Ang Pulong ni Jehova Buhi

Mga Haylayt Gikan sa Basahon ni Job

ANG patriarkang si Job nagpuyo sa yuta sa Uz, nga anaa sa Peninsula sa Arabia. Daghang Israelinhon ang nagpuyo sa Ehipto nianang panahona. Bisag dili Israelinhon, si Job maoy usa ka magsisimba ni Jehova nga Diyos. Mahitungod kaniya, ang Bibliya nag-ingon: “Walay usa nga sama kaniya sa yuta, usa ka tawo nga walay-ikasaway ug matul-id, mahadlokon sa Diyos ug naglikay sa daotan.” (Job 1:8) Kini lagmit mao ang yugto tali sa pagkinabuhi sa duha ka talagsaong alagad ni Jehova—ang anak ni Jacob nga si Jose ug ang manalagna nga si Moises.

Si Moises, nga maoy gituohang nagsulat sa basahon ni Job, lagmit nakahibalo bahin kang Job sa dihang siya mipuyo ug 40 ka tuig sa Midian, nga duol sa yuta sa Uz. Si Moises lagmit nakadungog bahin sa kataposang mga tuig ni Job sa dihang ang mga Israelinhon didto duol sa Uz, sa hinapos nga bahin sa ilang 40-ka-tuig nga pagpuyo sa kamingawan. * Ang kasinatian ni Job nindot kaayong pagkatagik nga tungod niana ang asoy giisip nga usa ka obra-maestrang sinulat. Apan labaw pa niana, kini nagtubag sa mga pangutana sama sa: Nganong nag-antos ang maayong mga tawo? Nganong gitugotan ni Jehova nga molungtad ang pagkadaotan? Mahuptan ba sa dili-hingpit nga mga tawo ang ilang integridad ngadto sa Diyos? Ingong bahin sa inspiradong Pulong sa Diyos, ang mensahe sa basahon ni Job buhi ug gamhanan bisan karon.—Hebreohanon 4:12.

“WAGTANGA ANG ADLAW NGA AKONG GIKATAWHAN”

(Job 1:1–3:26)

Usa ka adlaw niana, gikuwestiyon ni Satanas ang integridad ni Job atubangan sa Diyos. Gidawat ni Jehova ang hagit ug gitugotan si Satanas sa pagsakit kang Job pinaagi sa sunodsunod nga kalamidad. Apan wala gayod “tungloha [ni Job] ang Diyos.”—Job 2:9.

Ang tulo ka higala ni Job miabot aron sa “pagduyog sa iyang kasubo.” (Job 2:11) Sila milingkod uban kaniya nga walay timik hangtod si Job miingon: “Wagtanga ang adlaw nga akong gikatawhan.” (Job 3:3) Buot niyang ‘mahisama sa mga bata nga wala makakita ug kahayag,’ o gianak nga patay nang daan.—Job 3:11, 16.

Tubag sa mga Pangutana Bahin sa Kasulatan:

1:4—Nagsaulog bag adlawng-natawhan ang mga anak ni Job? Wala gayod. Ang orihinal nga mga pulong alang sa “adlaw” ug “adlawng-natawhan” managlahi, nga ang matag usa lahilahi ug kahulogan. (Genesis 40:20) Sa Job 1:4, ang pulong “adlaw” maoy gigamit, nga nagtumong gikan sa pagsubang hangtod sa pagsalop sa adlaw. Ang pito ka anak ni Job lagmit naghikay ug pito-ka-adlaw nga salosalo sa pamilya kausa sa usa ka tuig. Sa dihang ilang himoon kini, ang matag usa ka anak lalaki magturnohay sa paghikay ug kombira nga himoon diha sa iyang balay sa “iyang kaugalingong adlaw.”

1:6; 2:1—Kinsay gitugotan sa pag-atubang kang Jehova? Lakip niadtong nakaatubang kang Jehova mao ang bugtong-anak sa Diyos, ang Pulong; ang matinumanong mga manulonda; ug ang dili-masinugtanong manulonda nga ‘mga anak sa Diyos,’ nga naglakip kang Satanas nga Yawa. (Juan 1:1, 18) Si Satanas ug ang iyang mga demonyo wala dayon palagpota gikan sa langit hangtod sa pagkatukod sa Gingharian sa Diyos niadtong 1914. (Pinadayag 12:1-12) Pinaagi sa pagtugot kanila  sa pag-atubang kaniya, gipresentar ni Jehova ang hagit ni Satanas ug ang isyu nga gibangon niini atubangan sa tanang espiritung mga linalang.

