“Ta te taata nei hopoia ei nia ïa ia ˈna iho”
“Ta te taata nei hopoia ei nia ïa ia ˈna iho”
“E hope roa tatou atoa i te faˈi i te parau ia ˈna iho i te Atua ra.”—ROMA 14:12.
1. Eaha te hopoia ta e toru Hebera i amo maite?
E TORU Hebera apî e ora ra i Babulonia te rave i te hoê faaotiraa faufaa roa. E tipapa anei ratou i raro i mua i te hoê tii rahi e tia ˈi, mai ta te ture o te fenua e titau ra? Aore ra e patoi anei ratou i te haamori i te reira e tia ˈi noa ˈtu e e hurihia ratou i roto i te umu auahi ura? Aita e taime to Sadaraka, Meseka, e Abede-nego no te ani i te aˈoraa i te tahi mau taata; aita atoa e faufaa ia na reira. E parau ratou ma te feaa ore e: “E ore â matou e haamori i to oe ra mau atua, ia ite mai oe, e te arii, e ore hoi e haamori i te tii auro i faatiahia e oe ra.” (Daniela 3:1-18) Ua amo na Hebera e toru i ta ratou iho hopoia.
2. Na vai mau â i rave i te faaotiraa a Pilato no nia ia Iesu Mesia, e ua faatiamâ mai anei te reira i te tavana Roma i ta ˈna hopoia?
2 Fatata e ono senekele i muri aˈe, ua faaroo te tavana i te mau pariraa i te taata ra. Ia ˈna i hiˈopoa i te tupuraa, papu aˈera ia ˈna e aita e hara ta te taata parihia. E ani râ te nahoa ia haapohehia oia. I muri aˈe i to ˈna patoi-rii-raa ˈtu, eita te tavana e hinaaro e amo i ta ˈna hopoia e e fati oia i te faaheporaa. Ma te horoi i to ˈna rima, e parau oia e: “Aita a ˈu hara i te toto o teie nei taata parau-tia.” E tuu oia i te taata ra ia patǐtǐhia i nia i te raau. Oia, aita Ponotio Pilato i amo i ta ˈna hopoia e rave i te hoê faaotiraa no nia ia Iesu Mesia, ua vaiiho râ oia ia vetahi ê ia faaoti no ˈna. Noa ˈtu ehia taime to Ponotio Pilato horoiraa i to ˈna rima, o ˈna noa iho â te tumu o te utua tano ore i nia ia Iesu.—Mataio 27:11-26; Luka 23:13-25.
3. No te aha eiaha ˈi e vaiiho ia vetahi ê ia rave i te faaotiraa no tatou?
3 E o outou? Ia titauhia outou ia rave i te mau faaotiraa, mai na Hebera e toru anei outou, aore ra e vaiiho outou ia vetahi ê ia faaoti no outou? E ere i te mea ohie ia rave i te mau faaotiraa. E titauhia te feruriraa paari no te rave i te mau maitiraa maitai. Ei hiˈoraa, e mea tia ia rave te mau metua i te mau faaotiraa maitai no ta ratou mau tamarii aitâ i naea te matahiti. Parau mau, mea fifi roa ia rave i te hoê faaotiraa mai te peu e mea fifi te tupuraa e mea rahi te mea e titauhia ia feruri maite. E ere râ te raveraa i te mau faaotiraa i te hoê hopoia teimaha roa, a tuuhia ˈtu ai te reira i rotopu i “te mau mea teimaha” ta te feia e ‘huru maitatai pae varua’ to ratou e nehenehe e amo no tatou. (Galatia 6:1, 2, MN) E ere, e hopoia râ ta ‘tatou paatoa e faˈi i te parau ia tatou iho i te Atua.’ (Roma 14:12) “Ta te taata nei hopoia ei nia ïa ia ˈna iho e ati noa ˈˈe,” ta te Bibilia ïa e parau ra. (Galatia 6:5) E nafea ïa tatou e nehenehe ai e rave i te mau faaotiraa paari i roto i te oraraa? Na mua, e titauhia ia farii tatou i to tatou mau taotiaraa taata e ia ite eaha te hinaarohia no te mono i te reira.
Te hoê titauraa faufaa roa
4. Eaha te haapiiraa faufaa roa no nia i te raveraa i te mau faaotiraa e mea maitai ia huti mai tatou na roto i te faaroo ore o na taata faaipoipo matamua?
