Ko He ʼu Puani ʼAoga ʼo Te Tohi ʼa Sopo
ʼE Maʼuli Te Folafola ʼa Sehova
Ko He ʼu Puani ʼAoga ʼo Te Tohi ʼa Sopo
NEʼE nofo te pateliaka ko Sopo ʼi te fenua ko Usa, ʼi te temi nei ko te fenua ko Alapi. Neʼe kaugamālie te kau Iselaele neʼe māʼuʼuli ʼi te fenua ko Esipito ʼi te temi ʼaia. Logola ko Sopo neʼe mole ko he tagata Iselaele, kae neʼe ko te tagata neʼe atolasio kiā Sehova ʼAtua. ʼO ʼuhiga mo te tagata ʼaia, ʼe ʼui fēnei ʼi te Tohi-Tapu: “ ʼE mole he tahi ʼe tatau mo ia ʼi te kele, ko te tagata ʼe mole hana lākahala pea ʼe totonu ia, ʼe manavasiʼi ki te ʼAtua pea mo fakatafa mai te kovi.” (Sopo 1:8) ʼE lagi ko te temi ʼaē neʼe vaha ʼi te temi maʼuli ʼo te ʼu kaugana maʼuhiga e lua ʼa Sehova—te foha ʼo Sakopo ko Sosefo mo te polofeta ko Moisese.
Ko Moisese, ʼaē ʼe lau ko ia ʼaē neʼe ina tohi te tohi ʼa Sopo, neʼe lagi mālama kiā Sopo ʼi te temi ʼaē neʼe nofo ai iā taʼu e 40 ʼi Matiane, ʼaē neʼe tuʼu ōvi ki Usa. Neʼe lagi logo ia Moisese ki te ʼu taʼu fakaʼosi ʼo Sopo, ʼi te temi ʼaē neʼe kua fakaōvi ai ia te kau Iselaele ki Usa, ʼi te fakaʼosiʼosi ʼo te ʼu taʼu e 40 ʼo tanatou nonofo ʼi te toafa. * Neʼe lelei ʼaupito te fakamatala ʼo te maʼuli ʼo Sopo, ʼo ʼui ai e te tagata fai tuketuke ʼiloa ʼo ʼuhiga mo te tohi ʼaia “ ʼe ko te palalau fakatuketuke maʼuhiga tokotahi ʼo te temi muʼa pea mo te temi nei.” Kae ʼe mole ko he fakamatala ʼe mālie pe ki te lautohi. ʼE maʼu ai te ʼu tali ki te ʼu fehuʼi ohage la: Pe koʼe ʼe maʼuli mamahi te hahaʼi agalelei? Pe koʼe ʼe tali e Sehova ke ʼi ai te agakovi? ʼE feala koa ki te tagata heʼe haohaoa ke nofo agatonu ki te ʼAtua? Ko te logo ʼaē ʼe tuʼu ʼi te koga tohi ʼaia ʼo te Folafola ʼa te ʼAtua, te tohi ʼa Sopo, ʼe maʼuli pea ʼe kei mālohi aipe ʼi te temi nei.—Hepeleo 4:12.
“KE PULINOA TE ʼAHO ʼAĒ NEʼE AU TUPU AI”
ʼI te tahi ʼaho neʼe fakafihiʼi e Satana ia te agatonu ʼa Sopo iā muʼa ʼo te ʼAtua. Neʼe tali e Sehova ke ʼahiʼahiʼi te agatonu ʼa Sopo ʼo ina fakagafua ai kiā Satana ke ina fakahoko he ʼu malaʼia kiā Sopo. Kae neʼe fakafisi ia Sopo ki te ‘laukoviʼi ʼo te ʼAtua.’—Sopo 2:9.
Neʼe ʼolo age kiā Sopo tona ʼu kaumeʼa e toko tolu ke nātou “mamahi fakatahi mo ia.” (Sopo 2:11) Neʼe nātou heheka tahi mo ia, ʼo mole nātou fai he palalau ʼo aʼu ki te fakagata e Sopo tana nofo fakalogologo ʼo ina ʼui fēnei: “Ke pulinoa te ʼaho ʼaē neʼe au tupu ai.” (Sopo 3:3) Neʼe ina fakaʼamu ke “hage ko te ʼu fānau ʼaē ʼe mole heʼeki nātou sisio ki te mālama,” ʼaē ʼe faka ʼuhiga ki te ʼu fānau ʼe mole heʼeki tutupu.—Sopo 3:11, 16.
