Ohó Jehovah Tọn Tin to Ogbẹ̀

Nuagokun lẹ sọn Owe Job Tọn Mẹ

TỌGBO Job nọgbẹ̀ to aigba Uzi tọn, he to Arabie todin ji. Suhugan Islaelivi lẹ tọn tin to Egipti to ojlẹ lọ mẹ. Dile etlẹ yindọ Job ma yin Islaelivi de, sinsẹ̀n-basitọ Jehovah Jiwheyẹwhe tọn de wẹ e yin. Gando ewọ go, Biblu dọmọ: “Mẹde ma tin di i to aigba ji, omẹ pipé de podọ jlọjlọ de, ode he dibusi Jiwheyẹwhe, bosọ họnsi oylan.” (Job 1:8) Ehe na ko yin ojlẹ lọ he to ṣẹnṣẹn na gbẹninọ devizọnwatọ ayidego Jehovah tọn awe tọn—yèdọ Josẹfu visunnu Jakobu tọn po yẹwhegán Mose po.

Mose, he nọ yin alọdlẹndo taidi mẹhe wlan owe Job tọn, na ko plọnnu gando Job go to whenuena e yí owhe 40 zan to Midiani, he sẹpọ aigba Uzi tọn. Mose sọgan ko sè gando owhe godo tọn gbẹzan Job tọn lẹ go to whenuena Islaelivi lẹ zingbejizọnlin sẹpọ Uzi, jei vivọnu owhe 40 he yé yizan to zungbo mẹ lẹ tọn. a Numimọ Job tọn yin winwlan to aliho whanpẹnọ de mẹ sọmọ bọ kandai lọ nọ yin pinpọnhlan taidi anazọ́n de. Humọ, e na gblọndo na kanbiọ delẹ taidi: Naegbọn mẹdagbe lẹ do nọ jiya? Naegbọn Jehovah jotẹnna kanyinylan? Be gbẹtọvi mapenọ lẹ sọgan hẹn tenọgli yetọn go hlan Jiwheyẹwhe ya? Taidi apadewhe Ohó gbọdo Jiwheyẹwhe tọn, owẹ̀n he tin to owe Job tọn mẹ tin to ogbẹ̀ bo dohuhlọn etlẹ yin to egbehe.—Heblu lẹ 4:12.

“GBỌ AZÁN HE MẸ YÈ JI MI TE NI SÚDO”

(Job 1:1–3:26)

To gbèdopo, Satani hẹn tenọgligo hinhẹn Job tọn biọ ayihaawe mẹ to Jiwheyẹwhe nukọn. Jehovah ma dọnnu hẹ Satani gba ṣigba e jo e do nado hẹn nugbajẹmẹji debọdo-dego wá Job ji. Nalete, Job ma “gbẹ́ Jiwheyẹwhe dai” gba.—Job 2:9.

Họntọn Job tọn atọ̀n lẹ wá nado “vẹawu i.” (Job 2:11) Yé sinai po e po ma kẹnù kakajẹ whenuena Job kẹnù dọmọ: “Gbọ azán he mẹ yè ji mi te ni súdo.” (Job 3:3) Job jlo na taidi “ovivu he ma mọ hinhọ́n gbede” kavi ovi he kú to ajì-donu.—Job 3:11, 16.

Gblọndo Na Kanbiọ Owe-Wiwe Tọn Lẹ:

1:4—Be ovi Job tọn lẹ nọ basi hùnwhẹ jijizan tọn wẹ ya? Lala, yé ma nọ basi. Hogbe dowhenu tọn lẹ he nọ yin yiyizan na “azán” po “jijizan” po gbọnvo na yedelẹ, bo tindo zẹẹmẹ yetọn voovo lẹ. (Gẹnẹsisi 40:20) To Job 1:4 mẹ, hogbe lọ “azán” he yin yiyizan, dlẹnalọdo ojlẹ he tin to afọnnu po whèjai po gblamẹ. E họnwun dọ visunnu ṣinawe Job tọn lẹ nọ basi hùnwhẹ whẹndo mẹ tọn de to pọmẹ na azán ṣinawe to whemẹwhemẹ. To whenuena yé to hùnwhẹ lẹ basi lẹdope, visunnu dopodopo wẹ nọ yin jonọyitọ na hùnwhẹ he tin to owhé etọn gbè to “azán etọn ji.”

