«Cada tobi de laanu zabidxi Dios cuenta»
«Cada tobi de laanu zabidxi Dios cuenta»
«Cada tobi de laanu zabidxi Dios cuenta» (ROMANOS 14:12).
1. ¿Xi responsabilidad gupa guionnaʼ hebreu que?
NAQUIIÑEʼ guicaa chonna joven hebreu ni nabeza Babilonia ti decisión nabé risaca, ne pur laani zahuinni pa zabánicabe o pa záticabe. ¿Ñee naquiiñeʼ guzuxíbicabe nezalú ti bidóʼ naro’ba’ casi ná ley stiʼ guidxi que la? ¿O zaca castigárcabe ne ziuucabe ndaaniʼ horno ra caya’qui’ que purtiʼ qué nácabe guni adorárcabe ni? Qué gapa Sadrac, Mesac ne Abednego tiempu para guinabadiidxacaʼ tuuxa. Ne laasicabe nga naquiiñeʼ guicaacabe decisión que. Ngue runi nagueendacaʼ guníʼcabe: «Rey, gúnnacaʼ ndiʼ, qué runi adorardu ca Dios stiluʼ ne qué zuni adorardu bidóʼ de oro ni bíʼniluʼ ca» (Daniel 3:1-18). Cada tóbicabe gúcacabe responsable de decisión ni gucuaacabe.
2. ¿Tu gucuaa decisión xi guniné Pilato Jesucristu? ¿Ñee gupa gobernador riʼ donda pur ni bi’ni’ riʼ la?
2 Ma’ gudiʼdiʼ xhoopaʼ gayuaa iza, cugaanicabe donda ique ti hombre ne maʼ bicaadiaga gobernador guiráʼ donda cugaanicabe íquebe que. Bidiibe cuenta qué gusaabiʼ hombre riʼ gastiʼ, peru guiráʼ binni que canábacaʼ gátibe. Nga runi, neca qué naʼ gobernador riʼ gúnini la? biʼniʼ ni ná ca binni que. Cumu qué nabe gácabe responsable de decisión ni gucuaabe que la? gudiibiʼ nabe ne rábibe laacaʼ: «Qué gapaʼ donda pa gatiʼ hombre riʼ». Ne óraque bidiibe lugar gucaacabe hombre riʼ lu ti yaga. Lugar de ñuni Poncio Pilato xhiiñaʼ jneza ne nicaa decisión xi nizaaca de Jesucristu la? laga bidiibe lugar guicaa xcaadxi decisión pur laabe. Neca gudiibiʼ náʼ Poncio Pilato, peru nápabe donda purtiʼ cadi jneza modo bi’ni’ juzgarbe Jesús (Mateo 27:11-26; Lucas 23:13-25).
3. ¿Xiñee cadi naquiiñeʼ gudiʼnu lugar guicaa xcaadxi binni decisión pur laanu?
3 ¿Yanna lii yaʼ? Ora caquiiñeʼ guicaaluʼ xiixa decisión, ¿rúniluʼ casi bi’ni’ guionna hebreu que la? ¿O rudiiluʼ lugar guicaa xcaadxi binni decisión pur lii? Cadi fácil diʼ nga guicaa tuuxa ti decisión jneza, purtiʼ naquiiñeʼ guiníʼ ique chaahuiʼ ante guni xiixa. Nga runi, ca padre ca nga naquiiñeʼ guicaacaʼ decisión pur ca xiiñicaʼ ni nahuiiniʼ ne jmaruʼ si raca nagana para tobi guicaa ti decisión jneza ora qué guidxelaʼ xi guni ne ora nuu stale cosa ni cucueeza laa. Peru neca zacá, zanda guicaa tuuxa ti decisión jneza. Nga runi, cadi caquiiñeʼ peʼ guyúbinu gacané ca ni napa ca cualidad stiʼ espíritu laanu lu guiráʼ ca guendanagana ni gápanu (Gálatas 6:1, 2). Purtiʼ «cada tobi de laanu zabidxi Dios cuenta» (Romanos 14:12). Biblia ná: «Cada tobi de laanu naquiiñeʼ guni cumplir né responsabilidad stiʼ» (Gálatas 6:5). Yanna, ¿ximodo zanda guicaanu decisión jneza lu xquendanabáninu yaʼ? Cadi guiaandaʼ laanu neca cadi guiráʼ cosa zanda gúninu, peru zanda guizíʼdinu gúninu ni jneza.