Te ʼu Tali Ki Te ʼu Fehuʼi Faka Tohi-Tapu:
1:4—Neʼe fai koa e te fānau ʼa Sopo ia te ʼu ʼaho tupu? Kailoa ia. ʼI te lea faka Hepeleo, ʼe kehekehe te ʼu kupuʼi palalau ki te “ ʼaho” pea mo te “ ʼaho tupu,” pea ʼe mole tatau tonā faka ʼuhiga. (Senesi 40:20) Iā Sopo 1:4, neʼe fakaʼaogaʼi te kupu “ ʼaho” moʼo fakahā te temi ʼaē neʼe vaha ʼi te tō ʼo te laʼā ʼo aʼu ki te hopo ake ʼo te laʼā. ʼE ʼiloga ia neʼe fai e te ʼu foha e toko fitu ʼo Sopo tanatou fono faka famili neʼe fai tuʼa tahi ʼi te taʼu lolotoga ʼaho e fitu. Ko te ʼu foha ʼaia neʼe nātou “takitahi tona ʼaho” ʼi te fai ʼo te fono faka famili ʼaia ʼi tona ʼapi.
1:6; 2:1—Ko ai ʼaē neʼe gafua ke hū ke tuʼu iā muʼa ʼo Sehova? Iā nātou ʼaē neʼe tutuʼu iā muʼa ʼo Sehova, neʼe ʼi ai te ʼAlo ʼulu tokotahi ʼo te ʼAtua, ia te Folafola; mo te kau ʼāselo agatonu; pea mo ‘te tahi ʼu foha ʼo te ʼAtua,’ ia te kau ʼāselo talagataʼa, ʼe kau ai ia Satana te Tevolo. (Soane 1:1, 18) Neʼe hoki kapu ifo ia Satana mo tana kau temonio mai te lagi ʼi te hili pe ʼo te fakatuʼu ʼo te Puleʼaga ʼo te ʼAtua ʼi te taʼu 1914. (Apokalipesi 12:1-12) ʼI tana fakagafua age ke nātou hū age ʼo tutuʼu ʼi ʼona muʼa, neʼe fakahā ai e Sehova iā muʼa ʼo te ʼu laumālie fuli ia te fakafeagai ʼa Satana pea mo te ʼu faʼahi ʼaē neʼe fakafihiʼi.
1:7; 2:2—Neʼe palalau fakahagatonu koa ia Sehova kiā Satana? ʼE mole lahi he ʼu fakamatala ʼi te Tohi-Tapu ʼo ʼuhiga mo te faʼahiga felogoi ʼa Sehova mo tana kau ʼāselo. Kae ʼi te meʼa ʼaē neʼe hā ki te polofeta ko Mikea, neʼe sio ai ki te ʼāselo neʼe palalau fakahagatonu mo Sehova. (1 Hau 22:14, 19-23) Koia ʼe feala pe ke tou ʼui, neʼe palalau fakahagatonu ia Sehova kiā Satana.
1:21—ʼE tonu ke tou mahino feafeaʼi ki te ʼui ʼa Sopo ʼe toe liliu anai ki te ‘fatu ʼo tana faʼē’? Mai te ʼaluʼaga ʼaē neʼe faʼu te tagata e Sehova ʼAtua “ ʼaki te efu ʼo te kele,” koia ko te ʼu kupu “faʼē,” neʼe fakaʼaogaʼi moʼo fakatātā ʼaki ʼo te kele.—Senesi 2:7.
2:9—Neʼe feafeaʼi ʼapē te fakakaukau ʼa te ʼohoana ʼo Sopo ʼi temi ʼaē neʼe ina ʼui ai ki tona ʼohoana ke laukovi ki te ʼAtua pea ke mate? Neʼe tali mamahi te ʼohoana ʼo Sopo, ohage pe ko tona ʼohoana. Neʼe lagi toe mamahi foki ʼi tana sio ki tona ʼohoana ʼaē neʼe mālohi, kua fakaʼofaʼofa ʼuhi ko te mahaki fakalialia ʼaē neʼe tō kiā ia. Tahi ʼaē meʼa, neʼe mamate tanā fānau ʼofaina. ʼI tana mamahi ʼaupito ʼi te ʼu meʼa fuli ʼaia neʼe hoko, neʼe galo kiā ia te meʼa ʼaē neʼe maʼuhiga tāfito—ko tanā ʼu felogoi mo te ʼAtua.
