An Pulong ni Jehova Buhi

Importante nga mga Punto Tikang ha Libro han Job

AN PATRIARKA nga hi Job nag-uukoy ha tuna han Uz, nga ha Arabia na yana. Damu nga Israelita an nag-uukoy ha Ehipto hito nga panahon. Bisan kon diri hiya mismo Israelita, hi Job magsiringba ni Jehova nga Dios. Mahitungod ha iya, an Biblia nasiring: “Waray lain nga pariho ha iya dida ha tuna, usa nga hingpit ngan maligdong nga tawo, usa nga nahadlok han Dios, ngan natalikod han karaotan.” (Job 1:8) Sigurado nga ito an peryodo ha butnga han duha nga maopay hinduro nga mga surugoon ni Jehova—an anak ni Jakob nga hi Jose ngan an propeta nga hi Moises.

Hi Moises nga ginhuhunahuna nga amo an nagsurat han libro han Job, posible nga nahibaro mahitungod ha iya han nag-ukoy hiya hin 40 ka tuig ha Midian, nga hirani ha tuna han Uz. Bangin hinbatian ni Moises an mahitungod han ultimo nga mga tuig ni Job han an mga Israelita hirani ha Uz, han tikatarapos na an ira 40-ka-tuig nga temporaryo nga pag-ukoy ha kamingawan. * Maopay hinduro an pagkasurat han eksperyensya ni Job salit an asoy gintagad sugad nga usa nga obra maestra ha literatura. Kondi, labaw pa hito, ginbabaton hito an mga pakiana sugad han: Kay ano nga nag-aantos an mag-opay nga mga tawo? Kay ano nga gintutugotan ni Jehova nga mag-eksister an karaotan? Mahimo ba matipigan han diri-hingpit nga mga tawo an ira integridad ha Dios? Sugad nga bahin han giniyahan nga Pulong han Dios, an mensahe han libro han Job buhi ngan gamhanan bisan yana nga panahon.—Hebreo 4:12.

“MAHANAW UNTA AN ADLAW NGA AKON NATAWOHAN”

(Job 1:1–3:26)

Usa ka adlaw gin-ayat ni Satanas an integridad ni Job ha Dios. Ginkarawat ni Jehova an ayat ngan gintugotan niya hi Satanas nga tagan hi Job hin sunod-sunod nga kalamidad. Kondi, nagdumiri hi Job nga “isalikway an Dios.”—Job 2:9.

Inabot an tulo nga kasangkayan ni Job ha “pagtangis ha iya.” (Job 2:11) Nagliningkod hira upod niya nga waray yakan-yakan tubtob nga hi Job nagsiring: “Mahanaw unta an adlaw nga akon natawohan.” (Job 3:3) Ginhingyap niya nga magin “sugad han kabataan nga waray magpakakita hin kapawa,” o patay na han natawo.—Job 3:11, 16.

Mga Baton ha mga Pakiana Mahitungod ha Kasuratan:

1:4—An mga anak ba ni Job nagsasaurog hin mga kompleanyo? Diri. An mga pulong ha orihinal nga yinaknan para ha “adlaw” ngan “kompleanyo” magkaiba, naiiba an kahulogan han kada tagsa. (Genesis 40:20) Ha Job 1:4, an pulong nga “adlaw” an ginamit, nagpapasabot hin kahilawig han panahon tikang ha pagsirang ngadto ha pagtunod han adlaw. An pito nga anak nga kalalakin-an ni Job matin-aw nga nagkakaada hin pito-ka-adlaw nga panagtawo han pamilya makausa ha kada tuig. Samtang iginpapasa-pasa an turno, an tagsa nga anak amo an nagdudumara han panagtawo nga pagbubuhaton ha iya balay kon iya na toka.

1:6; 2:1—Hin-o an gintutugotan nga kumadto ha atubangan ni Jehova? Kaupod hadton tinindog ha atubangan ni Jehova amo an bugtong nga Anak han Dios, nga amo an Pulong; an matinumanon nga mga anghel; ngan an matinalapasnon nga mga anghel nga ‘anak han Dios,’ upod na hi Satanas nga Yawa. (Juan 1:1, 18) Hira Satanas ngan an iya mga demonyo ginpaiwas ha langit waray pag-iha katapos maestablisar an Ginhadian han Dios han 1914. (Pahayag 12:1-12) Pinaagi ha pagtugot ha ira nga umatubang ha iya, iginpresenta ni Jehova ha ngatanan nga espiritu nga linarang an ayat ni Satanas ngan an mga isyu nga iginbangon hito.

