Mkaanem ma Yehova Ma Uma Je

U Ôron Takerada u Yobu Asav-asav

TERTAMEN Yobu lu ken tar u Ushi, ken ningirtar u Arabia. Mbaiserael kpishi lu ken tar u Igipiti hen shighe la. Er Yobu lu Oriserael ga nahan kpa civir Yehova Aôndo. Bibilo ôr kwagh na ér: “Ma or kuma sha a na shin tar ga, ka or u mimi, u perapera, u cian Aôndo, palegh kwaghbo.” (Yobu 1:8) A shi nan kpa Yobu lu uma shighe u Yosev, wan u Yakob kpe kera, Mose di lu a hingir profeti ga la. Yosev man Mose lu mbatomov mba Yehova mba lun a inja.

A shi nan kpa, Mose u i hen ér ka un a nger takerada u Yobu la yange fa kwagh u Yobu shighe u tsa anyom 40 ken Midian, ikyua a tar u Ushi la. Shighe u anyom 40 a Mbaiserael lu zenden ken taaikyôngo la zulum u been yô, ve mgbôghom a tar u Ushi la, nahan alaghga lu hen shighe la Mose mase ungwan kwagh u Yobu er shighe u bee iyol la ye. * I nger kwagh u Yobu doo kpen kpen. I nger takerada u Yobu ér u doo u ôron tseegh tsô ga. U na mbamlumun sha mbampin mba ior ka ve shi pinen la, ér: Er nan ior mba dedoo ve ye icana? Er nan Yehova a ne ican i yan iana? Uumace vea kôr cio u civir Aôndo sha mimi kpa? Mkaanem ma Aôndo a ne i nger ken takerada u Yobu ne ma uma je, nyian kpa ma tema gbilin ga.—Mbaheberu 4:12.

“IYANGE I I MAREM LA, I̱ SAA ISHE”

(Yobu 1:1–3:26)

Iyange igen yô, Satan gba ahon sha jighjigh u nan u Yobu sha ishigh ki Aôndo. Nahan Yehova na un ian ér a er Yobu atsan kposo kposo. Er Yobu ya atsan nahan kpa, “venda Aôndo” ga.—Yobu 2:9.

Akar a Yobu atar va u va ‘surun un ishima.’ (Yobu 2:11) Ve va tema a Yobu ving, ve gbaa kenger un tsô, nahan gande Yobu tsô a kende a kaa ér: “Iyange i i marem la, i̱ saa ishe.” (Yobu 3:3) Lu Yobu ken ishima er ma un lu “er anikyundanev mba ve nenge a iwanger ga,” shin er wan u i mar kpenegh nahan.—Yobu 3:11, 16.

Mbamlumun sha Mbampin mba sha Akaa a ken Ruamabera:

1:4—Ônov mba Yobu yange ve umbur ayange a mara? Ei, ve umbur ga. Ken zwa u i hii ngeren Bibilo ker la yô, inja i ishemberti i “iyange” la ngi kposo a “iyangemar.” (Genese 40:20) Ishemberti i “iyange” i̱ í ter ken Yobu 1:4 la tese shighe u iyange ka i due sha tembe zan zan i̱ kar za miren la. A shi nan kpa, hanma inyom yô ônov mba Yobu eren iniongo i tsombor ayange ataankarahar. Nahan hanma or ia gba sha “iyange i nan” yô, ve kumba hen ya u nan.

1:6; 2:1—Ka unô i na ve ian i van sha ishigh ki Yehova? Lu Wan Na u môm môm, u a lu Imo la man mbatyomov mba jighjigh kua mbatyomov mba hembanato mba ve lu ‘ônov mba Aôndo’ la man Satan Diabolo. (Yohane 1:1, 18) Satan man azôv a na lu sha zan zan i va zenda ve shighe u i ver Tartor ú Aôndo sha, ken inyom i 1914 la. (Mpase 12:1–12) Yehova yange na Satan man azôv a na ian ér ve va sha ishigh nagh nahan a pase ahon a Satan gba la man mzeyol u kwagh la va a mi la kpaa.