4 I te omuaraa o te tuatapaparaa taata, ua rave na taata faaipoipo matamua i te hoê faaotiraa o tei hopoi mai i te mau faahopearaa ino mau. Ua maiti raua i te amu i to te raau e ite ai i te maitai e te ino. (Genese 2:16, 17) Eaha te niu o ta raua faaotiraa? “Ite aˈera te vahine, e raau maitai ei maa, e te au hoi i te mata ia hiˈo atu, e te raau hinaaro hoi ia noaa te ite,” ta te Bibilia ïa e parau ra. “Ua rave ihora oia i te maa no nia i taua raau ra, amu ihora, hopoi atura hoi i ta te tane, amu atoa ihora hoi oia.” (Genese 3:6) Ua niuhia ta Eva maitiraa i nia i te hinaaro miimii. Ua turai ta ˈna ohipa ia Adamu ia pee ia ˈna. Ei faahopearaa, ‘ua taeahia te taata atoa’ e te hara e te pohe. (Roma 5:12) E mea maitai ia horoa mai te faaroo ore o Adamu raua Eva i te hoê haapiiraa faufaa roa no nia i te mau taotiaraa o te taata: Mai te peu e eita oia e pee i te aratairaa a te Atua, e riro te taata i te rave i te mau faaotiraa tano ore.
5. Eaha te aratairaa ta Iehova i horoa mai, e ia aha tatou e tia ˈi ia faufaahia tatou i te reira?
5 E tia mau â ia tatou ia oaoa e ua horoa mai te Atua ra o Iehova i te aratairaa! Te na ô maira te mau Papai e: “Na to outou tariˈa e faaroo i te hoê reo i muri mai ia outou, i te na ôraa e, Teie te eˈa: e na reira i te haere, ia haapehao ê i te pae atau e te pae aui.” (Isaia 30:21) Te paraparau maira Iehova na roto i ta ˈna Parau faaurua, te Bibilia. Ia haapii tatou i te mau Papai e ia noaa mai te ite mau i te reira e tia ˈi. No te rave i te mau maitiraa tano, e titauhia ia amu tatou i ‘te maa etaeta a te taata paari.’ “Na roto i te faaohiparaa,” e ‘mataro atoa to tatou puai haroaroaraa i te faataa ê i te maitai e te ino.’ (Hebera 5:14; MN) E nehenehe tatou e haamataro i to tatou puai haroaroaraa ma te faaohipa i ta tatou e haapii mai i roto i te Parau a te Atua.
6. Eaha te titauhia ia ohipa maitai to tatou manaˈo haava?
6 No te rave i te mau faaotiraa, mea faufaa roa to tatou manaˈo haava i tutuuhia mai. E nehenehe ta te reira e haava mai, e e nehenehe tatou e ‘parihia aore ra e faatiahia’ e te reira. (Roma 2:14, 15) Ia ohipa maitai râ to tatou manaˈo haava, e mea tia ia haamaramaramahia te reira e te ite mau i te Parau a te Atua e ia haaputapûhia maoti te faaohiparaa i taua Parau ra. E pee haere noa te hoê manaˈo haava aita i haamaramaramahia i te mau tutuu e peu o te fenua. E nehenehe atoa te mau mea e haaati ra ia tatou e te mau manaˈo o vetahi ê e aratai hape ia tatou. Eaha te tupu i nia i to tatou manaˈo haava ia tâuˈa-ore-noa-hia ta ˈna mau faaararaa e ia ofatihia te mau ture aveia a te Atua? E nehenehe te manaˈo haava e “pao roa” i te pae hopea, e riro mai te iˈo paapaa tapoˈihia i te iri paira—etaeta e te tâuˈa ore. (Timoteo 1, 4:2) Area te hoê manaˈo haava i haamatarohia e te Parau a te Atua, e aratai papu ïa.
7. Eaha te hoê titauraa faufaa roa no te rave i te mau faaotiraa paari?
7 No reira, te hoê titauraa faufaa roa no te amo i te hopoia e rave i te mau faaotiraa paari, o te ite mau ïa i te mau Papai e te neheneheraa e faaohipa i te reira. Eiaha tatou e ru noa i te rave i te mau faaotiraa ma te feruri ore, e titauhia râ ia rave tatou i te taime no te imi i te mau faaueraa tumu bibilia e ia faaohipa i to tatou puai feruriraa no te haapao i te reira. Ia ani-atoa-hia tatou ia rave oioi i te hoê faaotiraa—mai ia Sadaraka, Meseka, e Abede-nego—ua ineine maitai tatou mai te peu e e ite mau to tatou i te Parau a te Atua e ua haamatarohia to tatou manaˈo haava i te reira. No te taa e nafea te haereraa i mua i te paari mau ra e nehenehe ai e haamaitai ia tatou ia rave i te mau faaotiraa, e hiˈo mai tatou e piti tuhaa o te oraraa.
