A Wortu fu Yehovah de libilibi

Edepenti fu a buku Yob

A FAMIRI-EDEMAN Yob e libi na ini a kondre Us. Na ini a ten disi a kondre dati de na ini Arabia. Furu Israelsma e libi na ini Egepte na a pisi ten dati. Aladi Yob srefi a no wan Israelsma, toku en na wan anbegiman fu Yehovah Gado. Bijbel e taki fu en: „Nowan sma no de na grontapu, di de leki en, wan man di de sondro fowtu èn di de opregti, di e frede Gado èn di e wai pasi gi ogri” (Yob 1:8). Disi musu fu de a pisi ten baka di wan prenspari futuboi fu Yehovah, namku Yosef, a manpikin fu Yakob, dede, èn a pisi ten bifo wan tra prenspari futuboi fu en, namku a profeiti Moses, gebore.

Sma e bribi taki na Moses skrifi a buku Yob, èn kande a kon yere fu Yob di a tan 40 yari na ini Midian, krosibei fu a kondre Us. A kan taki Moses yere fu den lasti yari fu Yob en libi, di den Israelsma ben de krosibei fu Us, èn dati ben de na a kaba pisi fu den 40 yari di den ben tan na ini a gran sabana. * Den sani di Yob ondrofeni skrifi na so wan moi fasi, taki sma e si den leki wan tumusi moi puwema. Ma a tori fu Yob, no de wan tumusi moi puwema nomo. A e gi piki tapu aksi soleki: Fu san ede bunsma e nyan pina? Fu san ede Yehovah e gi pasi taki ogridu de? Sondu libisma man tan hori den soifri retifasi na Gado? Leki wan pisi fu a Wortu fu Gado di skrifi nanga yepi fu santa yeye, a boskopu na ini a buku Yob de libilibi, èn a abi krakti srefi na ini a ten disi.—Hebrewsma 4:12.

’MEKI A DEI DI MI GEBORE NO DE MORO’

(Yob 1:1–3:26)

Wan dei Satan e taigi Gado taki Yob no e dini en nanga wan opregti ati. Fu buweisi Satan taki Yob man hori en soifri retifasi, meki Yehovah e gi pasi taki Satan tyari a wan rampu baka a trawan kon tapu Yob. Ma Yob e weigri fu „fluku Gado”.—Yob 2:9.

Den dri mati fu Yob e kon na en fu „sori taki den e firi sari gi en” (Yob 2:11). Den e sidon nanga en sondro fu taki wán sani. Baka di den tan pî fu wan langa pisi ten, dan Yob e taki: „Meki a dei di mi gebore, no de moro” (Yob 3:3). A e winsi fu de „leki pikin di no si a leti”, noso pikin di gebore dededede.—Yob 3:11, 16.

Piki tapu den aksi fu Bijbel:

1:4—A de so taki den pikin fu Yob ben e hori friyaridei? Nôno, den no ben du dati. Na ini a fosi tongo di a tori disi skrifi na ini, den wortu di gebroiki gi „dei” nanga „friyaridei” e difrenti, fu di ibriwan fu den wortu disi wani taki wan tra sani (Genesis 40:20). A wortu „dei” gebroiki na ini Yob 1:4, èn a wani taki a pisi ten fu son-opo, te go miti sondongo. Soleki fa a sori, dan den seibi manpikin fu Yob ben e hori wan fesa nanga a famiri wán leisi wan yari, èn a fesa dati ben teki seibi dei langa. Te a fesa dati ben e hori, dan ibriwan fu den manpikin „ben abi wan dei” te a ben e kari den trawan kon na wan fesa-nyanyan di ben e hori na en oso.

1:6; 2:1—Suma ben kisi primisi fu kon na fesi Yehovah? Den wan di ben e kon na fesi Yehovah, na a wan-enkri Manpikin di Gado srefi meki, namku a Wortu, sosrefi den getrow engel, den trangayesi engel ’manpikin fu Gado’, nanga Satan Didibri (Yohanes 1:1, 18). Baka di a Kownukondre fu Gado seti na ini 1914, dan fosi Satan nanga den ogri yeye fu en ben yagi puru na  hemel (Openbaring 12:1-12). Fu di Yehovah gi Satan pasi fu kon na fesi en, meki A sori ala den yeye mekisani fa Satan tyalensi en, èn den kon frustan sortu strei opo kon.