 1:7; 2:2—Direkta ba nga nakig-istorya hi Jehova kan Satanas? An Biblia waray maghatag hin damu nga detalye mahitungod ha kon paonan-o hi Jehova nakikigkomunikar ha espiritu nga mga linarang. Kondi, an propeta nga hi Mikaya nagkaada bisyon diin iya nakita an usa nga anghel nga direkta nga nakikig-istorya kan Jehova. (1 Hadi 22:14, 19-23) Salit, baga hin matin-aw nga nakig-istorya hi Jehova kan Satanas nga waray representante.

1:21—Ha ano nga paagi hi Job makakabalik ha “tiyan han [iya] iroy”? Tungod kay hi Jehova nga Dios naghimo han tawo “tikang ha tapotapo han tuna,” an termino nga “iroy” simboliko nga ginamit dinhi ha pagtudlok han tuna.—Genesis 2:7.

2:9—Ano an bangin kahimtang han hunahuna han asawa ni Job han ginsidngan niya an iya bana nga isalikway an Dios ngan mamatay? An asawa ni Job nag-antos hin kawad-i sugad han iya bana. Sigurado nga nakapasubo gud ha iya nga makita nga an iya bana nga makusog hadto nag-aantos yana hin makangingirhat nga sakit. Namatayan hiya han iya hinigugma nga mga anak. Bangin duro nga nasubo hiya tungod hini ngatanan salit nahingalimtan niya kon ano gud an importante—an ira relasyon ha Dios.

Mga Leksyon Para ha Aton:

1:8-11; 2:3-5. Sugad han ipinakita ha kahimtang ni Job, gawas pa han husto nga buhat ngan pagyakan, an integridad nagkikinahanglan han husto nga motibo ha pag-alagad kan Jehova.

1:21, 22. Pinaagi ha pagpabilin nga maunungon kan Jehova durante ha maopay sugad man ha diri-maopay nga mga kahimtang, mapapamatud-an naton nga hi Satanas buwaon.—Proberbios 27:11.

2:9, 10. Pariho kan Job, sadang kita magpabilin nga marig-on ha pagtoo bisan kon an mga membro han pamilya diri nagpapabili han aton espirituwal nga mga tumong o nag-iipit ha aton nga magkompromiso o magsalikway han aton pagtoo.

2:13. An kasangkayan ni Job waray naisiring nga nakakaliaw mahitungod ha Dios ngan ha iya mga saad tungod kay waray hira espirituwalidad.

“DIRI KO WAWAD-ON TIKANG HA AKON AN AKON INTEGRIDAD!”

(Job 4:1–31:40)

Makikita ha mga pamulong han tulo nga kasangkayan ni Job an nangunguna nga punto nga hi Job sigurado nga may-ada ginbuhat nga duro karaot salit naieksperyensyahan niya an sugad kabug-at nga sirot han Dios. Hi Elipas an nag-una. Sinundan hiya ni Bildad nga naggamit hin mga pulong nga mas nakakainsulto. Mas nagpapakaraot pa gud an mga pulong ni Sopar.

Waray karawata ni Job an buwa nga pangatadongan han iya mga bisita. Tungod kay diri niya masabtan kon kay ano nga gintugotan han Dios nga mag-antos hiya, nagin sobra kainteresado hiya nga pakamatadungon an iya kalugaringon. Bisan pa hito, hinigugma ni Job an Dios ngan nagsiring: “Tubtob nga ako mamatay diri ko wawad-on tikang ha akon an akon integridad!”—Job 27:5, NW.

Mga Baton ha mga Pakiana Mahitungod ha Kasuratan:

7:1, NW; 14:14, NW—Ano an karuyag sidngon han “pinirit nga pagtrabaho” o “pinirit nga pagserbisyo”? Duro gud an pag-antos ni Job salit ginhunahuna niya an kinabuhi sugad nga makuri ngan maguol nga pinirit nga pagtrabaho. (Job 10:17) Tungod kay an panahon nga ginagasto ha Sheol—tikang ha panahon nga namatay an usa nga tawo tubtob ha pagkabanhaw—usa ka pinirit nga peryodo, iginpariho ni Job ito nga panahon ha pinirit nga pagserbisyo.