1:7; 2:2—Yehova yange lam a Satan Jighilii? Bibilo pase se vie vie er Yehova a lamen a mbatyomov ga. Nahan kpa, profeti Mikaia yange nenge a ortyom lu lamen a Yehova jighilii ken mpase u sha mnenge. (1 Utor 22:14, 19–23) Nahan ka inja er Yehova yange tindi or môm ér nana lam a Satan sha ci na ga nahan.

1:21—Yobu hide ken ‘iyav mbu ngô’ na nena? Yehova yange gba or “sha vuulevu u inyaagh,” nahan ishemberti i ‘ngô’ i̱ í tér heen ne tese ér ka inya.—Genese 2:7.

2:9—Ishima yange i lu kwase u Yobu ker zum u a kaa a nom na ér a venda Aôndo la nena? Akaa a yange saa Yobu ve kôr un iyol la, a kôr kwase na kpa iyol tsung je. Shi yange ishima ia vihi un kpishi sha bouange u kôr nom na u vande lun gbon gbon la. Heela tseegh ga, ônov nav mba doon un ishima kpa kpe kera. Nahan akaa a vihin a a ta sha a na ne za un iyol tsung je yô, kera fatyô u veren  ishima sha mlu ve a Aôndo, u a hembe lun kwagh u injaa la ga.

Ityesen hen Avese:

1:8-11; 2:3-5. Kwagh u Yobu ne tese ér dugh ieren i mimi man iliam injaa sha kpa gba u awashima wase u civir Yehova una lu vough ve se civir un sha mimi ye.

1:21, 22. Aluer se mba civir Yehova sha mimi shighe u i kpe se iyol man shighe u uma a taver se kpaa yô, se tese ser Satan ka oraie.—Anzaakaa 27:11.

2:9, 10. Aluer tsombor wase nenge ér se mba civir Aôndo ka gbilin tsô shin aluer mba eren se akaa a aa na ve jighjigh wase una vôr je kpa se tile dông er Yobu nahan.

2:13. Akar a Yobu yange ôr kwagh u injaa sha iyol i Aôndo man uityendezwa nav ga, sha ci u mhen ve kaha kposo a u Aôndo.

“ME GBIHI MIMI WAM GA”

(Yobu 4:1–31:40)

Kwagh u vesen u akar a Yobu a atar la ôr a na yô ér a er kwaghbo, ka nahan ve Aôndo a tsaha un ye. Lu Elifasa je hemen gbenda ye. Bildadi maa dondo, lam nyoon kpishi. Sofar je yô hemba lamen vihin cii.

Yobu yange lumun a mbamhen mba kpeegh mba akar a na lu ôron un la ga. Nahan kpa er un iyol na fa ityôkyaa jighilii i Aôndo de ér ican i er un ga yô, kwagh hemba gban un u keren ishô. Kpa Aôndo doo Yobu ishima, nahan a kaa wener: “Zan zan me kpe je kpaa, me gbihi mimi wam ga”!—Yobu 27:5.

Mbamlumun sha Mbampin mba sha Akaa a ken Ruamabera:

7:1; 14:14 —Inja i ishember i “tom u sha ican” (NW) man i “mnenge u sha ican” la ér nyi? Yobu yange ya ican tsung je yô tôô wener uma ngu inja er ka tom u sha ican nahan. (Yobu 10:17; nenge ngeren u shin kpe u NW la) Er ka i lu ishima i or u tsan shin Sheol—hii shighe u nan kpe la zan zan shighe u a va nder nan la ga yô, Yobu yila shighe la ér “mnenge u sha ican.”

7:9, 10; 10:21; 16:22—Kwagh u Yobu a er ken avur ne ne tese ér a na jighjigh a mnder u shin ku ga shinii? Ei, Yobu lu ôron kwagh u ica a gba ga tsô una er un yô. Nahan Yobu lu ôron ér nyi jimi? Alaghga lu ôron ér aluer un kpe yô, or môm ken mbakov na nana kera nenge a na ga. Sha mhen ve yô, una kera hide hen ya na ga, shi una kera fa ma kwagh kpaa ga zan zan shighe u Aôndo a ver la una kar kuman. Shi alaghga Yobu lu kaan ér or môm kpa nana fatyô u duen shin Sheol sha tahav mbu nan ga. I pase ishimaveren i Yobu lu a mi ér ka va nderen mbakpenev la wang ken Yobu 14:13–15.