1:7; 2:2—Direkta bang nakigsulti si Jehova kang Satanas? Ang Bibliya wala maghatag ug daghang detalye kon sa unsang paagi nakigsulti si Jehova sa espiritung mga linalang. Apan, ang manalagnang si Micaias adunay panan-awon diin iyang nakita ang usa ka manulonda nga direktang nakigsulti kang Jehova. (1 Hari 22:14, 19-23) Busa, dayag nga si Jehova direktang nakigsulti kang Satanas.

1:21—Sa unsang paagi si Job makabalik sa ‘tiyan sa iyang inahan’? Kay giumol man ni Jehova nga Diyos ang tawo “gikan sa abog sa yuta,” ang terminong “inahan” masambingayong gigamit dinhi sa pagtumong sa yuta.—Genesis 2:7.

2:9—Unsa kahay kahimtang sa hunahuna sa asawa ni Job sa dihang giingnan niya ang iyang bana nga tunglohon ang Diyos ug magpakamatay? Sama sa iyang bana, ang asawa ni Job nag-antos sa maong mga kaalaotan. Lagmit naguol siya sa pagkakita nga ang iyang bana nga maayog lawas kanhi nag-antos sa makaluod nga sakit. Siya nawad-an sa iyang minahal nga mga anak. Siya lagmit naguol pag-ayo niining tanan nga wala na siya makapamalandong kon unsa gayoy hinungdanon—ang ilang relasyon sa Diyos.

Mga Leksiyon Alang Kanato:

1:8-11; 2:3-5. Sumala sa gipakita sa kahimtang ni Job, gawas pa sa hustong panggawi ug sinultihan, ang integridad naglakip sa hustong motibo sa pag-alagad kang Jehova.

1:21, 22. Pinaagi sa pagpabiling maunongon kang Jehova ubos sa maayo ug di-maayong kahimtang, kita makapamatuod nga si Satanas bakakon.—Proverbio 27:11.

2:9, 10. Sama kang Job, kita angay nga magpabiling lig-on sa pagtuo bisag ang mga membro sa pamilya dili magpabili sa atong espirituwal nga mga kalihokan o magpit-os kanato sa pagkompromiso o pagsalikway sa atong pagtuo.

2:13. Ang mga higala ni Job walay gikasulti nga makapahupay bahin sa Diyos ug sa iyang mga saad kay wala nila lantawa ang mga butang sumala sa panglantaw sa Diyos.

“DILI KO WAD-ON ANG AKONG INTEGRIDAD GIKAN KANAKO!”

(Job 4:1–31:40)

Ang pangunang punto sa tulo ka higala ni Job diha sa ilang mga pakigpulong mao nga si Job lagmit nakahimog daotan kaayong butang nga tungod niana siya gisilotan pag-ayo sa Diyos. Si Elipaz maoy unang misulti. Si Bildad maoy misunod kang Elipaz, nga nagsultig mga pulong nga mas makantalitahon. Si Zopar maoy labi pang matamayon.

Wala dawata ni Job ang bakak nga pangatarongan sa iyang mga higala. Kay wala makasabot kon nganong gitugotan sa Diyos ang iyang pag-antos, siya sobrang nagtagad sa pagpakamatarong sa iyang kaugalingon. Bisan pa niana, si Job nahigugma sa Diyos ug nag-ingon: “Hangtod nga ako mamatay dili ko wad-on ang akong integridad gikan kanako!”—Job 27:5.

Tubag sa mga Pangutana Bahin sa Kasulatan:

7:1; 14:14—Unsay kahulogan sa “pinugos nga trabaho”? Ang kasakit ni Job grabe kaayo nga iyang gihunahuna nga ang kinabuhi maoy lisod, makahago nga pinugos nga trabaho. Sa Job 10:17, ang “sunodsunod nga kalisdanan” mahimong hubaron usab nga “sunodsunod nga pinugos nga trabaho.” Kay ang panahon nga ang usa atua sa Sheol—sukad sa pagkamatay hangtod sa pagkabanhaw—maoy pinugos nga yugto, gipakasama ni Job kana nga yugto sa pinugos nga trabaho.