1:7; 2:2—A de so taki Yehovah ben taki langalanga nanga Satan? Bijbel no e taki finifini fa Yehovah e taki nanga den yeye mekisani. Ma a profeiti Mikaya ben kisi wan fisyun pe a ben si wan engel e taki langalanga nanga Yehovah (1 Kownu 22:14, 19-23). Fu dati ede a kan de so taki Yehovah ben taki langalanga nanga Satan.

1:21—Fa Yob ben o man drai go baka na en „mama bere”? Fu di Yehovah Gado ben „teki doti fu a gron” fu meki libisma, meki a wortu „mama” gebroiki dyaso na wan agersi fasi, èn a abi fu du nanga grontapu.—Genesis 2:7.

2:9—San meki kande taki a wefi fu Yob taigi en masra fu fluku Gado èn fu dede? A wefi fu Yob ben lasi den srefi sani di en masra ben lasi. A ben musu fu hati en fu si taki a masra fu en, di ben de wan steifisteifi man fosi, ben e pina so te fu wan tegu siki di a ben abi. A ben lasi den lobi pikin fu en na ini dede. Kande a ben bruya so te fu den sani disi ede, taki a no hori na prakseri san ben de prenspari trutru, namku a banti di den ben abi nanga Gado.

Sani di wi kan leri:

1:8-11; 2:3-5. Na eksempre fu Yob e sori, taki efu wi wani tan hori wi soifri retifasi, dan wi musu handri èn taki na wan fasi di fiti, èn wi musu dini Yehovah nanga wan krin ati tu.

1:21, 22. Te wi e tan loyaal na Yehovah te sani e waka bun, ma sosrefi te sani no e waka bun, dan wi kan buweisi nanga dati taki Satan na wan leiman.—Odo 27:11.

2:9, 10. Neleki Yob, wi musu tan kánkan na ini a bribi tu, awansi famiriman no feni en bun taki wi e meki muiti fu go na fesi na yeye fasi, èn awansi den e dwengi wi fu du sani di no de akruderi a bribi fu wi, noso fu drai baka gi a bribi fu wi.

2:13. Den mati fu Yob no ben trowstu en nanga den sani di den ben taki fu Gado èn fu den pramisi fu en, fu di den no ben e si sani soleki fa Gado e si sani.

„MI NO SA LIBI MI SOIFRI RETIFASI!”

(Yob 4:1–31:40)

A moro prenspari sani di e kon na fesi na ini a takimakandra di den dri mati fu Yob e hori, na taki a musu fu de so taki Yob du wan tumusi takru sani, èn taki na fu dati ede Gado e gi en so wan hebi strafu. Elifas na a fosiwan di e bigin taki. Baka te Elifas kaba taki, dan Bildad e bigin taki, èn a e taki sani di e hati den firi fu Yob. Sofar e taki moro hati sani srefi.

Yob no e bribi den falsi sani di den fisitiman fu en e taki. A no e frustan fu san ede Gado gi pasi taki a e pina, èn dati meki a e broko en ede srefisrefi fa fu buweisi taki a no du nowan ogri. Awansi fa a no fa, Yob lobi Gado èn a e bari: „Teleki mi lasti bro, mi no sa libi mi soifri retifasi!”—Yob 27:5.

Piki tapu den aksi fu Bijbel:

7:1; 14:14—San „fruplekti wroko” wani taki na ini a vers disi? Yob ben e pina so te taki a ben feni taki a libi tranga, èn taki a libi de leki wan hebi fruplekti wroko (Yob 10:17). A ten di wan sma de na ini Syeol, namku fu sensi a sma dede, te go miti na opobaka fu en, na wan fruplekti pisi ten. Fu dati ede meki Yob ben agersi a pisi ten disi nanga fruplekti wroko.

7:9, 10; 10:21; 16:22—Den sani disi di Yob taki, e sori taki a no ben e bribi na ini na opobaka? Den sani disi abi fu du nanga a fasi fa Yob en libi ben o waka syatu baka dati. Ma san a ben wani taki nanga den wortu disi dan? Wan sani di a ben wani sori kande, na taki efu a ben o dede, dan nowan fu den sma fu en ten ben o si en. Gi den sma dati, Yob no ben o drai go baka na en oso, èn den no ben o poti prakseri moro na en, teleki Gado ben bosroiti fu gi en wan opobaka. Kande Yob ben wani sori tu, taki nowan sma kan puru ensrefi na ini Syeol. Yob 14:13-15 e sori krin taki Yob ben abi a howpu fu kisi wan opobaka na ini a ten di e kon.