10:10—‘Yehova yange haa Yobu er atumbabua shi ta un ijen er atumbabua a kôrough nahan nena?’ Yobu yange ôr kwaghôron u sha ikyav ne sha u pasen gbenda u yange i jile un ken iyav mbu ngô na yô.

19:20—Yobu yange lu ôron ér nyi shighe u kaa ér “m war a kwav anyii wam tseegh” (NW) laa? (Yobu 19:20) Kwagh u Yobu kaa ér un war a kwav u kwagh u a shi nan kpa a lu a kwav ga la tese ér, alaghga tsô yange lu kaan ér un war a kwagh môm môm ga.

Ityesen hen Avese:

4:7, 8; 8:5,6; 11:13-15. Mayange je, se gba nan or ibo gagher tsô ser ka akaa a bo a nan er la a ne ve nan lu yan ican ga, shi se kaa ser Aôndo ta nan kera ga.

4:4:18, 19; 22:2, 3. Aluer se mba wan or kwagh yô, kwaghwan wase la a har sha Mkaanem ma Aôndo, i de lu sha mhen wase ga.—2 Timoteu 3:16.

10:1. Ishima yange i vihi Yobu ker je kera fatyô u henen sha akaa agen a a ne ve un lu yan ican ga. Se yô, se fa ityôkyaa jighilii i i ne ve se lu yan ican yô, nahan aluer se mba yan ican kpa se vihi ishima ga.

14:7, 13-15; 19:25; 33:24. Nyityô ikyaren i Satan a ve se a mi cii, ishimaverenkeghen i mnder u shin ku la ia taver se ishima.

16:5; 19:2. Doo u se ôron akaa a a na mbagenev ishimavihin ga, kpa i lu akaa a a taver ve a taver asema yô.—Anzaakaa 18:21.

22:5–7. Aluer se ungwa kwagh sha iyol i or man se tôv sha mi ga maa se gba mi wan nan kwagh yô, a lu sha mi ga, shi kwagh la una va a mzeyol.

27:2; 30:20, 21. Saa se lu vough keng ve se civir Aôndo sha mimi ga. Yobu yange war Aôndo sha lan.

27:5. Yobu yange una soo yô ma gbihi mimi na kera, sha ci u ka mdoo u Aôndo ka a doo or ishima la ka a mgbegha nan ve nan civir un sha mimi ye. Nahan Yehova a doo se ishima tsung.

28:1-28. Ior fa pe akaa a injaa a shin tar ne a lu  yô. Nahan ka vea soo u zuan a mi yô, mfe u ve lu a mi la a wase ve ve ker a ve yem shin atô u inyaagh, ape inyon i ka i nenge a kwagh ica je kpa ia fatyô u nengen ga yô. Nahan kpa, kwaghfan u Aôndo yô, or nana zua a mi sha u cian Yehova.

29:12-15. Doo u se eren erdoo a mba ve lu ken ibanave la.

31:1, 9-28. Yobu yange hian a kasev dang dang shin eren idya shin tswamen ior ga, shi zendan inyaregh ityô shin civir akombo kpaa ga.

“M ZAMBER KEN VUULEVU KUA KEN MTWE”

(Yobu 32:1–42:17)

Gumor Elihu tema ving lu ungwan er akar a Yobu lu lamen a na dang yô. Ka va kom un yô, a ôr kwagh a kôôm Yobu man akar a na.

Elihu been a bee kwaghôron nahan, Yehova, Uhembanagee ôr kwagh ken hiar, pase ityôkyaa i i ne ve Yobu a lu yan ican ga, kpa gema pine mbampin kpishi sha u wasen Yobu a fa er Un hembe agee kua kwaghfan yô. Yobu lumun ér un er kwagh sha lan, nahan a kaa wener: “M laha iyol yam, m zamber ken vuulevu kua ken mtwe.” (Yobu 42:6) Atsan a Yobu nga been yô, i ver un doo doo sha ci u mtil sha mimi na la.

