„Kialuunniit nammagassani nammineq nammassavaa“

„Tamatta immikkut Guutimut nassuertussaavugut.“ — ROMAMIUT 14:12.

1. Inuusuttut pingasut hebræeriusut suna akisussaaffigiumavaat?

INUUSUTTUT pingasut hebræeriusut Babylonimiittut inuunermik toqumilluunniit kinguneqarsinnaasumik aalajangiisariaqalerput: Inuusaliarujussuarmik pallorfiginneqqusissut naalassavaat? Imaluunniit taanna pallorfigiumassanngilaat aatsitsivimmut ikualasumut iginneqartussaagaluarunilluunniit? Shadraki, Meshaki Abed-Negolu siunersiuinissaminnut piffissaqanngillat; aammami siunersiuisariaqanngillat. Nangaanatik ima oqarput: „Ilisimassavat, kunngi, . . . illit guutigisat guutisiorfigiumanngikkipput inuusaliarlu kuultiusoq nappakkat pallorfigiumanagu.“ (Danieli 3:1-18) Hebræerit pingasut taakku nammagassartik namminneq nammappaat, namminneq akisussaajumapput.

2. Pilatusip Jiisusimut tunngatillugu aalajangigassaralua kikkut aalajangerpaat, tamannalu naalagaatitap akisussaajunnaassutigaa?

² Ukiut 600-t missiliorlugit tamatuma kingorna naalagaatitap angut pillugu unnerluutiginnissutit tusarpai. Misissuereerami paasivaa angut unnerluutigineqartoq pinngitsuusoq. Inuppassuilli taassuma toqutaanissaa piumasaraat. Siullermik naalagaatitaq akerliliivoq, akisussaajumannginnamili akuersiinnarpoq. Assani errortuutigalugit ima oqarpoq: „Pinngitsuuvunga taassuma aavanut.“ Taava tigusaq nappakkamut kikiattugassanngortippaa. Aap, Pontiusi-Pilatusip akisussaaffini sumiginnarlugu Jiisusip qanoq pineqarnissaa allanut aalajangertippaa. Qanorluunniilli errortortigigaluaruni Jiisusimik naapertuilluanngitsumik eqqartuussineq suli akisussaaffigaa. — Matthæusi 27:11-26; Lukasi 23:13-25.

3. Sooq allanut aalajangiissutitissanngilagut?

³ Illit aalajangigassaqaraangavit susarpit? Hebræerit pingasut taakku pinerattut pisarpit, imaluunniit allanut aalajangiissutitittarpit? Aalajangernissaq imaannaanngilaq. Inuk eqqortumik aalajangissaguni inersimalluartariaqarpoq. Assersuutigalugu angajoqqaat meeqqatik nukangasut silatusaartumik aalajangiissuttariaqarpaat.  Soorunami aalajangernissaq ajornarnerusarpoq pissutsit erloqinartillugit assigiinngitsunillu naliliisariaqartilluni. Aalajangigassalli akisussaaffiupput ’nanertuutigisanut’ imaluunniit erloqinartunut anersaakkut piukkunnaatillit uagut pilluta ersussinnaasaannut ilaanngitsut. (Galatiamiut 6:1, 2) Akisussaaffiuppulli ’tamatta immikkut Guutimut nassuerutigisassavut’. (Romamiut 14:12) Biibilimi ima allassimavoq: „Kialuunniit nammagassani nammineq nammassavaa.“ (Galatiamiut 6:5) Qanormi ililluta silatusaartumik aalajangersinnaagatta? Siullermik inuttut pisinnaasatta killeqarnerat nassuerutigisariaqarparput paasiniarlugulu qanoq ililluta akornutiginaveersaarsinnaanerlugit.

Pingaaruteqartupilussuaq

4. Inuit siulliit marluk naalannginnerat aalajangernermut tunngatillugu pingaarutilimmik qanoq ilinniutigisinnaavarput?

⁴ Inuiaat oqaluttuarisaaneranni siusissukkut inuit siulliit marluk ajunaarnermik kinguneqartumik aalajangerput. Orpiup ajunngitsumik ajortumillu ilisimalersitsisup paarnaanik neriniarlutik aalajangerput. (1 Mosesi 2:16, 17) Suna tunngavigalugu taamatut aalajangerpat? Biibilimi ima allassimavoq: „Arnap orpik qiviarlugu [paasivaa] neriffigiuminarlunilu isigiuminarlunilu sianisuunnguutissaqqissoq.“ Taamaammat „paarnaanik tigusivoq nerillunilu, aammattaarlu uini saniminiittoq tunillugu; taannalu aamma nerivoq.“ (1 Mosesi 3:6) Eva namminissarsiorluni kissaatini tunngavigalugu aalajangerpoq, Adamilu immisut iliortippaa. Tamatuma kingunerisaanik ajorti toqulu ’inunnut tamanut anngupput’. (Romamiut 5:12) Adamip Evallu naalannginnerat inuttut pisinnaasatta killeqarnerat pillugu pingaarutilimmik ilinniutigisariaqarparput: Guutip siunnersuutai maleqqissaartanngikkutsigik kukkusumik aalajangeqqajaanerussaagut.