10:10—Fa Yehovah ’kanti Yob trowe leki merki, èn fa a meki en kon swa leki kasi’? Den tumusi moi wortu disi e sori fa Gado meki Yob kon de na ini en mama bere.

19:20—San Yob ben wani taki nanga den wortu „mi e lowe komoto nanga a skin fu mi  tifi”? Fu di Yob taki dati a lowe komoto nanga a skin fu wan sani di no abi skin trutru, dan a kan taki a ben wani sori nanga dati taki pikinmoro a no ben abi noti di a lowe komoto.

Sani di wi kan leri:

4:7, 8; 8:5, 6; 11:13-15. Wi no musu denki wantewante taki te wan sma e pina, dan a sma dati e koti san a sai, èn taki Gado no feni a sma dati bun.

4:18, 19; 22:2, 3. Te wi e gi sma rai, dan wi no musu du dati akruderi wi eigi denki, ma akruderi Gado Wortu.—2 Timoteyus 3:16.

10:1. Fu di Yob ben e pina so te, meki a no ben denki krin moro, èn na so a no ben prakseri taki wan tra reide ben kan de fu san ede a ben e pina so. Wi no musu kon kisi bita-ati te wi e nyan pina, spesrutu fu di wi sabi soifri taki a sani disi abi fu du nanga a prenspari strei di ben opo kon.

14:7, 13-15; 19:25; 33:24. Awansi sortu tesi Satan e meki wi kisi, na opobaka howpu e yepi wi fu tan hori wi soifri retifasi.

16:5; 19:2. Wi no musu tanteri sma nanga den sani di wi e taki, ma den sani di wi e taki musu gi trawan deki-ati èn krakti.—Odo 18:21.

22:5-7. Te wi e krutu trawan sondro taki wi abi bun buweisi, dan a rai di wi o gi den sa de fu soso, èn a sa meki a sma firi brokosaka.

27:2; 30:20, 21. Wi no abi fu de volmaakti fu man hori wi soifri retifasi. Yob ben e suku fowtu na Gado, aladi a no ben abi leti fu du dati.

27:5. Na Yob wawan ben kan bosroiti gi ensrefi efu a ben o tan hori en soifri retifasi, fu di na te wan sma abi lobi gi Gado, dan fosi a sa man hori en soifri retifasi. Fu dati ede wi musu kon kisi wan tranga lobi gi Yehovah.

28:1-28. Libisma sabi pe den gudu fu grontapu de. Te sma e go suku den gudu dati, dan den sabi fa fu go feni den te na ondro gron, aladi srefi fowru di man si bun fara no man si den presi disi. Ma wan sma e kisi koni fu Gado te a abi frede gi Yehovah.

29:12-15. Wi musu de klariklari fu sori lobi bun-ati na den wan di de na nowtu.

31:1, 9-28. Yob ben de wan bun eksempre gi wi, fu di a no prei nanga den firi fu tra uma, a no du sutadu, a no handri na wan onregtfardiki fasi, noso na wan ogri-ati fasi nanga trawan, a no ben lobi den gudu fu en tumusi, èn a no du afkodrei.

„MI ABI TRUTRU BEROW INI SAKA ÈN ASISI”

(Yob 32:1–42:17)

Wan yonguman, Elihu, di de leti drape, e arki nanga ala pasensi fa den man e haritaki nanga makandra. Now a e opo taki sondro frede. A e piri-ai gi Yob nanga den dri man di e tanteri Yob.

Wantewante baka di Elihu kaba taki, Yehovah e piki den komoto na ini wan bigi winti. A no e fruklari fu san ede Yob e pina. Ma na Almaktiwan e poti wan tu aksi gi Yob, fu meki Yob kon frustan taki A abi bigi krakti nanga bun furu koni. Yob e agri dati a no ben abi leti fu taki den sani di a taki, èn a e taki: „Mi e teki mi wortu baka, èn mi abi trutru berow ini saka èn asisi” (Yob 42:6). Te den tesi fu Yob e kon na wan kaba, dan Gado e blesi en fu di a hori en soifri retifasi.