1:6; 2:1—Mẹnu lẹ wẹ yin dotẹnmẹna nado yì Jehovah nukọn? To mẹhe nọ sọawuhia to Jehovah nukọn lẹ mẹ wẹ Ovi detọn dopo akàn Jiwheyẹwhe tọn, yèdọ Ohó lọ tin te; podọ angẹli tolivẹtọ “ovi Jiwheyẹwhe tọn lẹ,” gọna Satani Lẹgba lọsu ga. (Johanu 1:1, 18) Satani po aovi etọn lẹ po ma ko yin yinyan sọn olọn mẹ kakajẹ ojlẹ vude to whenuena Ahọluduta Jiwheyẹwhe tọn yin didoai to 1914 godo. (Osọhia 12:1-12) Gbọn dotẹnmẹ nina yé nado wá nukọn etọn dali, Jehovah ze avùnnukundiọsọmẹ Satani tọn po whẹho he fọndote lọ lẹ po do nukọn na nudida gbigbọnọ etọn lẹpo.

 1:7; 2:2—Be Jehovah dọho na Satani tlọlọ wẹ ya? Biblu ma na nudọnamẹ gigọ́ gando lehe Jehovah nọ dọhodopọ hẹ nudida gbigbọnọ lẹ do go gba. Etomọṣo, yẹwhegán Mika mọ numimọ de he mẹ e mọ angẹli de to hodọdopọ tlọlọ hẹ Jehovah te. (1 Ahọlu lẹ 22:14, 19-23) Enẹwutu, e taidi dọ Jehovah dọho hẹ Satani matin hoyidọnamẹtọ de.

1:21—Aliho tẹ mẹ wẹ Job na lẹkọyi “ohò onọ̀” etọn tọn mẹ te? Na Jehovah Jiwheyẹwhe basi gbẹtọ sọn “kọ́gudu aigba tọn mẹ” wutu, hogbe lọ “onọ̀” he yin yiyizan to yẹhiadonu-liho tofi dlẹnalọdo aigba.—Gẹnẹsisi 2:7.

2:9—Etẹwẹ sọgan ko yin ninọmẹ apọ̀nmẹ tọn asi Job tọn tọn to whenuena e dọ na asu etọn dọ ewọ ni gbẹ́ Jiwheyẹwhe dai, bo kú? Asi Job tọn ko jiya nuhẹnbu tọn dopolọ lẹ hẹ asu etọn. E dona ko hẹn homẹgble e nado mọdọ azọ̀nylankan de to yasana asu etọn he ko tindo huhlọn po nugopipe po to ojlẹ de mẹ wayi to awufiẹsa azọ̀nylankan de tọn ji. E hẹn ovi yiwanna etọn lẹ bu to okú mẹ. E sọgan ko jẹflumẹ pete na nujijọ enẹ lẹpo wutu bọ ewọ ko wọn nuhe yin nujọnu nugbonugbo—yèdọ haṣinṣan yetọn hẹ Jiwheyẹwhe.

Nuhe Mí Plọn sọn E Mẹ:

1:8-11; 2:3-5. Dile eyin mimọ do to whẹho Job tọn mẹ, gbọnvona nuyiwa po hogbe he sọgbe po, tenọgligo-hinhẹn nọ biọ mẹwhinwhàn dagbe nado sẹ̀n Jehovah.

1:21, 22. Gbọn gbigbọṣi nugbonọ-yinyin mẹ na Jehovah to ninọmẹ dagbe po sinsinyẹn po mẹ dali, mí sọgan do Satani hia taidi lalonọ.—Howhinwhẹn lẹ 27:11.

2:9, 10. Taidi Job, mí dona lodo bo hẹn tenọgli mítọn go to yise mẹ eyin họntọn whẹndo tọn lẹ ma tlẹ yọ́n nuhọakuẹ-yinyin yanwle gbigbọmẹ tọn mítọn lẹ tọn kavi yé gbidikọna mí nado gbẹkọ kavi gbọjọ sọn yise mítọn mẹ.

2:13. Họntọn Job tọn lẹ ma tindo homẹmiọnnamẹnu depope nado dọ gando Jiwheyẹwhe po opagbe etọn lẹ po go na yé gbọagba to gbigbọ-liho wutu.