O vai ma ta tatou e amuimui atu?
8, 9. (a) Eaha na faaueraa tumu e faaite ra i te faufaaraa ia ape i te mau amuimuiraa iino? (b) Te mau amuimuiraa iino, o te faahoa-roa-raa ˈtu noa anei i te feia aita e faaueraa tumu ta ratou? A faataa.
8 “Eiaha e vare,” ta te aposetolo Paulo ïa i papai, ‘e ino te [peu faufaa] i te mau amuimuiraa iino.’ (Korinetia 1, 15:33; MN) Ua parau Iesu Mesia i ta ˈna mau pǐpǐ e: “E ere outou i to teie nei ao.” (Ioane 15:19) Ia haapii tatou i teie nau faaueraa tumu, e taa oioi ia tatou te faufaaraa ia ape i te faahoa i te feia taiata, te faaturi, te taero ava, e vetahi atu mai ia ratou. (Korinetia 1, 6:9, 10) A rahi noa ˈtu ai râ to tatou ite i te parau mau bibilia, e taa ia tatou e mea ino ia amuimui i tera mau taata ma te mataitai ia ratou i roto i te mau hohoˈa tavirihia, te afata teata, aore ra te roro uira aore ra ma te taio i to ratou aamu i roto i te mau buka. Oia atoa ia apiti i te mau aparauraa i nia i te Internet e “te feia haavare.”—Salamo 26:4.
9 E te amuimui-roa-raa ïa i te feia maitai paha i te pae morare, aita râ e tiaturi ra i te Atua mau? Te na ô maira te mau Papai: “Te vai noa nei to te ao atoa i raro aˈe i taua varua ino ra.” (Ioane 1, 5:19) Te tauturu ra te reira ia tatou ia haroaroa e te mau amuimuiraa iino, e ere noa ïa o te feia huru faatia noa aore ra morare ore. No reira, e haerea paari ia atuatu tatou i te auhoaraa piri roa e te feia noa e here ra ia Iehova.
10. Eaha te tauturu ia tatou ia rave i te mau faaotiraa paari no nia i to tatou taairaa e teie nei ao?
10 Eita e tia e aita atoa e titauhia ra ia ape roa tatou i te feia o teie nei ao. (Ioane 17:15) E farerei tatou i te feia o teie nei ao ia apiti tatou i te taviniraa Kerisetiano, ia haere tatou i te haapiiraa e i te ohipa. Hau aˈe i te tahi atu, e farerei pinepine paha te hoê Kerisetiano e ere to ˈna hoa faaipoipo i te Ite no Iehova, i te feia o teie nei ao. Mai te peu râ e ua haamatarohia to tatou puai haroaroaraa, e taa ia tatou e mea ê te taotiaraa i to tatou taairaa e teie nei ao e mea ê te atuaturaa i te mau taairaa piri e teie nei ao. (Iakobo 4:4) No reira, e tia ia tatou ia rave i te mau faaotiraa paari no nia anei i te apitiraa i te tahi mau ohipa hau i te fare haapiiraa, mai te mau haa tuaro e te ori, e te haereraa i te mau arearearaa e tamaaraa na te mau hoa ohipa.
Maitiraa i te ohipa
11. Eaha te hiˈo na mua ia rave tatou i te faaotiraa i te pae ohipa?
11 E tauturu te faaohiparaa i te mau faaueraa tumu bibilia ma te feruriraa paari ia tatou ia faaoti e nafea ia amo i ta tatou hopoia e ‘hamani maitai i to tatou utuafare.’ (Timoteo 1, 5:8) E hiˈo tatou na mua i te huru o te ohipa—ta te reira e titau ra ia rave tatou. E mea ino roa ia maiti i te hoê huru ohipa o te turu ra i te mau mea ta te Bibilia e faahapa roa ra. No reira, eita te mau Kerisetiano mau e farii i te mau ohipa i taaihia i te haamoriraa idolo, te eiâraa, te faaohipa-hape-raa i te toto, aore ra te tahi atu mau peu bibilia ore. Eita atoa tatou e haavare aore ra e taviri, noa ˈtu e e faaue mai te hoê paoti.—Ohipa 15:29; Apokalupo 21:8.
12, 13. Hau atu i te huru o te ohipa, eaha te tahi atu mau mea e mea faufaa i roto i ta tatou faaotiraa i te pae ohipa?