Ti cosa risaca ni naquiiñeʼ gúninu
4. ¿Xi ti cosa nabé risaca rizíʼdinu ra qué nuzuubaʼ Adán ne Eva diidxaʼ?
4 Dxi bizulú guyuu binni lu Guidxilayú riʼ gucuaa primé pareja que ti decisión ni bedané stale guendanagana. Gudócabe cuananaxhi stiʼ yaga de guendananna ni jneza ne ni cadi jneza (Génesis 2:16, 17). ¿Xiñee gucuaacabe decisión que yaʼ? Sicaríʼ ruzeeteʼ Biblia ni: «Biiyaʼ gunaa que galán cuananaxhi stiʼ yaga que para gó binni, ne sicarú rihuinni ni. Zacá nga laani, sicarú rihuinni yaga que. Pur ngue gucuaabe cuananaxhi stini ne gudobe ni. Despué, ora guyebe ra nuu xheelabe bidiibe laa cuananaxhi que ne laa bizulú gudó ni» (Génesis 3:6). Ni bi’ni’ Eva ca bisihuinni ruyubi puru si para laa ne bicaabe Adán guni zaqueca. Pur ni bíʼnicabe ca guyuu pecadu ne guendaguti «ne zacá gucuá guendaguti que guiráʼ binni» (Romanos 5:12). Ra qué nuzuubaʼ Adán ne Eva diidxaʼ que rusiidiʼ ni laanu ti cosa nabé risaca: pa qué guzúʼbanu stiidxaʼ Jehová la? qué zacaanu decisión jneza.
5. ¿Xi riquiiñeʼ Jehová para guluíʼ laanu xi gúninu ne xi caquiiñeʼ gúninu para gacané ni laanu?
5 ¡Guizáʼ nayecheʼ runi sentirnu purtiʼ qué huasaana Jehová de guluíʼ laanu xi naquiiñeʼ gúninu. Biblia ná: «Pa málasi guiree cueʼluʼ ladu derechu o ladu bigaʼ, zunadiágaluʼ ca diidxaʼ riʼ neza décheluʼ: “Ndiʼ nga neza ca. Gusá luni”» (Isaías 30:21). Riquiiñeʼ Jehová Stiidxaʼ, Biblia, para guiniʼné laanu. Nga runi, naquiiñeʼ guni estudiarnu ni ne gunibiáʼ chaahuinu ni para guicaanu decisión jneza. Ne zacá, zeeda gácanu casi ca ni «maʼ zanda gó gueta casi ti binni huaniisi». Ne laaca naquiiñeʼ gusíʼdinu xquendabiaaninu para guiénenu xii nga ni jneza ne ni cadi jneza o gúninu ni cazíʼdinu lu Stiidxaʼ Dios (Hebreos 5:14).
6. ¿Xi caquiiñeʼ gúninu para ganda gacané conciencia stinu laanu?
6 Ti cosa ni racané laanu guicaanu decisión jneza nga conciencia stinu. Laani racaneni laanu gudiʼnu cuenta pa nápanu donda pur ni cayúninu o pa coʼ (Romanos 2:14, 15). Nga runi, para ganda gacané conciencia stinu laanu caquiiñeʼ gusíʼdinu ni ni zeeda lu Stiidxaʼ Dios. Ne zacá zacaneni laanu gúninu ni jneza. Purtiʼ ora qué rusiidiʼ binni conciencia stiʼ guni ni jneza la? jma nagueenda runi ca ni runi binni xquidxi ne rinanda costumbre stícabe, ne pur ca ni runi ne ca ni riníʼ ca binni ni nuu gaxha de laanu laaca zanda gucaa ca ni laanu gúninu ni cadi jneza. ¿Xi rizaaca ora qué rucaʼdiáganu conciencia stinu ne qué runi ni ná ca regla stiʼ Jehová yaʼ? Ra tidiʼ tiempu maʼ qué ruchiiñaʼ ni o maʼ qué racaná ni, purtiʼ casi ñaca maʼ gucuá ni fierru (1 Timoteo 4:2). Peru ti conciencia ni maʼ biziidiʼ ni ná Stiidxaʼ Dios la? zanda gúninu ni ná.