7:9, 10; 10:21; 16:22—Kini ba nga mga pahayag nagpasabot nga si Job wala motuo sa pagkabanhaw? Kini maoy mga komento bahin sa iyang haduol nga umaabot. Nan, unsay buot niyang ipasabot? Ang usa ka posibilidad mao nga kon siya mamatay, walay usa sa iyang katalirongan ang makakita kaniya. Sa ilang panglantaw, siya dili makabalik sa iyang balay o makabatog dugang pag-ila hangtod moabot ang tinudlong panahon sa Diyos. Lagmit si Job nagpasabot usab nga walay usa ang makahimo sa pagbalik gikan sa Sheol nga walay tabang. Sa Job 14:13-15, si Job dayag nga naglaom sa umaabot nga pagkabanhaw.

10:10—Sa unsang paagi si Jehova ‘nagbubo kang Job ingon sa gatas ug nagpabagtok kaniya sama sa keso’? Kini maoy balaknong pagbatbat kon sa unsang paagi si Job naporma sa tagoangkan sa iyang inahan.

 19:20—Unsay buot ipasabot ni Job sa ekspresyon nga “ako nakalingkawas nga ingon lamang sa panit sa akong ngipon”? Sa pag-ingon nga siya nakalingkawas uban sa panit sa usa ka butang nga dayag walay panit, si Job lagmit nagpasabot nga siya nakalingkawas nga walay bisan unsa.

Mga Leksiyon Alang Kanato:

4:7, 8; 8:5, 6; 11:13-15. Dili nato angayng hunahunaon dayon nga ang usa ka tawong nag-antos nag-ani sa iyang gipugas ug walay pag-uyon sa Diyos.

4:18, 19; 22:2, 3. Ang atong tambag kinahanglang pinasukad sa Pulong sa Diyos, dili sa personal nga opinyon.—2 Timoteo 3:16.

10:1. Ang kayugot maoy nakapagubot sa hunahuna ni Job, mao nga wala na siya makahunahuna sa ubang posibleng mga hinungdan sa iyang pag-antos. Kita dili angayng mayugot sa dihang kita mag-antos, ilabina tungod kay kita adunay tin-aw nga pagsabot sa mga isyu nga nalangkit.

14:7, 13-15; 19:25; 33:24. Sa bisan unsang pagsulay nga ipahamtang ni Satanas kanato, ang paglaom sa pagkabanhaw makapalig-on kanato.

16:5; 19:2. Ang atong ginasulti angayng makapadasig ug makapalig-on sa uban, dili makapalagot kanila.—Proverbio 18:21.

22:5-7. Ang tambag nga gipasukad sa mga akusasyon nga walay lig-ong pasikaranan maoy walay-pulos ug makadaot.

27:2; 30:20, 21. Bisag dili hingpit, ang usa makahupot sa iyang integridad. Sayop ang pagpanaway ni Job sa Diyos.

27:5. Si Job lamang ang bugtong makawala sa kaugalingon niyang integridad tungod kay ang integridad nagdepende sa gugma sa usa alang sa Diyos. Busa angay natong ugmaron ang lig-ong gugma alang kang Jehova.

28:1-28. Ang tawo nahibalo kon asa ang mga bahandi sa yuta. Sa iyang pagpangita niini, ang iyang kahanas magdala kaniya sa mga agianan sa ilalom sa yuta nga dili makita sa bisan unsang langgam nga mangdadagit nga may layog-abot nga panan-aw. Apan, ang diyosnong kaalam naggikan sa pagkahadlok kang Jehova.

29:12-15. Kita angay nga kinabubut-ong magpakita ug mahigugmaong-kalulot sa mga nanginahanglan.

31:1, 9-28. Si Job naghatag ug maayong panig-ingnan alang kanato pinaagi sa paglikay sa pagbirigbirig, pagpanapaw, dili-makataronganon ug dili-maluluy-ong pagtratar sa uban, materyalismo, ug idolatriya.

“AKO NAGHINULSOL SA ABOG UG SA ABO”

(Job 32:1–42:17)

Ang usa ka batan-on nga nagtan-aw kanila nga ginganlag Elihu mapailobong namati sa debate. Dayon siya maisogong misulti. Iyang gitul-id si Job ug ang tulo niya ka tigsakit.

Human makasulti si Elihu, si Jehova mitubag gikan sa usa ka unos. Wala niya gisaysay kon nganong nag-antos si Job. Apan, pinaagi sa pagsuknag sunodsunod nga mga pangutana, gipaila sa Labing Gamhanan kang Job ang Iyang katingalahang gahom ug dakong kaalam. Si Job miangkon nga siya misulti nga walay pagsabot ug miingon: “Ako naghimog pagbakwi, ug ako naghinulsol sa abog ug sa abo.” (Job 42:6) Sa dihang natapos ang pagsulay ni Job, ang iyang integridad gigantihan.