Te ʼu Puani ʼe Tou Lava Tāʼofi:
1:8-11; 2:3-5. Ohage ko te meʼa ʼaē neʼe hoko kiā Sopo, ʼo hilifaki ki he aga ʼe lelei pea mo he palalau ʼe lelei, ʼe maʼuhiga ke lelei te ʼu meʼa ʼaē ʼi ʼotatou loto ke feala hatatou nonofo agatonu ʼi tatatou tauhi ʼaē kiā Sehova.
1:21, 22. ʼI tatatou nonofo agatonu kiā Sehova ʼi te temi faigamālie ʼo feiā mo te ʼu temi faigataʼa, ʼe tou lava fakamoʼoni ai ko Satana ʼe gutuloi.—Tāʼaga Lea 27:11.
2:9, 10. Ohage ko Sopo, ʼe tonu ke tou nonofo mālohi ʼi te tui, tatau aipe peʼe mole faka maʼuhigaʼi tatatou ʼu faiga fakalaumālie e totatou famili, peʼe nātou faigaʼi ke tou fakatō laloʼi peʼe tou lītuʼa ki tatatou tui.
2:13. Neʼe mole fai e te ʼu kaumeʼa ʼo Sopo he ʼu fakaloto mālohi ʼo ʼuhiga mo te ʼAtua pea mo tana ʼu fakapapau, koteʼuhi neʼe mole lelei tonatou maʼuli fakalaumālie.
“ ʼE MOLE AU TUKU ANAI TAKU AGATONU!”
ʼE ʼiloga tāfito ʼi te ʼu palalau ʼaē neʼe fai e te ʼu kaumeʼa e toko tolu ʼo Sopo, tanatou ʼui ʼaē neʼe lagi fai e Sopo he meʼa ʼe kovi ʼaupito, koia ʼaē ʼe fakatūʼā mamafa ai e te ʼAtua. Ko Elifasi ʼaē neʼe ina kamata ia te fai palalau. Neʼe hoa ki ai ia Pilitate, ʼo fefeka age tana ʼu palalau, ʼo hoa ki ai ia Sofale ʼaē neʼe toe kona age mo tana ʼu palalau.
Neʼe mole leleiʼia e Sopo ia te ʼu fakakaukau hala ʼo te ʼu tagata ʼaia. ʼI tana mole lava mahino ki te tupuʼaga ʼo te fakagafua e te ʼAtua ke maʼuli mamahi, neʼe tokaga fau ke ina fakatonuhia ia ia. Kae neʼe ʼofa ia Sopo ki te ʼAtua pea neʼe ina ʼui fēnei ai: “ ʼO aʼu ki toku mate, ʼe mole au tuku anai taku agatonu!”—Sopo 27:5.
Te ʼu Tali Ki Te ʼu Fehuʼi Faka Tohi-Tapu:
7:1; 14:14—Koteā ia te “maʼua fekau” ʼaē neʼe talanoa kiai ia Sopo? Neʼe kua kovi ʼaupito te ʼu mamahi ʼa Sopo, koia ʼaē maʼa ia ko tona maʼuli neʼe hage ko he gāue kinakina pea mo fakaogosia. (Sopo 10:17, kiʼi nota ʼi te lalo pasina) Mai te ʼaluʼaga ʼaē ko te temi ʼaē ʼe kita nofo ai ʼi te Seole—mai te temi ʼo tokita mate ʼo aʼu ki te fakatuʼuake—ʼe ko he temi ʼe fakamaʼua mai, koia ʼaē neʼe ina fakatatau ai te temi ʼaia ki he maʼua fekau.