7. ¿Xi zacané laanu guicaanu decisión jneza?
7 Casi maʼ bizíʼdinu ca, ni zacané laanu guicaanu decisión jneza ne gácanu responsable de ca decisión ni guicaanu nga guizíʼdinu ca ni zeeda lu Stiidxaʼ Dios ne gúninu ni ná ca ni. Lugar de guicaanu ti decisión nagueenda naquiiñeʼ guidúʼyanu xi ná ca principiu zeeda lu Biblia ne guiníʼ ique chaahuinu de laacani. Pa guizíʼdinu ni ná lu Stiidxaʼ Dios ne gusíʼdinu conciencia stinu guni ni ná ni la? ziuʼnu listu para guicaanu decisión jneza cásica bi’ni’ Sadrac, Mesac ne Abednego. Yanna, guidúʼyanu xi chupa cosa racané ca xpinni Cristu ni riníʼ ique casi binni huaniisi para guicaacaʼ decisión jneza.
¿Tuu nga ca xhamígunu?
8, 9. a) ¿Xi principiu zeeda lu Biblia rusihuinni cadi naquiiñeʼ guidxaaganu ca binni ni runi ni cadi jneza? b) ¿Ñee ca binni si ni runi cosa dxabaʼ ne ni runi ni ná ique nga ca mala compañía ca la? Bisiene ni.
8 Apóstol Pablo bicaa: «Cadi gudiitu lugar chuʼ tu quiteʼ laatu. Pa guidxaagatu binni ni runi ni cadi jneza la? zunítinu ca costumbre galán ni nápatu» (1 Corintios 15:33). Ne Jesucristu gudxi ca discípulo stiʼ: «Cadi parte de guidxilayú riʼ laatu» (Juan 15:19). Ora ridúʼndanu ca principiu riʼ nagueendaca rudiʼnu cuenta cadi naquiiñeʼ gaca xhamígunu ca ni runi cometer pecadu sexual, ca ni napa jnadxii, ca gubaanaʼ, ca binnigüeʼ ne ca ni runi xcaadxi cosa casi laacani (1 Corintios 6:9, 10). Ora riziidiʼ chaahuinu ni ná lu Stiidxaʼ Dios, rudiʼnu cuenta laaca malu nga guidxaaganu ca clase binni riʼ sti modo casi ora ridúʼyanu laacabe ra cine, lu televisión, lu computadora o ra guidúʼndanu de laacabe. Laaca cadi jneza iquiiñenu internet para guinínenu «ca binni ni rucaachiʼ tu laa» (Salmo 26:4).
9 Yanna, ¿ñee jneza nga gaca xhamígunu ca binni ni nabani jneza peru qué gápacaʼ fe Dios ni dxandíʼ la? Stiidxaʼ Dios ná: «Guidubi guidxilayú riʼ nuuni lu náʼ Binidxabaʼ» (1 Juan 5:19). Ni ná textu riʼ nga cadi ca binni si ni runi cosa dxabaʼ o ni runi ni ná ique nga zanda gaca ti mala compañía. Nga runi, jma galán gaca xhamígunu ca binni si ni dxandíʼ nadxii Jehová.
10. ¿Xi zacané laanu guicaanu decisión jneza ora guidxaaganu binni?