“YẸN MA NA DE WALỌPIPE ṢIE SỌN DÈ E GBA”

(Job 4:1–31:40)

Nuagokun hodidọ họntọn atọ̀n Job tọn lẹ tọn wẹ yin dọ Job dona ko wà ylando sinsinyẹn de he zọ́n bọ e dó to yasanamẹ sinsinyẹn mọnkọtọn mọ yí sọn Jiwheyẹwhe dè. Elifazi yin tọ́ntlọ́ngbọ́n. Bildadi hodo Elifazi to hogbe vlẹko tọn he sinyẹn hugan etọn yiyizan mẹ. Mẹṣanko Zofali tọn tlẹ sinyẹn hugan tlala.

Job ma kẹalọyi whẹwhinwhẹ́n agọ̀ jonọ etọn lẹ tọn gba. Na e ma mọnukunnujẹ nuhewutu Jiwheyẹwhe jotẹnna yajiji etọn mẹ, e lẹzun mẹhe whẹsuna edetiti duahunmẹna zẹjlẹgo. Etomọṣo, Job yiwanna Jiwheyẹwhe bo dawhá dọmọ: “Kaka yẹn kú yẹn ma na de walọpipe ṣie sọn dè e gba.”—Job 27:5.

Gblọndo Na Kanbiọ Owe-Wiwe Tọn Lẹ:

7:1; 14:14—Etẹwẹ hogbe lọ ojlẹ “sinsẹ̀nzọn” kavi tuklajijẹ dandan tọn podọ azán “sinsẹ̀n” kavi sinsẹ̀nzọnwiwa dandan tọn zẹẹmẹdo? Ayimajai Job tọn sinyẹn sọmọ bo e yí ogbẹ̀ jlẹdo sinsẹ̀nzọn dandan tọn he vẹawu de go. (Job 10:17, NW, nudọnamẹ odò tọn) Ojlẹ he nọ yin yiyizan to Ṣeol mẹ—bẹsọn whenuena mẹde kú kakajẹ fọnsọnku whenu—yin ojlẹ he ma sọgan yin didapana, enẹwutu Job yí ojlẹ enẹ jlẹdo sinsẹ̀n kavi sinsẹ̀nzọnwiwa dandan tọn go.

7:9, 10; 10:21; 16:22—Be hogbe ehelẹ dohia dọ Job ma tindo yise to fọnsọnku mẹ wẹ ya? Hogbe ehelẹ gando sọgodo Job tọn he to yakẹ go. Ṣigba, etẹ dọ wẹ e te? Zẹẹmẹ dopo wẹ yindọ eyin e kú, depope to mẹhe nọgbẹ̀ to ojlẹ etọn mẹ lẹ tọn masọ na mọ ẹn. To pọndohlan yetọn mẹ, e masọ na lẹgọwa owhé etọn gbè gbede mọ e ma nasọ yin yinyọnẹn kakajẹ ojlẹ dide Jiwheyẹwhe tọn mẹ. Job sọgan ko sọ tindo linlẹn lọ dọ mẹde ma sọgan wá sọn Ṣeol mẹ na ede. Todido Job tọn gando fọnsọnku he ja go họnwun to Job 14:13-15 mẹ.

10:10—Nawẹ Jehovah ‘kọ̀n Job jẹgbonu di oyìnnọ, bosọ hẹn ẹn pẹ̀n taidi oyìnnọ-adlọ́’ gbọn? Ehe yin hogbe milomilo de he basi zẹẹmẹ lehe Job yin awuwlena to vidọ̀ onọ̀ etọn tọn mẹ do tọn.

 19:20—Etẹ dọ wẹ Job te gbọn hogbe lọ “yè sọ hẹn mi họ̀ngán po ayú adú ṣie lẹ tọn po” dali? Gbọn didọ dọ emi họ̀ngán po ayú nuhe taidi nuhe ma tindo ayú de po dali, Job sọgan ko to didọ dọ emi ma tlẹ hẹn nudepope whenuena emi họ̀ngán.

Nuhe Mí Plọn sọn E Mẹ:

4:7, 8; 8:5, 6; 11:13-15. Mí ma dona nọ yawu wá tadona kọ̀n dọ mẹhe to yaji to nuhe e ko dó gbẹ̀n bo ma tindo nukundagbe Jiwheyẹwhe tọn.

4:18, 19; 22:2, 3. Ayinamẹ mítọn lẹ dona nọ sinai do Ohó Jiwheyẹwhe tọn ji, e ma yin do linlẹn mẹdetiti tọn ji gba.—2 Timoti 3:16.