5. Jehovap qanoq siunnersorpaatigut, siunnersuutaalu iluaqutiginiarlugu susariaqarpugut?

⁵ Jehova Guutip uagutsinnik siunnersuisarnerata nuannaarutiginissaanut pissutissaqarpugut. Biibilimi ima allassimavoq: „Talerpiup saamiulluunniit tungaanut sanguleraangassi siutissi tusaassavaat kingunissinni ima oqartoqartoq: ’Aqqut aana ingerlavigisassarsi.’“ (Esaja 30:21, 1900/1961) Jehovap oqaatsini isumassarsiarititaasoq, Biibili, aqqutigalugu oqaluuttarpaatigut. Allakkat atuaqqissaartariaqarpavut taamaalillutalu eqqorluartumik ilisimasaqarneq pigiliullugu. Eqqortumik aalajangertassagutta ’nerisassat tamuasarissat inersimasunngorluarsimasuni nerineqartussat’ nerisariaqarpavut. Aammattaaq ’piginnaassutsitta atortuinnarnerisigut sungiussisariaqarpugut ajunngitsumik ajortumillu immikkoortitsisinnaalerluta’. (Hebræerit 5:14) Piginnaassuserput imaluunniit paasinnissinnaassuserput sungiusarsinnaavarput Guutip oqaasiani ilikkakkatta atornerisigut.

6. Nalunngeqatiginnissuterput tatiginassappat suna pisariaqarpa?

⁶ Aalajangerniarnermi pingaaruteqartoq tassaavoq inunnguuseralugu nalunngeqatiginnissuterput. Taanna iluaqutigalugu imminut misilissinnaavugut, aamma tamatuma ’unnerluutigisinnaallutaluunniit illersorsinnaavaatigut’. (Romamiut 2:14, 15) Nalunngeqatiginnissuterpulli tatiginassappat eqqorluartumik ilisimasaqarnermik Biibilimeersumik qaammarsarneqartariaqarpoq ilisimassusermillu atuinikkut malussarissunngortinneqartariaqarluni. Nalunngeqatiginnissut sungiusarneqanngitsoq ileqqorineqartunit, avatangiisitsinnit allallu isumaannit sunnertiavoq, aamma tammartissinnaavaatigut. Nalunngeqatiginnissuterput  sumiginnaqattaarutsigu Guutillu najoqqutassiai maleruarnagit nalunngeqatiginnissuterput sussava? Uutarlugu „nalunaaqutsigaasutut“ ilersinnaavoq — qileqqutut malussarlersinnaavoq. (1 Timotheusi 4:2) Nalunngeqatiginnissulli Guutip oqaasia iluaqutigalugu ilinniartinneqarsimasoq siulersuisuuvoq tatiginartoq.

7. Silatusaartumik aalajangersinnaassagaanni suna pingaaruteqartupilussuua?

⁷ Tassa, silatusaartumik aalajangernermut tunngatillugu akisussaaffitsinnik eqqortitsissagaangatta, Biibilimeersumik eqqorluartumik ilisimassuseqarnissaq tamannalu naapertorlugu iliornissaq pingaaruteqartupilussuuvoq. Aalajangeriataaginnarnata najoqqutassianik Biibilimeersunik naleqquttunik ujaasinissaq piffissaqarfigisariaqarparput taakkualu atorniarneranni eqqarsarsinnaassuserput atorlugu. Biibilimeersumik eqqorluartumik ilisimassuseqarutta nalunngeqatiginnissuterpullu tamatumannga ilinniartinneqarsimappat Shadrakitut, Meshakitut Abed-Negotullu aalajangipallagassaqaraluaruttaluunniit piareersimalluassaagut. Inersimassummut ingerlagasuarnitsigut qanoq ililluta aalajangersinnaassuseqarlualersinnaanersugut paasiniarlugu ulluinnarni inuunermut tunngasut marluk misissoriartigik.

Kikkut ilagisartagarissavavut?

