Tok Blong Jeova i Wan Samting We i Laef

Ol Bigfala Poen Long Buk Blong Job

OLFALA Job i laef long kantri ya Uj, we naoia hem i Arebia. Plante man Isrel oli laef long Ijip long taem ya. Job i no wan man Isrel be, hem i wosip long Jeova God. Long saed blong Job, Baebol i talem se: “I no gat narafala man long wol ya we i olsem hem. Hem i wan gudfala man we tingting blong hem i stap strong long mi. Oltaem hem i stap mekem wosip long mi, mo i stap lukaot gud blong i no mekem wan samting we i no stret.” (Job 1:8) Ating Job i laef semtaem olsem nara tu gudfala man blong Jeova​—hemia profet Moses, mo Josef, we i boe blong Jekob.

Ating Moses i raetem buk ya blong Job, mo maet hem i save Job taem hem i stap 40 yia long kantri ya Midian we i klosap nomo long ples ya Uj. Ating Moses i harem nius blong ol samting we i hapen long ol laswan yia blong laef blong Job, taem ol man Isrel oli stap klosap long Uj, hemia long en blong 40 yia wokbaot blong olgeta long draeples. * Oli raetem stori ya blong Job long wan fasin we i naes we i naes, taswe plante man oli talem se, hem i beswan stori we man i raetem. Be, buk ya blong Job i no wan stori nomo. Hem i givim ansa long ol kwestin olsem: ?From wanem ol gudfala man oli safa? ?From wanem Jeova i letem fasin safa i stap? ?Ol man we oli gat sin oli save stap tru long God? Buk ya blong Job i wan haf blong Tabu Tok blong God, taswe mesej blong hem i laef mo i gat paoa tede.​—Hibrus 4:12.

‘YU SPOLEM DEI YA WE MI MI BON LONG HEM’

(Job 1:1–3:26)

Wan dei Setan i tok agensem fasin blong Job blong stap tru long God. Jeova i letem Setan i pruvum tok blong hem, mo i letem hem i traem Job long wan trabol afta long narawan. Be, Job i no ‘tok nogud long nem blong God.’​—Job 2:9.

Tri fren blong Job oli kam “leftemap tingting blong hem.” (Job 2:11) Oli kam sidaon wetem Job we oli no toktok nating, kasem taem we Job i stat tok mo i se: “[Sipos God i] bin singaot trabol i kam long dei ya we mi mi bon long hem, bambae i moa gud.” (Job 3:3) Hem i wantem kam “olsem pikinini we i bon we i ded finis.”​—Job 3:​11, 16.

Ansa Blong Sam Kwestin Long Saed Blong Baebol:

1:4​—?Olsem wanem? ?Ol pikinini blong Job oli mekem ol lafet blong betde? Nogat. Ol toktok we olfala lanwis i yusum blong tok ya “dei” mo “betde” i defren. Mining blong tok ya dei i defren long mining blong tok ya betde. (Jenesis 40:20) Long Job 1:4 oli yusum tok ya “dei” blong minim wan dei afta narawan, stat taem san i girap go kasem taem we hem i godaon. Wan taem evri yia, ol seven pikinini boe blong Job oli mekem lafet seven dei blong famle i joen wanples. Oli mekem lafet long haos blong wan boe finis nao oli go mekem long haos blong narawan, gogo oli holem lafet ya long haos blong olgeta evriwan wanwan.

1:6; 2:1​—?Hu i gat raet blong kam stanap long fes blong Jeova? Olgeta we oli kam stanap long fes blong Jeova hemia, stret Pikinini blong God wan nomo we hem i gat, we oli kolem hem Waes Tok; ol gudfala enjel; ol enjel we oli no obei long God; mo Devel Setan tu. (Jon 1:​1, 18) Oli sakemaot Setan mo ol rabis enjel blong hem long heven afta nomo we Kingdom blong God i stanap long 1914. (Revelesen 12:​1-12) Taem Jeova i letem Setan mo ol rabis enjel oli kam stanap long fes blong hem, hem i letem olgeta spirit man long heven oli harem klia wanem tok agens mo poen we Setan i sakem agensem hae rul blong hem.

