-Bibbja ma jgħinuniex nifhmuhom! Rakkonti storiċi fil-Kelma t’Alla jistgħu jittieħdu b’mod letterali. Imma xi wħud minn dawn ir-rakkonti fihom veritajiet iktar profondi li ma jidhrux ċari mill-ewwel. Eżempju wieħed hu r-rakkont taʼ żewġ nisa fil-familja tal-patrijarka Abraham. L-appostlu Pawlu sejjaħlu “dramm simboliku.”—Galatin 4:24.
Dan id-dramm jixraqlu l-attenzjoni tagħna għaliex ir-realtajiet preżentati minnu huma taʼ importanza fundamentali għal dawk kollha li jixtiequ jgawdu l-barka t’Alla Ġeħova. Qabel ma neżaminaw għala dan huwa minnu, ejja nikkunsidraw iċ-ċirkustanzi li qanqlu lil Pawlu jikxef it-tifsir tad-dramm.
Kien hemm problema fost il-Kristjani fil-Galazja taʼ l-ewwel seklu. Xi wħud minnhom kienu ‘qed josservaw bl-akbar reqqa l-jiem u x-xhur u l-istaġuni u s-snin’—affarijiet kmandati mil-Liġi Mosajka. Dawn l-individwi bdew jgħidu li l-ubbidjenza lejn il-Liġi kienet neċessarja biex dawk li jemmnu jkollhom il-favur t’Alla. (Galatin 4:10; 5:2, 3) Però, Pawlu kien jaf li l-Kristjani ma kellhomx bżonn josservaw dawn l-affarijiet. Sabiex jagħti prova taʼ dan, hu rrefera għal rakkont li kien familjari maʼ dawk li kellhom sfond Lhudi.
Pawlu fakkar lill-Galatin li Abraham, missier il-ġens Lhudi, nissel lil Ismagħel u lil Iżakk. L-ewwel wieħed twieled mill-ilsira Ħagar, u t-tieni wieħed twieled mill-mara ħielsa Sara. Dawk fil-Galazja li kienu qed jippromwovu l-ubbidjenza lejn il-Liġi Mosajka żgur li kienu familjari mar-rakkont taʼ Sara li għall-ewwel kienet ħawlija u dwar li hi tat lill-ilsira tagħha Ħagar biex ikollha iben minflokha. Huma kienu jafu li wara li Ħagar wildet lil Ismagħel, hi ma baqgħetx tistma lil sidtha, Ġenesi 16:1-4; 17:15-17; 21:1-14; Galatin 4:22, 23.
Sara. Però, fi qbil mal-wegħda t’Alla, Sara fl-aħħar wildet lil Iżakk fi xjuħitha. Iktar tard, Abraham keċċa lil Ħagar u lil Ismagħel minħabba li Ismagħel ittratta ħażin lil Iżakk.—Żewġ Nisa, Żewġ Pattijiet
Pawlu spjega l-elementi taʼ dan id-“dramm simboliku.” “Dawn in-nisa jfissru żewġ pattijiet,” kiteb hu, “wieħed li sar fuq il-Muntanja Sinaj, li tiled it-tfal għall-jasar, u li hi Ħagar . . . Hi ekwivalenti għal Ġerusalemm taʼ llum, għax hi fil-jasar maʼ wliedha.” (Galatin 4:24, 25) Ħagar irrappreżentat lil Iżrael letterali, b’Ġerusalemm bħala l-kapitali tiegħu. Il-ġens Lhudi kien obbligat lejn Ġeħova permezz tal-patt tal-Liġi inawgurat fuq il-Muntanja Sinaj. Taħt il-patt tal-Liġi, l-Iżraelin kienu dejjem imfakkrin li huma kienu lsiera tad-dnub u li kellhom bżonn il-fidwa.—Ġeremija 31:31, 32; Rumani 7:14-24.
Allura, il-mara “ħielsa” Sara u binha Iżakk lil min irrappreżentaw? Pawlu indika li Sara, il-‘mara li ma jistax ikollha tfal,’ issimbolizzat il-mara t’Alla, il-parti taʼ l-organizzazzjoni tiegħu tas-sema. Din il-mara tas-sema ma kellhiex tfal għaliex qabel ma ġie Ġesù hi ma kellha ebda “wlied” midlukin bl-ispirtu fuq l-art. (Galatin 4:27; Isaija 54:1-6) Madankollu, f’Pentekoste tas-sena 33 E.K., l-ispirtu qaddis tferraʼ fuq grupp taʼ rġiel u nisa li għalhekk twieldu mill-ġdid bħala l-ulied taʼ din il-mara tas-sema. L-ulied li ħarġu minn din l-organizzazzjoni ġew adottati bħala wlied Alla u saru werrieta bi sħab maʼ Ġesù Kristu f’relazzjoni taʼ patt ġdid. (Rumani 8:15-17) Wieħed minn dawn l-ulied, l-appostlu Pawlu, setaʼ jikteb: “Ġerusalemm taʼ fuq hi ħielsa, u din hi ommna.”—Galatin 4:26.