Mbamlumun sha Mbampin mba sha Akaa a ken Ruamabera:

32:1-3—Elihu yange va ape akar a Yobu lu lamen a na la hanma shighe? Elihu ungwa hanma kwagh u Yobu man akar a na ôr cii, nahan alaghga vande teman ikyua cii ve Yobu man akar na a yange tema ving ayange ataankarahar hii u ôron kwagh ye.—Yobu 3:1, 2.

34:7—Yobu lu er or u nan ‘me tarnahan er mngerem’ nahan nena? Er Yobu lu ken ican man fa ér ka Aôndo jighilii akar a na a lu lamen sha na dang nahan kpa, a tôô ér ka un jighilii ve lu lamen sha na dang ye. (Yobu 42:7) Nahan lu inja er lu man tarnahan er or ka nan ma mngerem a ahan zwa nahan.

Ityesen hen Avese:

32:8, 9. Or nana gba lun a kwaghfan sha ci u nan ngu igyandenor yum ga. Kpa cii man nana zua a kwaghfan yô, gba u nana kav Mkaanem ma Aôndo shi nana lumun ér jijingi na a hemen nan.

34:36. Ka shighe u “i kar” se kpoghuloo sha igbenda kposo kposo la a fa ér se mba civir Aôndo sha mimi ye.

35:2. Elihu yange kegh ato a Yobu man akar a na, fa ityôkwagh jighilii cii ve mase ôron kwagh ye. (Yobu 10:7; 16:7; 34:5) Mbatamen kpa gba u vea kegh ato vea ungwa kwagh u a er la, vea fa mimi u kwagh shon man er i hii ve kwagh shon a er la cii ve vea mase wan or kwagh ye.—Anzaakaa 18:13.

37:14; 38:1–39:30. Aluer se mba gbidyen kwar sha akaa a kpilighyol a Yehova a er sha tahav nav man kwaghfan na yô, kwagh la una wase se u hiden a iyol ijime, nahan se fa ser kwagh u a hembe lun u vesen u se er yô, ka u se vanden keren akaa a a gbe se ishima la ga, kpa ka u suen mtemtor u Yehova.—Mateu 6:9, 10.

40:1-4. Aluer ishima mgbegha se u waren Uhembanagee yô, ‘se wa uwegh zwa.’

40:15–41:34. Normnger man Leviatan (ambe) ngu a agee kpen kpen! Se kpa aluer se soo ser se er Aôndo tom a ishima i taver yô, gba u Aôndo u a gbe inyam i i lu a agee kpishi ne una na se agee.—Mbafiliti 4:13.

42:1-6. Er Yobu ungwa mkaanem ma Yehova shi er i umbur un akaa a Aôndo a er sha agee a na la yô, kwagh ne wase un “nenge a Aôndo” shin fa mimi sha kwagh u Aôndo. (Yobu 19:26) Kwagh ne yange kôôm mhen na. Se kpa zum u i yar tom a Ruamabera sha u kôôm se yô, se lumun ibo a ishima i môm shi se sôr inja yase kpaa.

‘Taver ishima’ er Yobu nahan

Takerada u Yobu pase wanger wanger ér ka Aôndo a ne ve uumace ve lu yan ican ga, kpa ka Satan. Mde u Yehova a de uumace ve lu yan ican ne na hanma wase ian i tesen ér se tsua ser se sue mtemtor u Yehova shi se civir un sha mimi kpaa.

Hanma or u nan civir Yehova cii, a kar nan er Yobu nahan. Ikyav i Yobu la na se vangertiôr ér se kpaa se fatyô u wan ishima. Shi i̱ umbur se ér mbamzeyol asev vea tsôr ga. Yakobu 5:11 kaa ér: “Ne ungwa er Yobu a taver ishima yô, man shi ne nenge mkur u Ter kure kwagh na yô.” Yobu yange civir Yehova sha mimi, nahan Yehova ver un doo doo. (Yobu 42:10–17) Se mba a ishimaverenkeghen i hemban cii i va zuan a uma u tsôron ken Paradiso shin tar. Nahan se taver nen ishima se civir nen Aôndo sha mimi er Yobu nahan.—Mbaheberu 11:6.

[Footnote]