7:9, 10; 10:21; 16:22—ʼE fakahā ʼaki koa ʼi te ʼu palalau ʼaia neʼe mole tui ia Sopo ki te fakatuʼuake? Ko te ʼu palalau ʼaia ʼa Sopo neʼe ina fai ʼo ʼuhiga mo te meʼa ʼaē neʼe ʼamanaki hoko age ki ai ʼi te lakaga pe ʼaia. Kae neʼe koteā koa te faka ʼuhiga ʼo tana ʼu palalau? ʼE lagi faka ʼuhiga mokā mate anai, ʼe mole ʼi ai he tahi ʼo tona temi ʼe sio anai ki ai. ʼAki te manatu ʼaia, ʼe lagi mole liliu anai ki tona ʼapi peʼe ina toe ʼiloʼi age he tahi ʼu meʼa ʼo aʼu pe anai ki te temi ʼaē kua fakatuʼutuʼu kiai te ʼAtua. Neʼe lagi toe fia ʼui e Sopo ʼe mole ʼi ai he tahi ʼe lava liliu mai te Seole ʼaki tona mālohi totonu. Neʼe ʼiloga te falala ʼa Sopo ʼo ʼuhiga mo he fakatuʼuake ki te ka haʼu ʼi tana ʼu palalau ʼaē iā Sopo 14:13-15.
10:10—Neʼe feafeaʼi te ‘ligiligi e Sehova ia Sopo ohage ko te huʼa pipi pea mo tana fakaliliu ia ia ke fatufatu ohage ko te folomasi’? ʼE ko he ʼu palalau fakatuketuke moʼo fakamatala te faʼufaʼu ʼo te sino ʼo Sopo ʼi te loto fatu ʼo tana faʼē.
19:20—Koteā te faka ʼuhiga ʼo te ʼui e Sopo “ ʼe hola mo te lauʼi kili ʼo [tona] ʼu nifo”? ʼI tana ʼui ʼaē neʼe hola mo te lauʼi kili ʼo tona ʼu nifo, neʼe lagi fia ʼui e Sopo neʼe teitei pe ke mole kei ʼi ai hona koloā ke ʼalu mo ia.
Te ʼu Puani ʼe Tou Lava Tāʼofi:
4:7, 8; 8:5, 6; 11:13-15. ʼAua naʼa tou foimo ʼui atu aipe ki he tahi ʼe tau mo hana ʼu mamahi, ʼe ina ʼutu pe te meʼa ʼaē neʼe ina to, pea ʼe mole tapuakina ia ia e te ʼAtua.
4:18, 19; 22:2, 3. ʼE tonu ke fakatafito tatatou fai tokoni ki te Folafola ʼa te ʼAtua, kae mole tonu ke fakatafito ki ʼatatou manatu ʼa tatou totonu.—2 Timoteo 3:16.
10:1. Neʼe mole kei tāsilo ia te fakakaukau ʼa Sopo ʼuhi ko tana loto fītaʼa, koia ʼaē neʼe mole kei ina vakavakaʼi ai te tahi ʼu tupuʼaga ʼo tana tali mamahi. ʼE mole tonu ke tou fītaʼa mokā tou tau mo he mamahi, tāfito la heʼe kua tou mahino lelei ki te tupuʼaga ʼo te ʼu mamahi ʼaia.
14:7, 13-15; 19:25; 33:24. ʼI he faʼahiga ʼahiʼahi pe ʼe lagi fakahoko anai e Satana kiā tatou, ʼe feala ke lagolago mai te ʼamanaki ʼo te fakatuʼuake.
16:5; 19:2. ʼE tonu ki ʼatatou palalau ke fakaloto mālohi ki te hahaʼi pea mo ina ʼekenaki nātou, kae ʼe mole tonu ke tupu ai hanatou ʼiʼita.—Tāʼaga Lea 18:21.
22:5-7. Ko he fai tokoni ʼe fakatafito ki he ʼu tukugakovi ʼe mole hona ʼu fakamoʼoni, ʼe noa ia pea mo fakatupu tuʼutāmaki.
27:2; 30:20, 21. Ko te taupau ʼo te agatonu ʼe mole faka ʼuhiga leva ʼe mole feala ke kita lākahala. Neʼe lākahala ia Sopo he neʼe faihala ʼi te ʼu valoki ʼaē neʼe ina fai ki te ʼAtua.
27:5. Neʼe fakalogo kiā Sopo mo kapau neʼe mole ina fia taupau tana agatonu, koteʼuhi ko tata agatonu ʼe fakalogo pe ki tokita ʼofa ki te ʼAtua. Koia ʼaē ʼe tonu ai ke tou fakatuputupu he ʼofa mālohi kiā Sehova.