8, 9. (a) Najoqqutassiat suut ikinngutipalaaqannginnissap pisariaqassusianik ersersitsippat? (b) Inunnik maleruutiasunik peqateqarnerinnakkut ’ikinngutipalaaqartoqarsinnaava’? Akissutit tunngavilersoruk.

⁸ Apustili Paulusi ima allappoq: „Tammarnaveeritsi! Ikinngutipalaaqarneq ileqqorikkaluartunut aseruutissiisarpoq.“ (1 Korinthimiut 15:33) Jiisusip ajoqersukkani oqarfigai: „Silarsuarmut ilaanngilasi.“ (Johannesi 15:19, NV) Najoqqutassiat taakku eqqarsaatigalugit paasiuminarpoq kinguaassiuutitigut inuunerluttut, allasiortut, tillittut, imerajuttut assigisaallu ilagisartagarisinnaanngikkivut. (1 Korinthimiut 6:9, 10) Biibilimeersumik ilisimassuseqarnerujartortilluta paasisarparput inuit taamaattut filmini, tv-mi qarasaasiamilu pinnguaatini isiginnaarnerat inuillu taamaattut pillugit atuakkamik atuarneq ilagisartagarinerattulli ajoqutaatigisoq. Inuit „peqquserluttut“ internetikkut chatteqatigilersinnaasavut pillugit aamma taama oqartoqarsinnaavoq. — Tussiaat 26:4.

⁹ Inuit ileqqussatigut minguitsuusinnaasut, Guutimulli ilumoortumut uppissuseqanngitsut ilagisartagarisinnaavavut? Biibilimi allassimavoq „silarsuaq tamarmi Ajortumut naalatsigitittoq“. (1 Johannesi 5:19) Tamanna iluaqutigalugu paasivarput inuit maleruutiasut ileqqussatigullu ajortunngorsimasut kisimik ikinngutipalaajunngitsut. Taamaattumik Jehovamik asannittut kisiisa qanimut ikinngutigilerniarutsigit silatusaassaagut.

10. Silarsuarmut attaveqarnitsinnut tunngatillugu eqqortumik aalajangernissamut suna iluaqutigisinnaavarput?

¹⁰ Silarsuarmut matumunnga attaveqanngivittoqarsinnaananilu attaveqanngivittoqartariaqanngilaq. (Johannesi 17:15) Oqaluussigaangatta, atuarfimmiikkaangatta suligaangattaluunniit inuit Jehovamik pallorfiginninngitsut attaveqarfigisarpavut. Kristumiu allamik upperisalimmik aappalik kristumiunit allanit silarsuarmut attaveqarnerusariaqarsinnaavoq. Paasinnissinnaassuserpulli atorutsigu paasissavarput pisariaqartumik killilimmik silarsuarmut attaveqartoqarsinnaasoq, silarsuarmulli qanimut attaveqarnermik ineriartortitsineq allarluinnaasoq. (Jaaku 4:4) Taamaalilluta inersimalluartutut aalajangersinnaanngussaagut, assersuutigalugu atuaqatitta suleqatittaluunniit timersoqatigiinneranni festerneranniluunniit qanoq peqataatigissanerluta.

Suliffissamik toqqaaneq

11. Suliffissatsinnik toqqaassagaangatta suna siullertut eqqarsaatigisariaqarparput?

¹¹ Inersimalluartutut Biibilimi najoqqutassianik atuineq ’inoqutinik isumaginninnissamik’ akisussaaffitsinnik qanoq ililluta eqqortitsissanerluta aalajangernissamut iluaqutigissavarput. (1 Timotheusi 5:8) Siullermik suliffiup suunera — suliffimmi tamatumani sunik suliaqartassanerluta — eqqarsaatigisariaqarparput. Suliffimmi Biibilimi erseqqissumik assuarineqartunik siuarsaaffiusumi suliniarluni aalajangerneq kukkunerulluinnassaaq. Taamaattumik kristumiut ilumoortut guutipilussiornermut, tillinniarnermut, aammik atornerluinermut iliuutsinulluunniit  Biibilerpalaanngitsunut allanut attuumassuteqartunik suliffittaarusunngillat. Sallorusunnatalu peqquserluttuliorusunngilagut, aamma sulisitsisutta taamaalioqqugaluarpatigulluunniit. — Apustilit Suliaat 15:29; Saqqummersitat 21:8.

12, 13. Aalajangersimasumik suliffittaarniaraanni suliffiup suuneranik eqqarsaatiginninnerup saniatigut suut eqqarsaatigisariaqarpat?