Piki tapu den aksi fu Bijbel:

32:1-3—O ten Elihu ben doro? Fu di Elihu yere ala den sani di den man taki, meki a musu fu de so taki a ben go sidon krosibei so taki a ben kan yere den. A ben musu de so tu taki Elihu ben de drape kaba, bifo Yob bigin taki, èn na so a tyari wan kaba kon na a pisi ten fu seibi dei di den dri mati fu en ben tan pî.—Yob 3:1, 2.

34:7—Fa Yob ben de leki wan man „di e dringi spotu leki watra”? Di Yob ben brokosaka, dan a ben firi leki den dri fisitiman ben e spotu en, ma fu taki en leti den man disi ben e krutu Gado (Yob 42:7). Sobun, a ben e teki a spotu fu  den man neleki te wan sma e dringi watra nanga ala prisiri.

Sani di wi kan leri:

32:8, 9. Koni no e kon nanga yari nomo. Wan sma koni te a e frustan Gado Wortu èn te a e frustan taki Gado e tiri wi nanga yepi fu en yeye.

34:36. Wi e sori taki wi e tan hori a soifri retifasi fu wi, te wi de klariklari fu ’kisi tesi dorodoro’, awansi na sortu fasi.

35:2. Elihu ben e arki bun, èn a kon frustan krin san ben de a trutru problema, fosi a bigin taki (Yob 10:7; 16:7; 34:5). Bifo Kresten owruman e gi rai, den musu arki bun, den musu kon sabi a tori finifini, èn den musu kon frustan krin san de trutru prenspari ini a tori.—Odo 18:13.

37:14; 38:1–39:30. Te wi e denki dipi fu den wondruwroko fu Yehovah, namku den sani di e sori taki a abi krakti nanga koni, dan dati e meki taki wi sori sakafasi, èn a e yepi wi fu si taki a musu fu kon na krin taki a abi a reti fu tiri ala sani, èn a sani dati de moro prenspari leki iniwan fu wi eigi afersi.—Mateyus 6:9, 10.

40:1-4. Te wi e prakseri fu krutu na Almaktiwan, dan wi musu ’poti wi anu na tapu wi mofo’.

40:15–41:34. A Behemot (wan sortu watrabofru) nanga a Lefiatan (wan bun bigi kaiman), na meti di tranga srefisrefi! Fu man horidoro na ini a diniwroko fu Gado, dan sosrefi wi abi krakti fanowdu fu a Mekiman fu den tranga meti disi, èn En na a sma di e gi wi krakti.—Filipisma 4:13.

42:1-6. Di Yob yere a wortu fu Yehovah, èn di Yehovah memre en na den sani di e sori taki A abi krakti, dan dati yepi Yob fu „si Gado”, noso fu si a waarheid di abi fu du nanga Gado (Yob 19:26). Disi meki taki a kon kisi wan yoisti denki baka. Te wi e kisi piri-ai nanga yepi fu Bijbel, dan wi musu de klariklari fu agri taki wi meki fowtu, èn wi musu du san de fanowdu fu meki sani kon bun baka.

Kon de leki ’Yob di ben horidoro’

A Bijbel buku Yob e sori krin taki a no Gado e meki libisma pina, ma na Satan. Fu di Gado e gi pasi taki ogridu de ete na grontapu, meki wisrefi e kisi na okasi fu sori efu wi e agri taki Yehovah abi a reti fu tiri ala sani, èn wi e kisi na okasi tu fu hori wi soifri retifasi.

Neleki fa a ben de nanga Yob, na so ala den wan di lobi Yehovah o kisi tesi. A tori fu Yob e gi wi na overtoigi taki wi man horidoro. A e memre wi taki wi no sa tan abi den problema fu wi fu têgo. „Unu yere fa Yob ben horidoro èn unu si fa Yehovah meki sani waka”, na so Yakobus 5:11 e taki. Yehovah ben blesi Yob fu di a tan hori en soifri retifasi (Yob 42:10-17). Wi abi wan tumusi moi howpu gi a ten di de na wi fesi, namku têgo libi na ini Paradijs na grontapu! Fu dati ede, meki wi de neleki Yob, iya, meki wi abi a fasti bosroiti fu tan hori wi soifri retifasi.—Hebrewsma 11:6.

[Futuwortu]

[Prenki na tapu bladzijde 16]

San wi kan leri fu a fasi „fa Yob ben horidoro”?