10:1. Na adi ko tọ́nnukunna Job wutu, e masọ lẹnnupọndo whẹwhinwhẹ́n devo he sọgan hẹn yajiji etọn yọnbasi lẹ ji. Mí ma dona nọ duadi to whenuena mí to pipehẹ yajiji, titengbe to whenuena mí mọnukunnujẹ whẹho he e bẹhẹn lẹ mẹ hezeheze.

14:7, 13-15; 19:25; 33:24. To whlepọn depope he Satani sọgan hẹnwa mí ji whenu, todido fọnsọnku tọn sọgan hẹn mí dote.

16:5; 19:2. Hogbe mítọn lẹ dona nọ na tuli mẹ bo hẹn mẹdevo lẹ lodo, e mayin nado hẹn homẹgblena mẹ.—Howhinwhẹn lẹ 18:21.

22:5-7. Ayinamẹ he sinai do dodonu whẹsadokọnamẹ he ma tindo kunnudenu he dolido lẹ ji yin nutata po awugblenamẹnu po.

27:2; 30:20, 21. Tenọgligo-hinhẹn ma nọ biọ pipé-yinyin gba. Job gbọn nuṣiwa dali mọhodọdo Jiwheyẹwhe go.

27:5. Job lọsu titi wẹ sọgan de dide nado gbẹ́ tenọgli etọn dai na tenọgligo-hinhẹn nọ sinai do owanyi mẹtọn na Jiwheyẹwhe ji. Enẹwutu, mí dona wleawuna owanyi sinsinyẹn na Jehovah.

28:1-28. Gbẹtọ yọ́n fihe adọkunnu te to aigba ji. To whenuena e to yé dín, wuntuntun etọn nọ hẹn ẹn jẹ aligbó aigba glọ tọn he ohẹ̀ numọ-dohlan-nukọntọ de ma sọgan mọ lẹ ji. Ṣigba, nuyọnẹn Jiwheyẹwhe tọn nọ wá sọn budisi Jehovah mẹ.

29:12-15. Mí dona de sọn ojlo mẹ wá nado dó dagbewanyi hia mẹhe to nuhudo mẹ lẹ.

31:1, 9-28. Job ze apajlẹ de dai na mí to didapana aihun gblewa tọn, ayọdide, onú agọ̀ wiwà podọ lẹblanu ma dohia mẹdevo lẹ, ojlo agbasanu lẹ bibẹpli tọn po boṣiọ-sinsẹ̀n po mẹ.

“YẸN . . . LẸNVỌJỌ TO KỌ́GUDU PO AFÍN PO MẸ”

(Job 32:1–42:17)

Jọja he gbọṣi abọẹ de he yinkọ etọn nọ yin Elihu yí sọwhiwhe do tuntoai na nudindọn lọ. Todin e dọho. E kọhona Job po yasanamẹtọ etọn atọ̀n lẹ po.

Tlolo he Elihu dọho fó godo, Jehovah na gblọndo sọn yujẹhọn de mẹ. E ma basi zẹẹmẹ do yajiji Job tọn ji gba. Ṣigba gbọn kanbiọ debọdo-dego kinkanbiọ Job dali, Ganhunupotọ lọ hẹn Job nado doayi huhlọn he dobu po nuyọnẹn daho Etọn po go. Job yigbe dọ emi ko dọho matin nukunnumọjẹnumẹ bo dọmọ: “Yẹn ṣì de e, bosọ lẹnvọjọ to kọ́gudu po afín po mẹ.” (Job 42:6) To vivọnu whlepọn Job tọn lẹ tọn godo, tenọgligo-hinhẹn etọn yin didona.

Gblọndo Na Kanbiọ Owe-Wiwe Tọn Lẹ:

32:1-3—Whetẹnu wẹ Elihu wá do? Na Elihu sèhó heyin didọ lẹpo wutu, e dona ko sinai to fihe madẹn nado tuntoai to ojlẹ de mẹ whẹpo Job do dọho podọ to vivọnu azán ṣinawe he họntọn Job tọn atọ̀n lẹ nọ abọẹ na lẹ tọn.—Job 3:1, 2.