1:7; 2:2​—?Olsem wanem? ?Jeova i toktok stret  long Setan? Baebol i no talem plante samting olsem wanem Jeova i toktok wetem ol spirit man. Be, profet Mikaea i luk wan vison mo long vison ya, wan enjel i stap toktok stret wetem Jeova. (1 King 22:​14, 19-23) Taswe, ating Jeova i toktok stret wetem Setan long taem ya.

1:21 (NW)​—?Olsem wanem Job i save gobak long ‘bel blong mama blong hem’? From we Jeova God i ‘tekem graon i mekem man long hem’ taswe tok ya ‘mama’ i wan pijatok we i minim graon.​—Jenesis 2:7.

2:9​—?Wanem tingting blong waef blong Job long taem ya we hem i talem long Job se i gud hem i tok nogud long God nao i ded? Waef blong Job tu i safa olsem man blong hem. Mo hem i harem nogud blong luk man blong hem we i bin strong bifo i kasem wan nogud sik. Ol pikinini blong hem oli ded. From ol nogud samting we i hapen, ating hem i lusum stret tingting long wan samting we i rili impoten​—hemia fasin fren we oli gat wetem God.

Ol Lesen Blong Yumi:

1:​8-11; 2:​3-5. Olsem stori ya blong Job i soem finis se, blong wokbaot long rod blong stret fasin i no jes blong mekem aksin mo toktok we i stret nomo, be tingting we i stret tu i mas pulum yumi blong wosipim Jeova.

1:​21, 22. Taem yumi stap tru long Jeova long ol gudtaem mo ol hadtaem, yumi save pruvum se Setan i man blong giaman.​—Proveb 27:11.

2:​9, 10. Olsem Job, yumi mas gohed blong holem bilif nating sipos ol famle oli no tinghae long ol samting long saed blong spirit no, oli fosem yumi blong lego bilif blong yumi.

2:13. Ol trifala fren blong Job oli no gat samting blong talem long saed blong God mo ol promes blong hem we i blong leftemap tingting, from we oli slak long saed blong spirit.

“!BAMBAE MI NO SAVE LEGO FASIN BLONG MI BLONG HOLEMSTRONG LONG GOD!”

(Job 4:1–31:40)

Stamba poen we trifala fren blong Job oli talem agens long hem se, ating Job i bin mekem samting we i no stret taswe hem i kasem panis long God. Elifas i toktok fastaem. Bildad i toktok afta long Elifas mo i yusum ol tok we i strong moa. Laswan hemia Jofara mo ol toktok blong hem oli strong bitim mak.

Job i no agri long giaman toktok blong ol fren blong hem. Hem i no kasem save from wanem God i letem hem i safa, ale, hem i traem blong pruvum se hem i no mekem rong. Nating se i olsem, Job i lavem God mo i se: “!Go kasem taem we mi mi ded, bambae mi no save lego fasin blong mi blong holemstrong long God!”​—Job 27:​5, NW.

Ansa Blong Sam Kwestin Long Saed Blong Baebol:

7:1; 14:14 (NW)​—?Blong wok olsem wan “soldia” no stap long “kalabus” i minim wanem? Trabol we i kasem Job i strong tumas, taswe hem i tingbaot laef se i had tumas, olsem laef blong man we oli fosem hem blong i kam wan soldia. (Job 10:​17, NW, futnot) Taem man i stap long beregraon​—stat taem hem i ded go kasem we hem i laef bakegen—​i wan samting we hem i no save ronwe long hem, olsem man we i stap long kalabus i no save jus blong stap narafala ples.

7:​9, 10; 10:21; 16:22​—?Olsem wanem? ?Ol toktok ya i soem se Job i no bilif long laef bakegen? Ol toktok ya oli long saed blong wanem bambae i hapen long Job stret long taem ya we hem i ded. ?Ale, hem i minim wanem? Wan samting se, sipos Job i ded, ol fren blong hem bambae oli no save luk hem. Bambae oli no moa luk Job i kambak long haos mo bambae oli no save toktok wetem hem bakegen go kasem taem we God i makemaot blong hem i girap bakegen. Mo tu, ating Job i minim se man i no save kamaot long beregraon hem wan sipos God i no mekem hem i laef bakegen. Taswe, Job 14:​13-15 i soemaot klia bilif we Job i gat long laef bakegen long ded.