28:1-28. ʼE ʼiloʼi e te tagata peʼe maʼu ʼifea te ʼu koloā ʼo te kele. ʼI tana kumi te ʼu koloā ʼaia, ʼe maʼu puleʼaki ke ʼalu ʼo kumi ʼi te ʼu ala ʼo te lalo kele ʼaē māʼiape la mo te ʼakūila ʼe mole lava sio kiai. Kae ko te poto fakaʼatua ʼe maʼu mai te manavasiʼi kiā Sehova.
29:12-15. ʼE tonu ke tou tali lelei ke tou lotoʼofa kiā nātou ʼaē ʼe faigataʼaʼia.
31:1, 9-28. Neʼe tuku mai e Sopo he faʼifaʼitaki kiā tatou he neʼe mole faiʼakau, neʼe mole tono, neʼe mole aga fefeka ki te hahaʼi, neʼe mole ʼofa fakavale ki te ʼu koloā, pea neʼe mole tauhi tamapua.
“ ʼE AU FAKAHEMALA ʼI TE EFU PEA MO TE LEFULEFU”
Neʼe fakatalitali lelei ia te tūpulaga ko Eliu ʼo fakalogo ki te fai palalau ʼaē neʼe fai. Pea hoko mai leva tona temi ke palalau ʼaki he lototoʼa. Neʼe ina fakatonutonuʼi ia Sopo mo te ʼu tagata e toko tolu ʼaē neʼe nātou fakaloto mamahiʼi ia ia.
ʼE ʼosi pe te palalau ʼa Eliu, pea neʼe tali e Sehova mai te tuʼani matagi. Neʼe mole ina fakamahino te tupuʼaga ʼo te mamahi ʼa Sopo. Kae ʼaki te ʼu tuʼuga fehuʼi, neʼe uga e te Māfimāfi ia Sopo ke mahino ki Tona mālohi fakaofoofo pea mo tona poto lahi. Neʼe fakamoʼoni ai e Sopo neʼe palalau kae neʼe mole mahino, pea neʼe ina ʼui fēnei: “ ʼE au fakahemala ki ʼaku palalau, pea ʼe au fakahemala ʼi te efu pea mo te lefulefu.” (Sopo 42:6) Neʼe gata ai te ʼahiʼahi ʼa Sopo, pea neʼe fakapale ia ia ʼuhi ko tana nofo agatonu.
Te ʼu Tali Ki Te ʼu Fehuʼi Faka Tohi-Tapu:
32:1-3—Ko te temi fea ʼaē neʼe tau mai ai ia Eliu? Mai tona ʼaluʼaga ʼaē neʼe logo ia Eliu ki te ʼu palalau fuli, ʼe mahino ia neʼe lagi nofo ōvi age kiā nātou, ʼo feʼauga lelei pe mo tana logo ki te kamata palalau ʼa Sopo pea mo te fakaʼosi ʼo te ʼu ʼaho e fitu ʼaē neʼe nonofo fakalogologo ai tona ʼu kaumeʼa.—Sopo 3:1, 2.
34:7—He koʼe neʼe ʼui e Sopo neʼe hage he tagata “ ʼe ina ʼinu te manukinuki ohage ko te vai”? ʼI tona mamahi, neʼe faka ʼuhiga e Sopo te manuki ʼo tona ʼu kaumeʼa e toko tolu ohage ʼe fakaaga ki ai, logola neʼe nātou palalau ʼo fakafeagai ki te ʼAtua. (Sopo 42:7) Koia neʼe manukiʼi ia ia ohage he tahi ʼe ina ʼinu fakafiafia hona moʼi vai.
Te ʼu Puani ʼe Tou Lava Tāʼofi:
32:8, 9. Ko te agapoto ʼe mole maʼu ʼi te temi matuʼa. ʼE fakamaʼua kiai te mahino ki te Folafola ʼa te ʼAtua pea mo te takitaki ʼo tona laumālie.
34:36. ʼE ʼiloʼi papau tatatou agatonu mokā ‘ ʼahiʼahiʼi ʼo aʼu ki te gataʼaga’ ʼi he faʼahiga ʼaluʼaga pe.
35:2. Neʼe fakalogo fakalelei ia Eliu pea ʼi muʼa ʼo tana palalau, neʼe ina fakahā lelei ia te ʼaluʼaga tāfito ʼaē ʼe fia palalau kiai. (Sopo 10:7; 16:7; 34:5) ʼI muʼa ʼo te fai tokoni ʼa te kau tagata ʼāfea, ʼe tonu ke nātou fakalogo fakalelei, mo nātou mālama ki te ʼu meʼa ʼaē neʼe hoko moʼoni, pea mo mahino lelei ki te ʼu fehuʼi ʼaē ʼe tō tonu mo te ʼaluʼaga ʼaia.—Tāʼaga Lea 18:13.
