“Cada un Lo Carga Su Mes Carga”

“Cada un di nos lo duna cuenta di su mes na Dios.”—ROMANONAN 14:12.

1. Ki responsabilidad tres hoben Hebreo a cumpli cu ne fielmente?

TRES hoben Hebreo cu tawata biba den Babilonia a confronta un decision di bida y morto. Acaso nan lo mester buig pa e imagen inmenso, manera lei di e pais a rekeri? Of nan lo mester nenga di ador’e y ser tira den un forno di candela cayente cayente? Sadrak, Mesak y Abed-nego no tawatin tempo pa consulta cu ningun hende; ni nan no tawatin nodi haci esei. Sin basila nan a declara: “Sea sigur, o rei, cu nos no ta bai sirbi bo diosnan, ni adora e imagen di oro cu bo a lanta.” (Daniel 3:1-18) E tres Hebreonan a carga nan mes carga di responsabilidad.

2. Ken eigenlijk a tuma decision pa Pilato relaciona cu Hesucristo, y esei a libra e gobernado Romano di responsabilidad?

² Mas o menos seis siglo despues, e gobernado a tende e acusacionnan contra e homber. Despues di analisa e caso, e ta keda combenci cu e acusado ta inocente. Ma e multitud ta exigi su ehecucion. Despues di a purba resisti e demanda ei, e gobernado ta demostra cu e no ta dispuesto pa hiba su carga di responsabilidad y e ta sucumbi na e presion. Labando su mannan, e ta declara: “Mi ta inocente di e sanger di e homber husto aki.” Anto e ta entrega e homber pa e ser claba na staca. Si, en bes di Poncio Pilato carga su responsabilidad di tuma un decision relaciona cu Hesucristo, e ta laga otro hende dicidi p’e. Ni maske cuanto awa el a uza pa laba su man, esei no por absolv’e di e responsabilidad di a dicta e sentencia inhusto ei contra Hesus.—Mateo 27:11-26; Lucas 23:13-25.

3. Dicon nos no mester laga otro hende tuma decision pa nos?

³ Kico di abo? Ora abo tin cu tuma decision, bo ta manera e tres Hebreonan, of bo ta laga otro hende tuma decision pa bo? Tumamento di decision no ta facil. Un persona mester ta madura pa tuma decisionnan corecto. Por  ehempel, mayornan tin cu tuma bon decision pa nan yiunan menor di edad. Claro cu tumamento di decision ta masha dificil ora cu un situacion ta complica y tin varios factor cu mester tuma na cuenta. Sinembargo, e responsabilidad di tuma decision no ta asina pisa cu mester inclui e entre e pesonan—of cosnan cu ta causa dificultad—cu rumannan cu tin e debido ‘cualidadnan spiritual’ lo tin cu yuda nos carga. (Galationan 6:1, 2) Al contrario, e ta un carga pa cua “cada un di nos lo duna cuenta di su mes na Dios.” (Romanonan 14:12) Bijbel ta declara: “Cada un lo carga su mes carga.” (Galationan 6:5) Pues, con nos por tuma decisionnan sabi den bida? Na prome luga, nos tin cu reconoce nos limitacionnan como hende y siña kico nos tin mester pa compensa nan.

Un Rekisito Esencial

4. Ki les sumamente importante tocante tumamento di decision nos mester siña for di e desobediencia di e prome pareha humano?

⁴ Na principio di historia humano, e prome pareha a tuma un decision cu a trece consecuencianan desastroso. Nan a dicidi di come di e fruta di e palo di conocemento di bon y malo. (Genesis 2:16, 17) A base di kico nan a tuma nan decision? Bijbel ta bisa: “E mohe a mira cu e palo tawata bon pa cuminda, y cu e tawata un delicia pa bista, y cu e palo tawata deseabel . . . el a cohe di su fruta y a come; y el a duna su esposo tambe [“ora e”, NW] tawata hunto cu ne, y el a come.” (Genesis 3:6) Eva su decision tawata basa riba deseo egoista. Su accion a pone Adam haci mescos. Como resultado, pica y morto “a pasa pa tur hende.” (Romanonan 5:12) Adam cu Eva su desobediencia mester siña nos un les sumamente importante relaciona cu hende su limitacion: A menos cu hende pega na Dios su guia, tin hopi chens cu nan ta tuma decisionnan robes.