10:10 (NW)​—?Olsem wanem Jeova i ‘kafsaedem Job olsem melek mo i wokem hem i kam olsem jis we i tik’? Ol naesfala tok ya i olsem wan pijatok we i blong tokbaot fasin blong God blong wokem Job long bel blong mama blong hem.

19:20 (NW)​—?Job i minim wanem taem hem i talem tok ya se “hem i stap laef wetem skin blong tut nomo”? Tut i no gat skin blong hem, taswe taem Job i talem se hem i stap laef wetem skin blong tut nomo, ating hem i minim se hem i stap laef yet be hem i no moa gat wan samting nating long laef blong hem.

 Ol Lesen Blong Yumi:

4:​7, 8; 8:​5, 6; 11:​13-15. Yumi no mas kwik blong talem se taem wan man i safa hem i kakae rabis frut blong sid we hem i planem mo God i no glad long hem.

4:​18, 19; 22:​2, 3. Ol advaes we yumi givim i mas stanap long Tok blong God, i no long tingting blong yumi wan.​—2 Timoti 3:16.

10:1. Job i harem nogud tumas, taswe hem i no save tingbaot sam narafala risen from wanem hem i safa. Yumi no mas letem tingting blong yumi i kam kros taem yumi safa, from we yumi savegud bigfala risen we i stap biaen long ol trabol we yumi kasem.

14:7, 13-15; 19:25; 33:24. Nomata wanem traem we Setan i putum fored long yumi, be hop ya blong laef bakegen long ded i save leftemap tingting blong yumi.

16:5; 19:2. Ol tok we yumi stap talem long narafala i mas leftemap tingting mo givim paoa long olgeta, i no blong spolem olgeta.​—Ol Proveb 18:21.

22:5-7. Fasin stretem we wan man i givim folem sam stori we hem i harem be i no gat pruf long hem, i save spolem man mo i blong nating nomo.

27:2; 30:​20, 21. Man i no nid blong stretgud olgeta blong hem i stap tru long God. Job i mestem taem hem i talem se God nao i mekem trabol i kamaot long hem.

27:5. Job nomo i save jus sipos hem i wantem blong stap tru long God no nogat, from we fasin stap tru i dipen long lav we wan man i gat long God. Taswe, yumi mas mekem lav we yumi gat long Jeova i gru.

28:​1-28. Man i save weples blong faenem ol sas samting long graon. Taem hem i stap lukaot ol sas samting ya, gudsave we hem i gat i pulum hem blong digim ol rod i go insaed long graon nao hem i luk ol samting we pijin i no save luk. Be man i save kasem waes blong God sipos hem i gat fasin blong fraetgud long Jeova.

29:​12-15. Yumi mas rere oltaem blong soem lav we i kaengud long olgeta we oli gat nid.

31:​1, 9-28. Job i givim nambawan eksampol long yumi taem hem i lukaot long fasin ya blong no pleplei wetem filing blong narafala, hem i no stilim waef blong narafala, i no spolem narafala mo i soem sore long ol narafala, hem i no ronem mane, mo i no wosip long narafala god.

“LONG GRAON MO LONG ASIS BLONG GRAON MI MI TANEM TINGTING BLONG MI”

(Job 32:1–42:17)

Elihu, wan yangfala we i stanap klosap, i bin lesingud long toktok blong olgeta. Naoia hem i no fraet blong toktok. Hem i stretem Job mo ol tri fren we oli spolem Job.

Taem Elihu i toktok finis, wan bigfala win i blu mo voes blong Jeova i kamaot long win ya i toktok long Job. Jeova i no eksplenem from wanem Job i safa. Be, hem i askem sam kwestin, blong mekem Job i save bigfala paoa mo waes we Jeova i gat. Job i agri se hem i no save wanem we hem i stap talem mo i se: “From samting ya mi karemaot bakegen ol toktok blong mi, mo long graon mo long asis blong graon mi mi tanem tingting blong mi.” (Job 42:6, NW ) Taem traem we Job i kasem i finis, Jeova i blesem Job from we hem stap tru long hem.