12 E te ohipa ïa aita e ofati roa ra i te tahi titauraa a te Atua? A rahi noa ˈi to tatou ite i te parau mau e a maitai noa ˈtu ai to tatou puai haroaroaraa, e taa ia tatou te tahi atu mau titauraa e mea tia ia hiˈohia. E nafea tatou ia turai tera ohipa ia tatou ia rave i te tahi peu bibilia ore, mai te pahonoraa paha i te niuniu paraparau i roto i te hoê taiete pereraa? E mea tia atoa ia hiˈo i te taiete o te aufau ia tatou e te vahi raveraa ohipa. Ei hiˈoraa, e farii anei te hoê Kerisetiano patu fare o ˈna iho te paoti i te hoê ohipa e peni i te hoê fare pure a te Amuiraa faaroo Kerisetiano, a turu atu ai ïa i te haapaoraa hape?—Korinetia 2, 6:14-16.
13 E nafea tatou ia farii to tatou paoti i te peni i te hoê vahi haamoriraa hape? I roto i teie tupuraa, e mea tia ia hiˈo i te aanoraa o to tatou mana i nia i te ohipa e ravehia ra e te faito o to tatou apitiraa ˈtu. E te hoê ohipa tano ïa, mai te opere-haere-raa i te mau rata e ati aˈe te hoê oire, tae noa ˈtu i te mau vahi e turu ra i te mau peu ino? Eita anei te faaueraa tumu o te Mataio 5:45 e tauturu ia tatou i roto i ta tatou faaotiraa? Eiaha e haamoe i te faahopearaa o te rave-tamau-raa i te ohipa i nia i to tatou manaˈo haava. (Hebera 13:18) Oia mau, no te amo i ta tatou hopoia e rave i te mau faaotiraa paari no nia i te ohipa, e titauhia ia haamaitai tatou i to tatou puai haroaroaraa e ia haamataro i to tatou manaˈo haava horoahia mai e te Atua.
“Eiaha e haamoe ia ˈna i to oe atoa ra mau haerea”
14. No te rave i te mau faaotiraa, e mea titauhia ia hiˈo noa tatou i te aha?
14 E ta tatou ïa mau faaotiraa no nia i te tahi atu mau mea, mai te haereraa i te haapiiraa teitei e te fariiraa aore ra te patoiraa i te tahi ravea rapaauraa? I mua i te mau faaotiraa atoa, e titauhia ia hiˈo maitai tatou i te mau faaueraa tumu bibilia e tano e ia faaohipa i to tatou puai feruriraa no te haapao i te reira. “E tiaturi ia Iehova ma to aau atoa ra; eiaha râ e tiaturi i to oe ihora [maramarama],” ta Solomona ïa, arii paari o Iseraela i tahito ra, i parau. “Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea.”—Maseli 3:5, 6; MN.
15. Eaha ta tatou e haapii mai na roto i te mau Kerisetiano no te senekele matamua no nia i te raveraa i te mau faaotiraa?
15 E pinepine, e ohipa te mau maitiraa ta tatou e rave i nia ia vetahi ê, ia feruri ïa tatou i te reira e tia ˈi. Ei hiˈoraa, aita faahou te mau Kerisetiano no te senekele matamua i raro aˈe e rave rahi taotiaraa i te pae maa a te Ture a Mose. E nehenehe ratou e maiti i te amu i te tahi mau maa i hiˈohia na ei mea viivii i raro aˈe i te Ture e aita e faahapahia ra i roto i te tahi atu mau tuhaa. Ua papai râ te aposetolo Paulo no nia i te iˈo o te hoê animara tei taaihia paha i te hoê idolo i te hiero: “Ia maheaitu tau taeae i te maa ra, e ore roa vau e amu i te puaa, oi maheaitu mai tau taeae ia ˈu.” (Korinetia 1, 8:11-13) Te faaitoitohia ra te mau Kerisetiano matamua ia faatura i te manaˈo haava o vetahi ê ia ore ratou e maheaitu. Eiaha vetahi ê “ia maheaitu” i ta tatou mau faaotiraa.—Korinetia 1, 10:29, 32.