10 Qué zanda diʼ guixélenu de guiráʼ binni ne cadi caquiiñeʼ peʼ gúninu ni (Juan 17:15). Ni dxandíʼ la? guiranu casi xpinni Cristu riguni predicarnu, riuunu scuela, rúninu dxiiñaʼ ne rúninu xcaadxi cosa ni rucaa laanu guidxaaganu binni. Ne ca ni cadi xpinni Cristu xheelaʼ nga ca ni zándaca jma ridxaagacaʼ ca ni qué runi ni ná Dios, peru pa maʼ bizíʼdinu xquendabiaaninu xii nga ni jneza la? zudiʼnu cuenta gadxé nga guidxaaganu binni purtiʼ caquiiñeʼ gúninu ni ne gadxé nga gaca xhamígunu laacabe (Santiago 4:4). Zacá la? maʼ zacaanu decisión casi ti binni huaniisi ne zadúʼyanu pa ziuʼnu lu ca actividad ni raca ra scuela casi ca baile ne ca eventu deportivu o pa ziuunu ti saa o ti guendaró ni raca ra rúninu dxiiñaʼ.
Dxiiñaʼ ni gúninu
11. Ante guicaanu ti dxiiñaʼ, ¿xi naquiiñeʼ guidúʼyanu primeru?
11 Pa chinándanu ca principiu ni zeeda lu Biblia zacaanu decisión jneza ora cuinu xi dxiiñaʼ gúninu, neca laani nga ni riquiiñenu para gudiʼnu ni caquiiñeʼ familia stinu (1 Timoteo 5:8). Primeca ni naquiiñeʼ guidúʼyanu nga xi dxiiñaʼ chigúninu. Biblia rusiidiʼ nuu caadxi dxiiñaʼ ni cadi naquiiñeʼ gúninu purtiʼ cadi jneza ca ni. Nga runi, ca ni dxandíʼ xpinni Cristu runi rechazarcaʼ intiica dxiiñaʼ ni napa que ver né ca bidóʼ ca, guendaribaʼnaʼ o modo riquiiñecabe rini ne xcaadxi cosa ni ná Biblia cadi jneza, laaca qué rusiguiinu ne qué riguítenu binni neca gucaa patrón stinu laanu gúninu ni (Hechos 15:29; Apocalipsis 21:8).
12, 13. ¿Xi xcaadxi cosa naquiiñeʼ guicaanu en cuenta ora cuinu xi dxiiñaʼ gúninu?
12 ¿Laga pa cadi cuchéʼnenu nin ti regla stiʼ Dios yaʼ? Ora jma maʼ bizíʼdinu ni dxandíʼ ne maʼ riénenu jma la? maʼ ricaanu en cuenta xcaadxi cosa. Guzéʼtenu ti ejemplu. Ante guicaanu xiixa dxiiñaʼ, ¿ñee riníʼ íquenu pa cuchéʼnenu xiixa principiu ni zeeda lu Biblia casi ora guicábinu teléfono ra rúnicabe apuesta la? Laaca naquiiñeʼ guiníʼ íquenu paraa ribeecabe bueltu para quíxecabe laanu ne paraa nuu dxiiñaʼ ca. Yanna, pa qué gápaluʼ ti patrón ne cuyúbicabe tu gutieeʼ ti yu’du’, ¿ñee zuyubu’ gudiicabe lii dxiiñaʼ ca ne zacá guni apoyarlu’ religión ni qué rusiidiʼ ni dxandíʼ la? (2 Corintios 6:14-16).
13 Yanna, ¿pa guicaa patrón stiluʼ ti dxiiñaʼ ra naquiiñeʼ chigutieeluʼ ti lugar ra runi adorárcabe dios ni cadi dxandíʼ yaʼ? Naquiiñeʼ guiníʼ íqueluʼ xi peʼ dxiiñaʼ chigúniluʼ lugar ca ne pa lii chiguini’lu’ ximodo gaca ni. ¿Laga pa gudiicabe lii ti dxiiñaʼ jneza casi chitiiziluʼ correu ndaaniʼ xquídxiluʼ dede né ca lugar ra rúnicabe ni cadi jneza yaʼ? Naquiiñeʼ guiníʼ íquenu principiu ni zeeda lu Mateo 5:45. Laaca naquiiñeʼ guicaanu en cuenta pa qué zacaná conciencia stinu ra gúninu dxiiñaʼ riʼ guiráʼ dxi (Hebreos 13:18). Cadi guiaandaʼ laanu para gácanu responsable ne guicaanu decisión casi ti binni huaniisi ora gúninu ti dxiiñaʼ la? naquiiñe’ guiníʼ ique chaahuinu ne gusíʼdinu conciencia stinu casi ná Dios.
