Mwi Bumba Litungulula Basalilamo Abapya

PALI Citatu ulucelo, pa 24 August, 2005, ababa pa maofesi ya Nte sha kwa Yehova mu United States na mu Canada bakutike ku kubilisha ukwabalengele ukusekelela. Uku kubilisha kwaliko ulucelo ilyo balebebeta ilembo kabili aba pa misambo imbi mu Amerika na ku Canada baletamba pa TV lintu aba ku Brooklyn baletungulula ilembo. Babilishe ukuti ukutendeka pa 1 September, 2005, kwi Bumba Litungulula ilya Nte sha kwa Yehova kukalundwa abapya babili, aba ni baGeoffrey W. Jackson na baAnthony Morris.

Munyinefwe Jackson atendeke bupainiya mu February 1971 ku Tasmania, icishi ca ku Australia. Mu 1974 mu June, baJackson baupile baJeanette (Jenny). Tapakokwele babasontele ukuba bapainiya baibela. Ukufuma mu 1979 ukufika mu 2003, bali ni bamishonari ku fishi fya mu Pacific, mu Tuvalu, mu Samoa, na mu Fiji. Ilyo bali kuli filya fishi, baJackson na baJeanette balyafwilishe sana mu kupilibula impapulo shilanda pali Baibolo. Mu 1992, Munyinefwe Jackson bamusalile ukuba muli Komiti wa Musambo mu Samoa, e lyo mu 1996, bamusalile ukuba muli Komiti wa Musambo ku Fiji. Mu April 2003, baJackson na baJenny bakuukile ku musambo wa ku United States kabili batendeke ukubombela mu dipartimenti wa Translation Services Department. Tapakokwele, Munyinefwe Jackson atendeke ukula-afwilisha Komiti wa Kusambilisha uwe Bumba Litungulula.

Munyinefwe Morris na o atendeke bupainiya mu 1971 ku United States. Muli ulya wine mwaka mu December baMorris baupile baSusan, kabili batwalilile ukubomba bupainiya pa myaka ine mpaka ilyo umwana wabo uwa kubalilapo, Jesse, afyelwe. Lyena baishilekwata umwana na umbi kabili bamwinike ukuti Paul. Munyinefwe Morris aishiletendeka bupainiya na kabili mu 1979. Abakashi babo bena baishiletendeka bupainiya na kabili ilyo abana batendeke isukulu. Ulupwa lwabo lonse lwalebombela ukwali ukukabila ku cishi ca Rhode na ku North Carolina mu United States. Ilyo bali ku North Carolina, baMorris bali bakafwa wa kwa kangalila wa muputule, kabili abana babo batendeke bupainiya. Ilyo Jesse akumenye imyaka 19, balimwitile ku musambo mu United States e lyo na Paul wine bamwitile ku musambo lintu ali ne myaka 19. Lyena Munyinefwe Morris aishileba kangalila wa muputule. Mu 2002, pa 1 August, baMorris na baSusan balibetile ku Bethel. BaMorris balebombela ku Dipartimenti wa Mulimo ku Patterson kabili pa numa batendeke ukula-afwilisha Komiti wa Mulimo uwe Bumba Litungulula.

Kanshi mwi Bumba Litungulula nomba muli ba C. W. Barber; ba J. E . Barr; ba S. F. Herd; ba M. S. Lett; ba G. Lösch; ba G. W. Jackson; ba T. Jaracz; ba A. Morris; ba G. H. Pierce; ba A. D. Schroeder; ba D. H. Splane; na ba D. Sydlik. Aba bonse Bena Kristu basubwa.