5. Ki guia Yehova a percura pa nos, y kico nos tin cu haci pa beneficia di dje?

⁵ Nos por ta hopi contento cu Yehova Dios no a laga nos sin guia! E Scritura ta bisa nos: “Bo horea lo tende un palabra tras di bo ta bisa: ‘Esaki ta e caminda, cana den dje’, ki ora cu boso bira na man drechi of na man robes.” (Isaias 30:21) Yehova ta papia cu nos pa medio di su Palabra inspira, e Bijbel. Nos tin cu studia e Scritura y haya un conocemento exacto di loke e ta bisa. Pa tuma decisionnan corecto, nos mester come “cuminda solido [cu] ta pa hende madura.” Tambe ‘pa medio di practica, nos tin nos mente entrena pa discerni loke ta bon y loke ta malo.’ (Hebreonan 5:14) Nos por entrena nos capasidad di discerni door di aplica loke nos ta siña for di e Palabra di Dios.

6. Kico ta necesario pa nos consenshi funciona bon?

⁶ Un factor esencial den e proceso di tuma decision ta e don di consenshi cu nos a hereda. Nos consenshi tin e capasidad di husga nos, y e por ‘acusa nos of defende nos.’ (Romanonan 2:14, 15) Pero pa nos consenshi funciona bon, e mester ser entrena door di e conocemento exacto di e Palabra di Dios y wordo haci sensitivo door di aplica e Palabra ei. Un consenshi cu no ta entrena ta ser influencia facilmente pa custumbernan local. Nos ambiente y e opinionnan di otro hende tambe por guia nos den caminda robes. Kico ta pasa cu nos consenshi si  bes tras bes nos ta ignor’e ora cu e ta pui nos y nos ta viola Dios su normanan? Cu tempo nos consenshi por bira marca “como si fuera ta cu hero cayente esaki a wordo haci.” Es decir, mescos cu cuero kima y tapa cu cicatris, e ta bira sin heful y e no ta reacciona mas riba estimulo. (1 Timoteo 4:2) Di otro banda, un consenshi entrena door di e Palabra di Dios ta un guia confiabel.

7. Menciona un rekisito esencial den tumamento di decisionnan sabi.

⁷ Pues anto, un rekisito esencial pa carga e responsabilidad di tuma decisionnan sabi ta conocemento exacto di e Scritura y e capasidad di aplica loke e ta bisa. En bes di tuma decisionnan pura y descabeya, nos mester tuma tempo pa busca principionan biblico y uza nos capasidad di pensa pa aplica nan. Asta ora nos ta haya nos tin cu tuma un decision al momento—manera tawata e caso cu Sadrak, Mesak y Abed-nego—nos lo ta bon prepara si nos tin conocemento exacto di e Palabra di Dios y a uz’e pa entrena nos consenshi. Laga nos considera dos area den bida pa asina nos por compronde con ora nos ta sigui haci esfuerso pa yega na madures esei lo por mehora nos habilidad di tuma decision.

Ken Nos Mester Scohe pa Asocia cu Ne?

8, 9. (a) Ki principionan ta mustra cu ta necesario pa evita mal asociacion? (b) Mal asociacion ta nifica solamente amistad direct cu hende sin principio? Splica.

⁸ Apostel Pablo a skirbi: “No laga hende gaña boso: Mal compania ta daña bon custumber.” (1 Corintionan 15:33) Hesucristo a bisa su disipelnan: ‘Boso no ta parti di mundo.’ (Huan 15:19) Ora nos a siña e principionan aki, nos a compronde mesora cu ta necesario pa evita amistad cu fornicado, adultero, ladron, burache y otro hendenan asina. (1 Corintionan 6:9, 10) Pero segun cu nos ta haya mas conocemento di berdad biblico, nos ta bin realisa cu ta mesun perhudicial pa pasa tempo cu e tipo di hendenan ei door di wak nan den pelicula, na television, riba computer of door di lesa tocante nan den buki. Esei ta e caso tambe ora nos ta asocia via chat room di Internet cu hende “hipocrita”, kendenan ta sconde loke nan ta.—Salmo 26:4.

⁹ Kico di amistad intimo cu hende cu kisas ta moralmente limpi pero cu no tin fe den e Dios berdadero? E Scritura ta bisa nos: “Henter mundo ta bou di control di e malbado.” (1 Huan 5:19) Pues esaki ta yuda nos compronde cu mal asociacion no ta solamente hendenan cu tin un actitud mucho permisivo of cu ta sin moral. Pesei lo ta sabi di nos parti pa cultiva amistad intimo solamente cu hende cu stima Yehova.