Ansa Blong Sam Kwestin Long Saed Blong Baebol:

32:​1-3​—?Wanem taem Elihu i kamtru? Elihu i harem evri stori blong ol man ya, taswe ating hem i kamtru bifo we Job i stat toktok mo long en blong ol seven dei we trifala fren blong Job oli stap kwaet oli no toktok. Ating Elihu i sidaon long wan ples we i klosap inaf blong i save harem olgeta oli toktok.​—Job 3:​1, 2.

34:7 (NW)​—?Olsem wanem Job i letem ol “tok jik ya ol kam long hem olsem wan man we i stap dring wota”? From we Job i harem nogud tumas, hem i harem olsem se ol trifala fren blong hem oli stap tok jikim hem, be rili, trifala ya i stap tok agens long God. (Job 42:7) Taswe, Job i stap lesin long ol tok jik ya olsem wan man we i glad blong dring wota.

 Ol Lesen Blong Yumi:

32:​8, 9. Man we i olfala, hemia i no min se hem i waes. Man i waes taem hem i kasem save long Tok blong God mo tabu spirit i lidim hem.

34:36 (NW). I gat wan rod nomo blong soem fasin blong yumi blong stap tru long God fulwan, hemia taem yumi kasem “traem gogo kasem ful mak blong hem.”

35:2. Elihu i lesingud mo i makemgud stamba blong problem bifo we hem i toktok. (Job 10:7; 16:7; 34:5) Bifo we wan Kristin elda i givim advaes, hem i mas lesingud, hem i mas kasem pruf blong ol samting we hem i harem mo kasem save stamba blong problem.​—Ol Proveb 18:13.

37:14; 38:1–39:30. Taem yumi tingting dip long ol nambawan wok blong Jeova, we i soemaot paoa mo waes blong hem​—samting ya i mekem yumi gat tingting daon mo i givhan long yumi blong luk se i rili impoten blong leftemap rul blong hem bitim we yumi tingbaot wanem we yumi nomo i wantem.​—Matiu 6:​9, 10.

40:​1-4 (NW). Taem yumi harem se yumi wantem toktok smosmol agens long Jeova, yumi mas ‘blokem maot blong yumi wetem han blong yumi.’

40:15–41:34. !Behemot (hipopotamus) mo Leviatan (krokodael) tufala i gat bigfala paoa! Blong stanap strong long wok blong God, yumi mas kasem paoa long Man ya we i Wokem ol strongfala anamol ya, hem nao i save givim paoa long yumi.​—Filipae 4:13.

42:​1-6. Taem Job i harem tok blong God mo i luk paoa blong hem, Job i ‘luksave trutok long saed blong God.’ (Job 19:26) Samting ya i jenisim tingting blong hem. Taem Baebol i stretem tingting blong yumi, yumi mas rere blong luksave mastik blong yumi mo rere blong jenis.

Wokem ‘Fasin Blong Job Blong Stanap Strong’

Buk blong Job i soemaot klia se i no God we i mekem man i safa. Setan nomo i mekem olsem. God i letem nogud fasin i stap long wol ya, blong givim janis blong yumi wanwan i soemaot sipos yumi stap long saed blong hae rul blong hem mo stap tru long hem.

Olsem Job, olgeta we oli lavem Jeova bambae oli kasem traem. Stori ya blong Job i givhan long yumi blong luksave se yumi save stanap strong. Hem i mekem yumi tingbaot se ol problem blong yumi bambae oli no save stap olwe. Jemes 5:11 i talem se: “Yufala i harem finis tok blong fasin blong Job, we hem i mekem tingting blong hem i longfala [“i stanap strong,” NW ]. Mo yufala i save finis ol samting we Hae God i mekem long hem biaen.” Jeova i givim blesing long Job from we hem i stap tru long hem. (Job 42:​10-17) !Wan nambawan hop i stap fored long yumi​—hemia laef blong olwe long Paradaes long wol ya! Olsem Job, yumi mas gat strong tingting blong stap tru long God oltaem.​—Hibrus 11:6.

[Futnot]

[Tok blong pija long pej 20]

?Yumi save lanem wanem long fasin blong Job blong stanap strong?