«Lu guiráʼ ni gúniluʼ biiyaʼ xi nabe»
14. ¿Xi naquiiñeʼ gúninu ante guicaanu xiixa decisión?
14 Yanna, ¿xi naquiiñeʼ gúninu ora chiguicaanu decisión casi xi carrera guidúʼndanu o xi tratamientu guicaanu yaʼ? Para gánnanu xi decisión guicaanu la? naquiiñeʼ guidúʼyanu xi principiu zacané laanu ne guiníʼ íquenu ximodo zanda gúninu ni ná ni. Ti rey nuu xpiaaniʼ guyuu guidxi Israel ni láʼ Salomón bidii conseju riʼ: «Gupa confianza Jehová de guidubi ladxido’lo’ ne cadi chinándaluʼ ni ná xpiaaniluʼ. Lu guiráʼ ni gúniluʼ biiyaʼ xi nabe ne laabe zúnibe ca neza stiluʼ derechu» (Proverbios 3:5, 6).
15. Cásica bi’ni’ ca xpinni Cristu de primé siglu que, ¿xi naquiiñeʼ gúninu ora guicaanu xiixa decisión?
15 Cadi guiaandaʼ laanu ca decisión ni guicaanu zanda gacanécani o guninácani xcaadxi binni. Ti ejemplu de laani nga ni bizaaca ca xpinni Cristu de primé siglu que. Neca maʼ cadi naquiiñeʼ chinándacabe Ley bidii Dios Moisés que de xi naquiiñeʼ gócabe ne xi coʼ purtiʼ maʼ zanda gócabe intiisi guendaró neca Ley que ná nabiidiʼ ni la? maʼ cadi cucheecabe. Peru apóstol Pablo bicaa de xi zanda gúninu ora riquiiñecabe beela stiʼ ti maniʼ ndaaniʼ ti yu’du’ o para ti bidóʼ. Sicaríʼ guniʼbe: «Pa pur ni gahuaʼ guchee ti hermanu stinneʼ la? maʼ qué ziuuruʼ dxi gahuaʼ beela para cadi guchee hermanu stinneʼ» (1 Corintios 8:11-13). Guluu apóstol Pablo gana ca xpinni Cristu de primé siglu que guicaacaʼ en cuenta conciencia stiʼ xcaadxi ti cadi pur ni gúnicaʼ gucaacaʼ laacabe gucheecabe. Zacaca nga laanu, naquiiñeʼ chuʼnu cuidadu ti cadi pur ca decisión ni guicaanu gucaʼnu xcaadxi guchee (1 Corintios 10:29, 32).
Guyúbinu sabiduría stiʼ Dios
16. ¿Ximodo racané oración laanu para guicaanu decisión?
16 Ti cosa nabé risaca gúninu ante guicaanu decisión nga oración. Discípulo Santiago guníʼ sicaríʼ: «Pa cayaadxaʼ sabiduría tuuxa de laatu la? guinabaʼ ni Dios, purtiʼ rudii Dios de guidubi ladxidóʼ ne qué ruchá ni lú binni» (Santiago 1:5). Né stale confianza zanda guidxíñanu Dios ne guinábanu laa gudii laanu sabiduría ni caquiiñenu para guicaanu decisión jneza. Ora rábinu Dios xi naguu xizaa laanu ne ruyúbinu gacanebe laanu la? racané espíritu santu stibe laanu guiénenu ni ridúʼndanu de lu Biblia ne rusietenalaʼdxiʼ ni laanu ca ni maʼ bidúʼndanu luni.