A imi i te paari o te Atua
16. E nafea te pure e tauturu ai ia tatou ia rave i te mau faaotiraa?
16 O te pure te tahi atu tauturu faufaa roa no te rave i te mau faaotiraa. “Te ere ra . . . te hoê o outou i te [paari],” ta te pǐpǐ Iakobo ïa e parau ra, “e ani oia i te Atua ra, o tei horoa hua mai i te maitai i te taata atoa ra, ma te patoi ore; e e horoahia mai ta ˈna.” (Iakobo 1:5; MN) Ma te tiaturi, e nehenehe tatou e fariu ia Iehova ra i roto i te pure e e ani i te paari hinaarohia no te rave i te mau faaotiraa tano. Ia faaite tatou i to tatou mau tapitapi i te Atua mau e ia imi tatou i ta ˈna aratairaa, e nehenehe te varua moˈa e tauturu ia tatou ia maramarama maitai aˈe i te mau irava ta tatou e hiˈopoa ra e ia haamanaˈo i te mau irava i moe paha ia tatou.
17. E nafea vetahi ê e nehenehe ai e tauturu ia tatou ia rave i te mau faaotiraa?
17 E tia anei ia vetahi ê ia tauturu ia tatou ia rave i te mau faaotiraa? E, ua haamau Iehova i te mau taata feruriraa paari i roto i te amuiraa. (Ephesia 4:11, 12) E nehenehe ratou e farereihia, no te hoê faaotiraa rahi iho â râ. E nehenehe te feia e haroaroaraa hohonu to ratou i te pae varua e mea ite i te oraraa, e faaite mai i te tahi atu mau faaueraa tumu bibilia o te ohipa i nia i ta tatou faaotiraa e o te tauturu mai ia ‘[hiˈopoa] i te mau mea i hau i te maitai ra.’ (Philipi 1:9, 10; MN) A ara râ: E haapao maitai tatou e tia ˈi eiaha e vaiiho ia vetahi ê ia faaoti no tatou. Na tatou iho e amo i ta tatou hopoia.
Te faahopearaa—mea maitai noa anei?
18. Eaha te nehenehe e parau no nia i te faahopearaa o te hoê faaotiraa maitai?
18 E faahopearaa maitai noa anei to te mau faaotiraa i niu-papu-hia i nia i te mau faaueraa tumu bibilia e i ravehia ma te feruri maitai? E, no te hoê taime roa. I te tahi taime râ, mea ino te faahopearaa taime poto. Ua ite Sadaraka, Meseka, e Abede-nego e o te pohe te faahopearaa o ta ratou faaotiraa eiaha e haamori i te tii iti rahi. (Daniela 3:16-19) Oia atoa, i muri aˈe i to te mau aposetolo parauraa i te Sunederi ati Iuda e o te Atua ei upoo faatere ta ratou e faaroo e tia ˈi eiaha te taata, ua pǎpǎihia ratou hou ratou a tuuhia ˈtu ai. (Ohipa 5:27-29, 40) E nehenehe atoa ‘te tau e te tupuraa manaˈo-ore-hia’ e ohipa roa i nia i te faahopearaa o te mau faaotiraa atoa. (Koheleta 9:11, MN) Mai te peu e e fifi-rii-hia tatou noa ˈtu e ua rave tatou i te hoê faaotiraa maitai, e nehenehe tatou e tiaturi e e tauturu Iehova ia tatou ia faaoromai e e haamaitai oia ia tatou i te pae hopea.—Korinetia 2, 4:7.
19. E nafea tatou e nehenehe ai e amo ma te itoito i ta tatou hopoia e rave i te mau faaotiraa?
19 No reira, ia rave tatou i te mau faaotiraa, e mea tia ia imi tatou i te mau faaueraa tumu bibilia e ia faaohipa i to tatou puai feruriraa no te haapao i te reira. E nehenehe mau â tatou e mauruuru no te tauturu ta Iehova e horoa maira maoti to ˈna varua moˈa e te feia feruriraa paari i roto i te amuiraa! Maoti tera aratairaa e tera mau faanahoraa, e amo anaˈe ma te itoito i ta tatou hopoia e rave i te mau faaotiraa paari.
Eaha ta outou i haapii?
• Eaha te hoê titauraa faufaa roa no te rave i te mau faaotiraa maitai?
• E nafea te haereraa i mua i te paari e ohipa ˈi i nia i ta tatou maitiraa i te mau amuimuiraa?
• Eaha te tahi mau mea faufaa e titauhia ia hiˈo tatou ia rave tatou i te faaotiraa i te pae ohipa?
• Eaha te tauturu e vai ra no te rave i te mau faaotiraa?
[Uiraa haapiiraa]
[Hohoˈa i te api 12]
Te horoa maira te faaroo ore o Adamu raua Eva i te hoê haapiiraa faufaa roa
[Hohoˈa i te api 14]
Hou a rave ai i te hoê faaotiraa faufaa, a imi i te mau faaueraa tumu a te Atua