7:9, 10; 10:21; 16:22—Iginpapakita ba hini nga mga pulong nga hi Job diri natoo ha pagkabanhaw? Mga komento ini mahitungod han hirani na nga tidaraon ni Job. Kon sugad, ano an karuyag niya ipasabot? An usa nga posibilidad amo nga kon mamamatay hiya, diri na hiya makikita han bisan hin-o han iya mga kadungan-dungan. Ha ira panhunahuna diri na hiya mabalik ha iya balay o diri na hahatagan pa hin dugang nga pagtagad tubtob nga umabot an itinanda nga panahon han Dios. Bangin iginpapasabot liwat ni Job nga waray bisan usa nga makakalugaring pagbalik tikang ha Sheol. An punto nga hi Job naglalaom ha pagkabanhaw ha tidaraon matin-aw nga makikita ha Job 14:13-15.

10:10—Paonan-o ni Jehova ‘ginhuwad hi Job sugad hin gatas, ngan ginpabagtik hiya sugad hin kiso’? Sugad-siday ini nga paghulagway mahitungod ha kon paonan-o naporma hi Job ha tagoangkan han iya iroy.

19:20, NW—Ano an karuyag ipasabot ni Job ha mga pulong nga “ako nakapalagiw nga sugad la han panit han akon mga ngipon”? Ha pagsiring nga hiya nakapalagiw nga sugad la han panit  hin butang nga matin-aw nga waray panit, bangin karuyag sidngon ni Job nga hiya nakapalagiw nga haros waray hin bisan ano.

Mga Leksyon Para ha Aton:

4:7, 8; 8:5, 6; 11:13-15. Kinahanglan diri kita maghunahuna dayon nga an tawo nga nasasakit nag-aani han iya iginpugas ngan waray han pag-uyon han Dios.

4:18, 19; 22:2, 3. An aton sagdon sadang ibasar ha Pulong han Dios, diri ha aton personal nga opinyon.—2 Timoteo 3:16.

10:1. An duro nga kasubo ni Job nakagupong ha iya, salit waray niya mahunahuna an iba nga posible nga mga hinungdan han iya pag-antos. Kinahanglan diri kita masubo hinduro kon nag-aantos kita, labi na kay may-ada kita matin-aw nga pagsabot han mga isyu nga nahidadabi.

14:7, 13-15; 19:25; 33:24. Durante han bisan ano nga pagsari nga bangin pahinaboon ni Satanas ha aton, an paglaom ha pagkabanhaw makakaparig-on ha aton.

16:5; 19:2. An aton mga pulong sadang makadasig ngan makaparig-on ha iba, diri makapaaringit ha ira.—Proberbios 18:21.

22:5-7. An pagsagdon tungod han mga akusasyon nga waray marig-on nga ebidensya waray pulos ngan nakakadaot.

27:2; 30:20, 21. Diri kinahanglan magin hingpit basi matipigan an integridad. Nagsayop hi Job ha pagsiring nga nagsayop an Dios.

27:5. Hi Job la an makakawara han iya integridad tungod kay an integridad nadepende ha gugma han usa ha Dios. Salit sadang naton kultibaron an hilarom nga gugma kan Jehova.

28:1-28. Maaram an tawo kon diin nahimumutang an mga bahandi han tuna. Samtang ginbibiling niya ito, iya ginagamit an iya kaabtik ha paghimo hin mga agian ha ilarom han tuna nga diri mahimo makita han hirayo-an-nakikita nga paradagit nga tamsi. Kondi, an diosnon nga kinaadman resulta han kahadlok kan Jehova.

29:12-15. Kinahanglan kinaburut-on kita nga magpakita hin mahigugmaon-nga-pagkabuotan ha mga nanginginahanglan.

31:1, 9-28. Naghatag hi Job hin susbaranan ha aton tungod kay naglikay hiya ha pagpikat, pag-adulteryo, pagin diri-makatadunganon ngan diri-maloloy-on ha pagtrato ha iba, materyalismo, ngan idolatriya.

‘AKO NAGBABASOL HA TAPOTAPO NGAN HA MGA AGBON’

(Job 32:1–42:17)

An usa nga batan-on nga nakadto la ha ligid nga hi Elihu, mapailubon nga nagpipinamati ha paglantugi. Yana nagyakan na hiya. Iya ginsaway hi Job ngan an tulo nga nagpapasakit ha iya.

Han natapos hi Elihu, binaton dayon hi Jehova pinaagi hin alipuros nga hangin. Waray niya isaysay kon kay ano nga nag-aantos hi Job. Kondi pinaagi hin sunod-sunod nga pakiana, ginbuligan hi Job han Makagarahum-ha-ngatanan nga hibaroan an Iya makatarag-ob nga gahum ngan daku nga kinaadman. Ginkarawat ni Job nga nagyakan hiya nga waray sarabotan ngan nagsiring: “Nangangalas ako ha akon ngahaw, ngan nagbabasol ha tapotapo ngan ha mga agbon.” (Job 42:6) Han natapos an pagsari kan Job, ginbalosan an iya integridad.