37:14; 38:1–39:30. Ka tou fakakaukauʼi ia te ʼu gāue fakaofoofo ʼa te ʼAtua—ʼaē ʼe ʼiloga ai tona mālohi pea mo tona poto—ʼe ina eke tatou ke tou agavaivai pea mo tokoni mai ke tou tokagaʼi ʼe maʼuhiga age te fakatonuhia ʼo tona pule faʼitaliha ʼi hatatou tōkakaga ki te ʼu meʼa ʼa tatou totonu.—Mateo 6:9, 10.
40:1-4. Ka hage ʼe tou fia meo ʼo ʼuhiga mo te Māfimāfi, ʼe tonu ke tou ‘ ʼai totatou nima ki totatou gutu.’
40:15–41:34. Ko he ʼu manu mālolohi ia Pehemote (te hippopotame) pea mo Leviata (te kolokotile)! Ke feala hatatou faʼa kātaki ʼi te gāue ʼa te ʼAtua, ʼe toe ʼaoga kiā tatou he mālohi mai ia Ia ʼaē neʼe ina faʼu te ʼu manu mālolohi ʼaia, ia Ia ʼaē ʼe ina foaki mai te mālohi kiā tatou.—Filipe 4:13.
42:1-6. Ko te logo ʼa Sopo ki te palalau ʼa Sehova pea mo tana fakamanatuʼi age te ʼiloga ʼo tona mālohi, neʼe tokoni age ki ai ke “sio ki te ʼAtua,” peʼe ke sio ki te moʼoni ʼo ʼuhiga mo ia. (Sopo 19:26) Neʼe fakatonutonuʼi ai tana manatu. Ka fakatonutonuʼi tatou mai te Tohi-Tapu, ʼe tonu ke tou foimo fakamoʼoni ki tatatou faihala pea mo fai he ʼu fakatonutonu.
Tou Mulimuli Ki “Te Faʼa Kātaki ʼa Sopo”
ʼE fakahā lelei mai ʼi te tohi ʼa Sopo ʼe mole ko te ʼAtua te tupuʼaga ʼo te ʼu mamahi ʼa te tagata, kae ʼe tupu ko Satana. Ko te fakagafua e te ʼAtua ke ʼi ai te agakovi ʼi te kele, ʼe ko he faigamālie ʼaia kiā tatou ke tou tali takitokotahi peʼe tou lagolago kiā ʼai ʼo ʼuhiga mo te ʼu fakafifihi ʼaē neʼe fai ʼo ʼuhiga mo te pule faʼitaliha ʼa Sehova pea mo tatatou agatonu.
Ohage ko Sopo, ʼe ʼahiʼahiʼi anai ia nātou fuli ʼaē ʼe ʼoʼofa kiā Sehova. ʼE tou mahino ʼaki te fakamatala ʼo te maʼuli ʼo Sopo, ʼe tou lava faʼa kātaki. ʼE fakamanatuʼi mai ko ʼotatou fihifihia ʼe mole heʼegata anai ia. ʼE ʼui fēnei iā Sakopo 5:11: “Neʼe koutou logo ki te faʼa kātaki ʼa Sopo pea mo te ikuʼaga ʼaē neʼe tuku ake e Sehova.” Ko Sopo neʼe fakapale e Sehova ʼi tana nofo agatonu. (Sopo 42:10-17) Ko he ʼamanaki lahi ʼe tuku mai ʼi ʼotatou muʼa—ko te maʼuli heʼegata ʼi te Palatiso ʼi te kele! Ohage ko Sopo, tou tukupau ke tou taupau maʼu tatatou agatonu.—Hepeleo 11:6.
[Kiʼi nota]
^ ʼE fakamatala ʼi te tohi ʼa Sopo ia te ʼu meʼa ʼaē neʼe hoko ʼi te ʼu taʼu e 140 tupu, mai te taʼu 1657 ʼi muʼa ʼo totatou temi ʼo aʼu ki te taʼu 1473 ʼi muʼa ʼo totatou temi.
[Paki ʼo te pasina 20]
Koteā te ako ʼe tou maʼu mai “te faʼa kātaki ʼa Sopo”?