17. ¿Ximodo zanda gacané xcaadxi binni laanu guicaanu decisión?
17 ¿Ñee zanda gacané xcaadxi binni laanu para guicaanu decisión la? Zanda. Maʼ bisaana Jehová caadxi hermanu ndaaniʼ congregación para gacané laanu (Efesios 4:11, 12). Zanda guinábanu laacabe gacanécabe laanu ora chiguicaanu xiixa decisión nabé risaca purtiʼ ruuyacabe ca cosa ca casi ruuyaʼ Jehová ca ni ne nápacabe stale experiencia. Nga runi, zanda guluíʼcabe laanu xcaadxi principiu ni zanda gacané laanu para guidúʼyanu gunáʼ nga ca cosa ni jma risaca (Filipenses 1:9, 10). Peru neca zacá ni la? cadi guiaandaʼ laanu cadi naquiiñeʼ gudiʼnu lugar guicaa xcaadxi decisión pur laanu, purtiʼ laanu nga responsable de ca decisión ni ricaanu.
¿Ñee siempre zabeendunu ni galán la?
18. Bizeeteʼ xi zándaca guizaaca neca guicaanu ti decisión jneza.
18 ¿Ñee siempre zabeendunu ni galán pa chinándanu ca principiu ni zeeda lu Biblia la? Zándaca primerugá gaca ni nagana, peru ra tidiʼ tiempu zabeendunu ni galán. Casi Sadrac, Mesac ne Abednego gunna dxíchicaʼ pur decisión ni gucuaacaʼ de cadi guni adorarcaʼ bidóʼ naro’ba’ que la? zándaca gáticaʼ (Daniel 3:16-19). Zacaca nga bizaaca ca apóstol dxi guyecaʼ nezalú Sanedrín ne guni’ca’ jma naquiiñeʼ guzuubacaʼ stiidxaʼ Dios casi gobernante que stiidxaʼ hombre, ne pur ngue gudíñecabe laacaʼ (Hechos 5:27-29, 40). Ne cumu «guiranu rizaacanu cosa ni cadi caníʼ íquenu ne ora cadi cabézanu» la? zándaca gadxé ni guizaaca pur decisión ni guicaanu (Eclesiastés 9:11). Nga runi, pa neca maʼ gucuaanu ti decisión jneza, gacananu la? zanda chuʼnu seguru zacané Jehová laanu guni huantarnu, ne despué zaguube ndaayaʼ laanu (2 Corintios 4:7).
19. ¿Xi zacané laanu gácanu responsable de ca decisión ni guicaanu?
19 Casi maʼ bidúʼyanu ca, ante guicaanu ti decisión naquiiñeʼ guidúʼyanu xi ná ca principiu zeeda lu Biblia, guiníʼ íquenu ne gúninu ni ná ca ni. Rudiʼnu xquixe peʼ Jehová purtiʼ riquiiñeʼ espíritu santu stiʼ ne ca hermanu ni napa experiencia para gacanecaʼ laanu. Nga runi, iquiiñenu guiráʼ ni cudii Jehová laanu ne gácanu responsable de ca decisión ni ricaanu.
¿Xi biziidiluʼ?
• ¿Xi zacané laanu guicaanu decisión jneza?
• Ora cuinu tu guidxaaganu, ¿ximodo rusihuínninu maʼ riníʼ íquenu casi ti binni huaniisi?
• ¿Xi caadxi cosa risaca naquiiñeʼ guicaanu en cuenta ora cuinu xi dxiiñaʼ gúninu?
• ¿Xi zacané laanu gánnanu xi decisión guicaanu?
[Guendarinabadiidxaʼ]
[Imagen]
Ra qué nuzuubaʼ Adán ne Eva diidxaʼ rusiidiʼ ni laanu ti cosa nabé risaca
[Imagen]
Ante guicaanu ti decisión risaca, naquiiñeʼ guidúʼyanu xi ná ca principiu zeeda lu Biblia