Mga Baton ha mga Pakiana Mahitungod ha Kasuratan:

32:1-3—Kakan-o inabot hi Elihu? Tungod kay hinbatian ni Elihu an ngatanan nga mga iginyakan, sigurado nga liningkod na hiya ha hirani antes pa nagyakan hi Job ha pagtapos han pito-ka-adlaw nga diri pagyakan-yakan han iya tulo nga kasangkayan.—Job 3:1, 2.

34:7—Paonan-o hi Job pariho hin tawo “nga nainom hin pagyubit sugad hin tubig”? Ha iya makasurubo nga kahimtang, posible nga paghunahunaon ni Job nga hiya an ginyuyubit han iya tulo nga bisita, bisan kon ha tinuod nagyayakan hira kontra ha Dios. (Job 42:7) Salit, kinakarawat niya an pagyubit pariho hin tawo nga malipayon nga nainom hin tubig.

 Mga Leksyon Para ha Aton:

32:8, 9. An kinaadman diri kay resulta la han pagin hamtong ha edad. Nagkikinahanglan ito hin pagsabot ha Pulong han Dios ngan han giya han iya espiritu.

34:36. An integridad napapamatud-an kon kita ‘sinasarihan ngada ha kataposan’ ha iba-iba nga paagi.

35:2. Hi Elihu namati hin maopay ngan nahibaro han totoo nga isyu antes hiya magyakan. (Job 10:7; 16:7; 34:5) Antes magsagdon, an Kristiano nga mga tigurang kinahanglan mamati hin maopay, mag-usisa han mga kahimtang, ngan sabuton hin matin-aw an importante nga mga isyu nga may kalabotan hito.—Proberbios 18:13.

37:14; 38:1–39:30. An pagpamalandong ha urusahon nga mga buhat ni Jehova—mga kapahayagan han iya gahum ngan kinaadman—nakakabulig ha aton nga magpaubos ngan masabtan nga an pagbindikar han iya pagkasoberano mas importante kay ha bisan ano nga aton personal nga mga interes.—Mateo 6:9, 10.

40:1-4. Kon nahihilig kita ha pagreklamo kontra ha Makagarahum-ha-ngatanan, sadang naton ‘ibutang an aton kamot ha aton baba.’

40:15–41:34. Makusog gud an Behemot (hipopotamus) ngan an Lebiatan (buaya)! Basi makapadayon ha pag-alagad ha Dios, ginkikinahanglan liwat naton an kusog tikang ha Maglalarang hinin magkusog nga mga hayop, nga naghahatag ha aton hin kusog.—Filipos 4:13.

42:1-6. An pagpamati ha pulong ni Jehova ngan pagin napahinumdoman han kapahayagan han iya gahum nakabulig kan Job nga “makita an Dios,” o masabtan an kamatuoran mahitungod ha iya. (Job 19:26) Nagtadong ini han iya panhunahuna. Kon nakarawat kita hin pagsaway tikang ha Biblia, sadang kita maikag ha pagkarawat han aton sayop ngan ha paghimo hin mga pagbag-o.

Kultibara an “Pag-ilob ni Job”

Matin-aw nga ipinapakita han libro han Job nga diri an Dios an angay basulon ha pag-antos han tawo. Hi Satanas an hinungdan hito. An kanan Dios pagtugot hin karaotan ha tuna naghahatag ha aton hin oportunidad ha paghatag hin personal nga baton may kalabotan ha aton disposisyon mahitungod ha mga isyu han pagkasoberano ni Jehova ngan han aton integridad.

Pariho kan Job, an ngatanan nga nahigugma kan Jehova sasarihan. An asoy mahitungod kan Job nagpapasarig ha aton nga mahimo kita makailob. Ginpapahinumdoman kita hito nga an aton mga problema diri magpapadayon ha waray kataposan. “Iyo hinbatian an pag-ilob ni Job, ngan nakita an kataposan nga pagbuhat han Ginoo,” siring han Jakobo 5:11. Ginbalosan ni Jehova hi Job tungod han iya pagtipig han integridad. (Job 42:10-17) Maopay gud nga paglaom an naghuhulat ha aton—kinabuhi nga waray kataposan ha Paraiso ha tuna! Salit pariho kan Job, magin determinado kita ha pagtipig han aton integridad.—Hebreo 11:6.

[Footnote]

[Mga Retrato ha pahina 16]

Ano an aton mahibabaroan ha pag-ilob ni Job?