¹² Suliarmi immini Guutip inatsisaasa ilaannik aalajangersimasumik unioqqutitsinerunngippat? Sallusuissummik ilisimasaqarnerujartortilluta paasinnissinnaassuserpullu sungiussiartortillugu aamma allanik eqqarsaateqartariaqarnerput paasisarparput. Taavami suliffik pissutigalugu iliuutsimut Biibilimut naapertuutinngitsumut peqataassagutta, assersuutigalugu suliffeqarfimmi aningaasanoornermik ingerlatsiviusumi telefonimik paarsisutut? Eqqarsaatigisariaqakkat aamma allat tassaapput kimerpiaq akissarsisassanerluni sumilu sulisassanerluni. Assersuutigalugu sulisartoq namminersortoq kristumiu oqaluffimmik qalipaanissaminik neqerooruteqassava taamaalillunilu upperisarsiornermik eqqunngitsumik siuarsaaqataalluni? — 2 Korinthimiut 6:14-16.

¹³ Taavami sulisitsisorput oqaluffimmik qalipaaniarluni isumaqatigiissusiorsimappat? Taamaappat suliassamut qanoq sunniuteqartigissanerluta qanorlu akuutigissanerluta eqqarsaatigisariaqarparput. Aamma suliffik nalinginnaalluinnartoq qanoq isigissavarput, soorlu allakkanik aatsisarneq aamma eqqunngitsuliorfiusunut? Matumani najoqqutassiaq Matthæusi 5:45-miittoq eqqarsaatigissallugu pitsaassaaq. Taamatut suliuarnerup nalunngeqatiginnissutitsinnut qanoq sunniuteqarsinnaanera sumiginnassanngilarput. (Hebræerit 13:18) Aap, suliffimmut tunngatillugu inersimalluartutut aalajangerniarnitsinni nammineq akisussaassagutta paasinnissinnaassuseqarnerulertariaqarpugut nalunngeqatiginnissuterpullu Guutimeersoq sungiusartariaqarlutigu.

„Eqqarsaatigiuartaruk sumiikkaluaraangavilluunniit“

14. Aalajangigassaqaraangatta qanoq ilioqqaartariaqarpugut?

¹⁴ Aalajangigassammi allat, soorlu ilinniagaqarnermut imaluunniit nakorsaatinut katsorsaariaatsinullu tunngasut? Aalajangigassaqaraangatta tamatigut Biibilimi najoqqutassiat tamatumunnga attuumassuteqartut misissorluartariaqarpavut eqqortumillu atorniarlugit isumaliutigalugit. Itsaq Israelimi kunngi Salomo silatooq ima oqarpoq: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ — Ussatit 3:5, 6.

15. Kristumiut siulliit aalajangigassanut tunngatillugu qanoq ilinniarfigisinnaavavut?

¹⁵ Aalajangikkatta ilarpassui allanut sunniuteqartarput, tamannalu eqqarsaatigisariaqarparput. Assersuutigalugu ukiuni hundredelinni siullerni kristumiut Mosesip inatsisaani nerisassanut tunngatillugu killilersuutaasut maleruartussaajunnaarpaat. Nerisassanik Inatsisit naapertorlugit minguttuutut isigineqarsimasunik imaluunniit allat mamiatsaatiginavianngisaannik neriniarlutik aalajangersinnaapput. Paulusilli uumasup neqaa guutipilunnut naalaffimmut attuumassuteqarsinnaasoq ima allaatigaa: „Nerisassap qatanngutiga tammartippassuk neqitussaarluinnarumaneruvunga qatanngutiga tammartikkumanagu.“ (1 Korinthimiut 8:11-13) Itsaq kristumiut  tammartitsinnginniassammata kajumissaarneqarput allat nalunngeqatiginnissutaannik innimiginneqqullugit. Aamma aalajangikkavut ’mamiatsaataassanngillat’. — 1 Korinthimiut 10:29, 32.

Ilisimassusermik Guutimeersumik ujartuigit

16. Aalajangigassaqaraangatta qinuneq qanoq iluaqutigisinnaavarput?

¹⁶ Aalajangigassaqaraangatta qinuneq nalissaqanngitsumik iluaqutaasarpoq. Ajoqersugaq Jaaku ima allappoq: „Ilisimassutsimigut inorsartumik ilaqarussi taassuma qinnutigissavaa ilisimassuseq Guutimit avoqqaarlernani naammalluinnartunik tamanut tunisisartumit, taava piumaarpaa.“ (Jaaku 1:5) Jehova tatigilluinnarlugu saaffigisinnaavarput ilisimassuserlu eqqortumik aalajangernissamut pisariaqartitarput qinnutigalugu. Isumaliutigisavut pillugit Jehova oqaloqatigigutsigu aamma siunersiorutsigu anersaap illernartup allassimaffinnik eqqarsaatigeqqissaakkatsinnik paasinninnerunissamut ikiorsinnaavaatigut allassimaffinnillu arajutsisimasinnaasatsinnik eqqaasissinnaalluta.