10. Kico ta yuda nos tuma decisionnan maduro relaciona cu nos contacto cu e mundo?

¹⁰ Pero no ta posibel ni ta un rekisito pa evita tur tur contacto cu hende den mundo. (Huan 17:15) Participacion den e ministerio cristian, baimento di scol of trabou, tur ta envolve contacto cu e mundo. Un cristian cu ta casa cu un persona no creyente kisas ta hay’e tin cu asocia cu hende di mundo, mas cu den caso di otro cristiannan. Sinembargo, door di entrena nos capasidad di discerni nos ta compronde cu contacto limita cu e mundo kisas ta necesario, pero cu esei ta completamente un otro cos for di cultiva lasonan intimo cu ne. (Santiago 4:4) Pues, nos ta capasita pa tuma decisionnan maduro encuanto nos participacion den actividadnan escolar cu no ta parti di e lesnan di scol, manera evenementonan deportivo y baliamento, of asisti na comemento y fiesta organisa pa coleganan di trabou.

Scohemento di Empleo

11. Kico ta e prome cos cu nos tin cu tuma na cuenta ora di tuma decision tocante trabou?

¹¹ Aplicacion di principionan biblico den un manera maduro ta yuda nos tuma decisionnan relaciona cu e manera cu nos ta cumpli cu nos obligacion di ‘provee pa e hendenan di nos cas.’ (1 Timoteo 5:8) E prome cos cu nos tin cu tuma na cuenta ta e tipo di trabou, kico ta e  taakomschrijving. Scohemento di un tipo di trabou cu ta apoya algo cu Bijbel ta condena directamente, definitivamente ta malo. Pues, cristiannan berdadero no ta acepta trabounan cu ta encera idolatria, hortamento, maluzo di sanger of otro practicanan cu ta contra Bijbel. Tampoco nos lo no gaña of comete fraude, ni sikiera si un doño di trabou ta exigi esei di nos.—Echonan 15:29; Revelacion 21:8.

12, 13. Cua ta algun factor, fuera di e tipo di trabou mes, cu ta importante ora di tuma decision relaciona cu empleo?

¹² Kico si e trabou riba su mes no ta viola ningun rekisito di Dios spesificamente? Segun cu nos ta haya mas conocemento di e berdad y nos capasidad di discerni ta bira mihor, nos ta bin ripara otro factornan cu mester tuma na cuenta. Kico si e trabou ta envolve nos den un practica contrario na principionan biblico, manera por ehempel contesta telefon na un establecimento di wega di placa? E fuente di bo salario y e sitio di e empleo tambe ta factornan cu nos tin cu tuma na cuenta. Por ehempel, un cristian cu ta contratista lo entrega un oferta pa ferf un di e misanan di cristiandad y asina apoya religion falso?—2 Corintionan 6:14-16.

¹³ Kico si na un ocasion nos doño di trabou acepta un contract pa ferf un luga di adoracion falso? Den e caso aki, nos lo tin cu considera factornan manera te con leu nos tin autoridad riba loke ta ser haci y te na ki grado nos tin cu participa den e trabou. Awor, kico di rindi servicionan cu no ta contra normanan biblico, manera por ehempel entrega post tur caminda den un comunidad, incluso na luganan cu ta promove practicanan robes? Den tal caso, e principio cu tin na Mateo 5:45 lo no influencia nos decision? Un punto cu nos no mester pasa por halto ta con e echo cu nos tin cu haci un trabou dia aden dia afo lo por afecta nos consenshi. (Hebreonan 13:18) En berdad, hiba nos carga di responsabilidad ora di tuma decisionnan maduro relaciona cu empleo ta rekeri pa nos haci nos capasidad di discerni mas skerpi y entrena e consenshi cu Dios a duna nos.

“Den Tur Bo Camindanan Reconoc’e”

14. Ora di tuma decision, kico semper nos mester haci?

¹⁴ Kico di e decisionnan cu nos ta tuma relaciona cu otro asuntonan, manera por ehempel sigui tras di educacion escolar y acepta of rechasa cierto tratamento medico? Ora di tuma cualkier decision, nos tin cu haci sigur cua principionan biblico ta al caso, anto uza nos capasidad mental pa aplica nan. Rei sabi Salomon di Israel di antiguedad a bisa: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.”—Proverbionan 3:5, 6.