Ulied in-Nisa
Skond ir-rakkont tal-Bibbja, Ismagħel ippersegwita lil Iżakk. Bl-istess mod, matul l-ewwel seklu E.K., it-tfal taʼ Ġerusalemm imjassra waqqgħu għaċ-ċajt u ppersegwitaw lit-tfal taʼ Ġerusalemm taʼ fuq. “Bħalma dak iż-żmien dak li twieled skond il-laħam [Ismagħel] beda jippersegwita lil dak li twieled skond l-ispirtu [Iżakk], hekk ukoll issa,” spjega Pawlu. (Galatin 4:29) Meta Ġesù Kristu deher fuq l-art u beda jħabbar is-Saltna, il-mexxejja reliġjużi Lhud ġabu ruħhom eżatt bħalma ġab ruħu Ismagħel, iben Ħagar, maʼ Iżakk, il-werriet il-proprju t’Abraham. Huma waqqgħu għaċ-ċajt u ppersegwitaw lil Ġesù Kristu, milli jidher għaliex raw lilhom infushom bħala l-werrieta leġittimi t’Abraham u lil Ġesù rawh bħala li qed jiddeffes.
Ftit qabel ma qatluh il-ħakkiema taʼ Iżrael naturali, Ġesù qalilhom: “Ġerusalemm, Ġerusalemm, il-qattiela tal-profeti u l-ħaġġara taʼ dawk li ntbagħtulha! Kemm-il darba ridt niġbor lil uliedek flimkien, kif qroqqa tiġbor il-flieles tagħha taħt ġwinħajha! Imma intom dan ma ridtuhx. Ara! Darkom mitluqa f’idejkom.”—Mattew 23:37, 38.
Ir-rakkont ispirat tal-ġrajjiet li seħħew fl-ewwel seklu juri li l-ġens tal-laħam rappreżentat minn Ħagar ma pproduċiex awtomatikament ulied li kienu se jkunu werrieta bi sħab maʼ Ġesù. Il-Lhud li b’arroganza ħassew li kellhom id-dritt għal wirt bħal dan minħabba t-twelid tagħhom ġew imkeċċijin, miċħudin minn Ġeħova. M’għandniex xi ngħidu, xi individwi minn Iżrael naturali saru werrieta bi sħab maʼ Kristu. Madankollu, dan il-privileġġ ngħata biss fuq il-bażi tal-fidi tagħhom f’Ġesù iktar milli għax kellhom dixxendenza tal-laħam.
L-identità t’għadd minn dawn l-uħud li huma werrieta bi sħab maʼ Kristu bdiet tidher f’Pentekoste tas-sena 33 E.K. Hekk kif beda jgħaddi ż-żmien, Ġeħova dilek lil oħrajn bħala wlied Ġerusalemm taʼ fuq.
L-iskop taʼ Pawlu meta spjega dan id-“dramm simboliku” kien biex juri kemm hu superjuri l-patt il-ġdid meta mqabbel mal-patt tal-Liġi li sar permezz taʼ Mosè. Ħadd ma setaʼ jikseb il-favur t’Alla bl-għemejjel tal-Liġi Mosajka, għaliex il-bnedmin kollha huma imperfetti u l-Liġi sempliċement kienet tenfasizza l-jasar tagħhom għad-dnub. Però, bħalma spjega Pawlu, Ġesù ġie “biex jixtri u jeħles lil dawk li kienu taħt il-liġi.” (Galatin 4:4, 5) Għalhekk, il-fidi fil-valur tas-sagrifiċċju taʼ Kristu wasslet għall-ħelsien mill-kundanna tal-Liġi.—Galatin 5:1-6.
Il-Valur tad-Dramm Għalina
Għala għandna nkunu interessati fl-ispjegazzjoni ispirata li ta Pawlu dwar dan iddramm? Raġuni waħda hi li tagħtina d-dehen dwar tifsiriet Skritturali illi kieku kienu jibqgħu mhux ċari. L-ispjegazzjoni ssaħħaħ il-fiduċja tagħna fl-għaqda u l-armonija li hemm fil-Bibbja.—1 Tessalonikin 2:13.
Iktar minn hekk, ir-realtajiet simbolizzati minn dan id-dramm huma essenzjali għall-hena tagħna fil-futur. Kieku ma kinitx din id-dehra taʼ l-ulied taʼ Ġerusalemm taʼ fuq, kieku l-uniku prospett li jkollna hu l-jasar għad-dnub u l-mewt. Madankollu, taħt is-superviżjoni kollha mħabba taʼ Kristu u sħabu l-werrieta tal-wegħda t’Alla lil Abraham, ‘il-ġnus kollha taʼ l-art se jitbierku.’ (Ġenesi 22:18) Dan se jseħħ meta darba għal dejjem jinħelsu mill-effetti tad-dnub, l-imperfezzjoni, in-niket, u l-mewt. (Isaija 25:8, 9) Xi żmien glorjuż se jkun dak!
[Stampa f’paġna 11]
Il-patt tal-Liġi ġie inawgurat fuq il-Muntanja Sinaj
[Sors]
Pictorial Archive (Near Eastern History) Est.
[Stampa f’paġna 12]
Xi jfisser id-“dramm simboliku” li semma l-appostlu Pawlu?