17. Aalajangigassaqaraangatta allat qanoq ikiorsinnaavaatigut?

¹⁷ Aalajangerniarnitsinni allat ikiorsinnaavaatigut? Aap, Jehovap ilagiinni inersimalluartunik kristumioqarnissaa isumagisimavaa. (Efesosimiut 4:11, 12) Taakkua siunersiorsinnaavavut, ingammik pingaaruteqartupilussuarmik aalajangigassaqartilluta. Uppeqatit anersaakkut paasisimasaqarluartut inuunermilu misilittagaqarluartut Biibilimi najoqqutassiat aalajangigassatsinnut sunniuteqarsinnaasut uagutsinnut innersuussutigisinnaavaat, aamma ’suut pingaartittariaqarnerannik paasinninniarnitsinni’ ikiorsinnaavaatigut. (Filippimiut 1:9, 10) Mianersoqqussulli una naleqqulluarpoq: Allanut aalajangiissutitinnaveersaartariaqarpugut. Tamanna nammineq akisussaaffigaarput.

Tamatigut ajunngitsumik kinguneqartassava?

18. Ajunngitsumik aalajangerneq qanoq kinguneqarsinnaava?

¹⁸ Aalajangikkat Biibilimi najoqqutassianik tunngaveqarluartut eqqarsaatigilluaqqaakkallu ajunngitsumik kinguneqartuaannassappat? Aap, ungasinnerusoq eqqarsaatigalugu. Ilaannikkulli aallaqqaammut ajortumik kinguneqarsorinarsinnaapput. Shadrakip, Meshakip aamma Abed-Negop nalunngilaat inuusaliamik pallorfiginnikkumannginnertik toqumik kinguneqarsinnaasoq. (Danieli 3:16-19) Aamma apustilit juutit killiusiuisoqatigiivi akigamikkit Guuti naalakkatut inunnit naalattariaqarnerusoq, iperagaannginnerminni iperartorneqarput. (Apustilit Suliaat 5:27-29, 40) Aammattaaq „piffissaq nalaatsornikkullu pisut“ aalajangikkatsinnut ajortumik sunniuteqarsinnaapput. (Oqaluussisartup oqaasii 9:11, NV) Eqqortumik aalajangeraluarluta arlaatigut ajornartorsiulerutta qularissanngilarput Jehovap pinertusaarnissamut ikiorumaaraatigut naggataatigullu pilluaqqujumaaraatigut. — 2 Korinthimiut 4:7.

19. Aalajangernermut tunngatillugu qanoq ililluta sapiilluta nammagassarput nammineq nammassinnaavarput?

¹⁹ Tassa aalajangigassaqaraangatta Biibilimi najoqqutassianik naleqquttunik ujaasisariaqarpugut taakkualu atorniarneranni eqqarsarsinnaassuserput atortariaqarlugu. Jehovap anersaani illernartoq uppeqatillu inersimalluartut aqqutigalugit uagutsinnik ikiuineranik qujamasuutiginninnissamut pissutissaqarluarpugut. Siunnersuutit iluaqutissallu tamakku eqqarsaatigalugit sapiilluta nammagassarput nammineq nammatsigu silatusaartumik aalajangertarnitsigut.

Suut ilikkarpavut?

• Silatusaartumik aalajangissagaanni suna pingaaruteqartupilussuua?

• Inersimassummut siumukarnerput ikinngutinik toqqaanitsinnut qanoq sunniuteqassava?

• Aalajangersimasumik suliffittaassanerluta aalajangissagaangatta pingaarutillit suut eqqarsaatigisariaqarpavut?

• Aalajangigassaqaraangatta suut iluaqutigisinnaavavut?

[Atuaqqissaarnermi apeqqutit]

[Qupp. 23-mi assiliartaq]

Adamip Evallu naalannginnerat pingaarutilimmik ilinniutigaarput

[Qupp. 25-mi assiliartaq]

Pingaarutilimmik aalajangigaqartinnata Biibilimi najoqqutassianik naleqquttunik ujaaseqqaartariaqarpugut