15. Kico nos ta siña for di e cristiannan di prome siglo tocante tumamento di decision?

¹⁵ Hopi bes, e decisionnan cu nos ta tuma tin efecto riba otro hende y nos tin cu tene cuenta cu esaki. Por ehempel, e cristiannan di prome siglo no tawata bou di hopi di e restriccionnan di cuminda di e Lei di Moises mas. Nan por a dicidi di come cierto cumindanan cu bou di e Lei tawata impuro pero cu den otro  aspecto no tawata inaceptabel. Sinembargo, relaciona cu carni di un bestia cu lo por tawatin algun conexion cu tempel di idolo, apostel Pablo a skirbi: “Si cuminda ta haci mi ruman trompica, lo mi no come carni nunca mas, pa mi no haci mi ruman trompica.” (1 Corintionan 8:11-13) Pablo a anima e cristiannan di prome siglo pa tene consideracion cu e consenshi di otro hende pa asina no laga nan trompica. Pues, nos decisionnan no mester laga nos “bira causa di tropieso.”—1 Corintionan 10:29, 32, NW.

Busca e Sabiduria di Dios

16. Con oracion por yuda nos ora di tuma decision?

¹⁶ Un yudansa sumamente balioso den tumamento di decision ta oracion. Disipel Santiago a bisa: “Si cualkier di boso falta sabiduria, lag’e pidi Dios, kende ta duna na tur hende generosamente y sin reproche, y esaki lo wordo duna na dje.” (Santiago 1:5) Pues cu confiansa nos por acudi na Yehova den oracion y pidie e sabiduria necesario pa tuma decisionnan corecto. Segun cu nos ta papia cu e Dios berdadero tocante nos precupacionnan y ta busca su guia, spirito santo lo por yuda nos compronde mas mihor e textonan biblico cu nos ta considerando y laga nos corda riba esnan cu kisas nos a pasa por halto.

17. Con otro hende por yuda nos den e proceso di tuma decision?

¹⁷ Otro hende por yuda nos tuma decision? Si, Yehova a percura personanan maduro den e congregacion. (Efesionan 4:11, 12) Nos por consulta nan, specialmente si ta trata di un decision grandi. Personanan cu tin un perspicasia spiritual profundo y cu tin experencia den bida, por hala nos atencion na principionan biblico adicional cu lo por tin un influencia riba nos decision y yuda nos “haci sigur di e cosnan mas importante.” (Filipensenan 1:9, 10, NW) Sinembargo, un palabra di cautela ta na su luga: Nos mester tene cuidou pa nos no laga otro hende tuma decision pa nos. E carga di responsabilidad, ta nos mes tin cu carg’e.

E Resultado Tur Biaha Ta Bon?

18. Kico nos por bisa tocante e resultado di un bon decision?

¹⁸ Acaso tur biaha decisionnan cu ta firmemente basa riba principionan biblico y tuma cuidadosamente ta hiba na un bon resultado? Si, riba termino largo. Pero tin biaha, riba termino cortico e efecto por ta desfaborabel. Sadrak, Mesak y Abed-nego tawata sa cu morto lo por tawata e resultado di nan decision di no adora e imagen inmenso. (Daniel 3:16-19) Asina tambe, despues cu e apostelnan a bisa e Corte Supremo Hudiu cu nan tin cu obedece Dios mas cu hende, nan a ser suta prome cu a laga nan bai. (Echonan 5:27-29, 40) Ademas, “tempo y suseso imprevisto” lo por tin un efecto desfaborabel riba cualkier decision. (Eclesiastes 9:11, NW) Si den un manera of otro nos haya nos cu problema apesar di a tuma un decision corecto, nos por tin sigur cu Yehova lo yuda nos persevera y lo bendiciona nos na final di cuenta.—2 Corintionan 4:7.

19. Con nos por carga cu curashi nos mes carga di responsabilidad ora di tuma decision?

¹⁹ Pues anto, ora di tuma decision nos tin cu busca principionan biblico y uza nos capasidad di pensa pa aplica nan. Nos por ta hopi gradicido pa e yudansa cu Yehova a percura pa medio di su spirito santo y e rumannan maduro den congregacion. Pa medio di tal guia y percuracionnan, laga nos carga cu curashi nos mes carga di responsabilidad pa tuma decisionnan sabi.

Kico Bo A Siña?

• Cua ta un rekisito esencial pa bo por tuma bon decision?

• Con e echo cu nos ta progresa na madures ta influencia ken nos ta scohe pa anda cu ne?

• Cua ta algun factor importante cu nos mester tene na cuenta ora di tuma decision relaciona cu empleo?

• Ki yudansa tin disponibel pa ora di tuma decision?

[Preguntanan di Estudio]

[Plachi na pagina 22]

E desobediencia di Adam cu Eva ta siña nos un les sumamente importante

[Plachi na pagina 24]

Prome cu bo tuma un decision importante, busca principionan biblico