34:7—Nawẹ Job tin taidi “mẹhe ze mẹvivlẹ nù taidi osin” gbọn? To ojlẹ ayimajai tọn etọn lẹ mẹ, Job yin whinwhàn nado yí mẹṣanko mẹdlapọntọ etọn atọ̀n lẹ tọn na ede tlọlọ, mahopọnna dọ yé to hodọ sọta Jiwheyẹwhe wẹ.  (Job 42:7) Enẹwutu, e ze vlẹko nù taidi mẹhe to osin nù po ayajẹ po nkọ.

Nuhe Mí Plọn sọn E Mẹ:

32:8, 9. Nuyọnẹn ma nọ wá na owhe lẹ to yìyì poun wutu gba. E nọ biọ nukunnumọjẹ Ohó Jiwheyẹwhe tọn mẹ po anademẹ gbigbọ etọn tọn po.

34:36. Tenọgligo-hinhẹn nọ yin didohia eyin mí yin ‘whiwhlepọn jẹ opodo’ to aliho voovo mẹ.

35:2. Elihu dotoai po sọwhiwhe po bo doai whẹho titengbe lọ go whẹpo do dọho. (Job 10:7; 16:7; 34:5) Jẹnukọnna ayinamẹ ninamẹ, mẹho Klistiani lẹ dona yí sọwhiwhe do dotoai, nado yọ́n whẹwhinwhẹ́n lẹ, bosọ mọnukunnujẹ whẹho titengbe lẹ mẹ ganji.—Howhinwhẹn lẹ 18:13.

37:14; 38:1–39:30. Ayihamẹlinlẹnpọn do azọ́n jiawu Jehovah tọn lẹ ji—yèdọ dohia huhlọn po nuyọnẹn etọn po tọn—nọ whiwhẹ mí bo nọ gọalọna mí nado mọ dọ whẹsuna nupojipetọ-yinyin etọn yin nujọnu hugan whẹho mítọn depope.—Matiu 6:9, 10.

40:1-4. To whenuena mí yin whinwhàn nado dọho jẹagọdo Ganhunupotọ lọ, mí dona ‘yí alọ mítọn do onù mítọn ji.’

40:15–41:34. Huhlọn nankọ die dẹgbó po Leviatani (ologbó) po tindo! Nado sinyẹnlin to sinsẹ̀nzọn Jiwheyẹwhe tọn mẹ, míwlẹ tindo nuhudo huhlọn Didatọ gbekanlin huhlọnnọ ehelẹ tọn, he to huhlọnna mí.—Filippinu lẹ 4:13.

42:1-6. Ohó Jehovah tọn sise podọ huhlọn etọn didohia Job gọalọna ẹn nado “mọ Jiwheyẹwhe,” kavi mọ nugbo lọ gando ewọ go. (Job 19:26) Ehe vọ́ nulẹnpọn etọn jlado. To whenuena mí mọ wọhẹmẹ yí sọn Owe-wiwe mẹ, mí dona to jejeji nado yigbena nuṣiwa mítọn bo basi vọjlado.

Wleawuna ‘Akọ́ndonanu Job Tọn’

Owe Job tọn dohia hezeheze dọ e ma yin Jiwheyẹwhe wẹ nọ hẹn yajiji gbẹtọvi lẹ tọn wá. Satani wẹ. Whenu he Jiwheyẹwhe jodona ylanwiwa to aigba ji na dotẹnmẹ mí nado dó adà he mẹ mí te gando whẹho nupojipetọ-yinyin Jehovah tọn po tenọgligo-hinhẹn mítọn po go hia.

Taidi Job, mẹhe yiwanna Jehovah lẹpo na yin whiwhlepọn. Kandai Job tọn na mí adọgbigbo dọ mí sọgan doakọnna. E flin mí dọ nuhahun mítọn lẹ ma na nọ aimẹ kakadoi. “Mì ko sè [akọ́ndonanu] Job tọn, bosọ mọ opodo OKLUNỌ tọn,” wẹ Jakobu 5:11 dọ. Jehovah dona tenọgligo-hinhẹn Job tọn. (Job 42:10-17) Todido daho nankọ die yè zedonukọnna mí yèdọ ogbẹ̀ madopodo to Paladisi mẹ to aigba ji! Enẹwutu, taidi Job, mì gbọ mí ni magbe nado hẹn tenọgli mítọn go.—Heblu lẹ 11:6.

[Nudọnamẹ Odò Tọn]

[Yẹdide to weda 16]

Etẹwẹ mí sọgan plọn sọn ‘akọ́ndonanu Job tọn’ mẹ?