Bagong mga Miembro kan Namamahalang Grupo

KAN Mierkoles na aga, Agosto 24, 2005, nadangog kan mga pamilyang Bethel sa Estados Unidos asin Canada an nakakaogmang paisi paagi sa koneksion sa video. Poon sa Setyembre 1, 2005, duwang bagong miembro—si Geoffrey W. Jackson asin Anthony Morris III—an idadagdag sa Namamahalang Grupo kan Mga Saksi ni Jehova.

Nagpoon na magpayunir si Tugang na Jackson kan Pebrero 1971 sa Tasmania, an islang estado kan Australia. Kan Hunyo 1974, pinakasalan nia si Jeanette (Jenny). Dai nahaloy pakatapos kaiyan, ninombrahan sindang maglingkod bilang mga espesyal payunir. Poon 1979 sagkod 2003, naglingkod sinda bilang mga misyonero sa Tuvalu, Samoa, asin Fiji—islang mga nasyon sa Timog Pasipiko. Mantang yaon sa mga isla, an mag-agom na Jackson nakatabang man na marhay sa pagtradusir nin mga babasahon sa Biblia. Poon kan 1992, si Tugang na Jackson naglingkod sa Komite kan Sangang Opisina sa Samoa, asin poon kan 1996, sa Komite kan Sangang Opisina sa Fiji. Kan Abril 2003, sia asin si Jenny nagin miembro kan pamilyang Bethel sa Estados Unidos asin nagpoon na magtrabaho sa Departamento nin Serbisyo Para sa mga Paratradusir. Dai nahaloy pakatapos kaiyan, si Tugang na Jackson ginibong katabang sa Komite sa Pagtotokdo kan Namamahalang Grupo.

Si Tugang na Morris naglaog sa paglilingkod bilang payunir kan 1971 sa Estados Unidos. Kan Disyembre kan taon na iyan, pinakasalan nia si Susan, asin padagos sindang nagpayunir sa laog nin haros apat na taon sagkod na mamundag an primero nindang aki, si Jesse. Pag-abot nin panahon, nagkaigwa sinda nin saro pang aki, si Paul. Si Tugang na Morris naglaog giraray sa bilog na panahon na paglilingkod kan 1979 bilang regular payunir. Inibanan sia kan saiyang agom kan mag-eskuela na an mga aki. An pamilya naglingkod kun saen dakula an pangangaipo sa Rhode Island asin North Carolina, sa Estados Unidos. Sa North Carolina, si Tugang na Morris naglingkod bilang kasangling paraataman sa sirkito, asin an mga aki naglaog sa paglilingkod bilang regular payunir. Inimbitaran si Jesse asin Paul sa sangang opisina sa Estados Unidos sa edad na 19. Mientras tanto, si Tugang na Morris nagpoon sa gibohon sa sirkito. Dangan, kan 2002 sindang duwa ni Susan inimbitaran sa Bethel, na pinonan an bago nindang asignasyon kan Agosto 1. Si Tugang na Morris nagtrabaho sa Departamento sa Paglilingkod sa Patterson asin kan huri bilang katabang sa Komite sa Paglilingkod kan Namamahalang Grupo.

Apuera sa duwang bagong miembrong ini, an Namamahalang Grupo kompuesto ni C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; asin D. Sydlik. An gabos na miembro kan Namamahalang Grupo linahidan na mga Kristiano.