Tubag sa mga Pangutana Bahin sa Kasulatan:

32:1-3—Kanus-a miabot si Elihu? Kay si Elihu nakadungog man sa tanang pakigpulong, lagmit milingkod siya sa duol una pa misulti si Job sa pagtapos sa pito-ka-adlaw nga kahilom sa iyang mga higala.—Job 3:1, 2.

34:7—Sa unsang paagi si Job nahisama sa usa ka tawong “nagainom sa pagyubit sama sa tubig”? Sa iyang kaguol, gidawat ni Job ang pagbiaybiay kaniya sa iyang tulo ka bisita, bisan tuod sila nagsulti gayod batok sa Diyos. (Job 42:7) Busa, iyang gidawat ang pagyubit sama sa usa ka tawo nga nagakalipay sa pag-inom ug tubig.

 Mga Leksiyon Alang Kanato:

32:8, 9. Ang kaalam wala lamang mag-agad sa pangedaron. Kini nagkinahanglag pagsabot sa Pulong sa Diyos ug paggiya sa iyang espiritu.

34:36. Ang integridad mapamatud-an pinaagi sa atong ‘pagkanasulayan sa bug-os’ sa lainlaing mga paagi.

35:2. Si Elihu naminaw pag-ayo ug nagtino sa tinuod nga isyu una misulti. (Job 10:7; 16:7; 34:5) Sa dili pa motambag, ang Kristohanong mga ansiyano angayng maminaw pag-ayo, magkuhag impormasyon, ug nakasabot sa bug-os sa nalangkit nga mga isyu.—Proverbio 18:13.

37:14; 38:1–39:30. Ang pagpamalandong sa katingalahang mga buhat ni Jehova—ang pagpasundayag sa iyang gahom ug kaalam—makapahimo kanatong mapainubsanon ug makatabang kanato sa pagsabot nga ang pagbindikar sa iyang pagkasoberano mas hinungdanon kay sa kaugalingon natong kaayohan.—Mateo 6:9, 10.

40:1-4. Sa dihang kita makiling sa pagreklamo batok sa Labing Gamhanan, angay natong ‘itapion ang atong kamot sa atong baba.’

40:15–41:34. Pagkatalagsaon sa kusog sa Behemot (hippopotamus) ug Leviatan (buaya)! Aron makalahutay diha sa pag-alagad sa Diyos, kita usab nagkinahanglag kusog gikan sa Magbubuhat niining kusgan kaayong mga mananap, nga maghatag kanato ug gahom.—Filipos 4:13.

42:1-6. Kay nakadungog sa pulong ni Jehova ug napahinumdoman sa pagpadayag sa iyang gahom, si Job natabangan sa ‘pagkakita sa Diyos,’ o sa pagsabot sa kamatuoran bahin kaniya. (Job 19:26) Kini nag-usab sa iyang hunahuna. Sa dihang kita tul-iron pinasukad sa Kasulatan, angay natong dawaton dayon ang atong sayop ug maghimog mga kausaban.

Ugmara ang “Pagkamainantoson ni Job”

Ang basahon ni Job tin-awng nagpakita nga ang Diyos dili mao ang responsable sa pag-antos sa tawo, kondili si Satanas. Ang pagtugot sa Diyos sa pagkadaotan dinhi sa yuta naghatag kanato ug kahigayonan sa pagtubag kon unsay atong baroganan sa mga isyu bahin sa pagkasoberano ni Jehova ug sa atong integridad.

Sama kang Job, ang tanang nahigugma kang Jehova pagasulayan. Ang asoy bahin kang Job nagpasalig kanato nga kita makalahutay. Kini magpahinumdom kanato nga ang atong mga suliran dili magpabilin hangtod sa hangtod. “Nakadungog kamo bahin sa pagkamainantoson ni Job ug nakakita sa sangpotanan nga gihatag ni Jehova,” nag-ingon ang Santiago 5:11. Gigantihan ni Jehova si Job tungod sa paghupot sa iyang integridad. (Job 42:10-17) Pagkatalagsaong paglaom ang gibutang sa atong atubangan—kinabuhing walay kataposan sa Paraiso sa yuta! Sama kang Job, hinaot kita magmadeterminado sa paghupot sa atong integridad.—Hebreohanon 11:6.

[Footnote]

[Mga hulagway sa panid 16]

Unsay atong makat-onan sa “pagkamainantoson ni Job”?