Ol Niufala Memba Blong Hed Kampani

LONG Wenesde moning, Ogis 24, 2005, ol memba blong Betel famle long Kanada oli joenem vidio blong olgeta i go long Betel famle blong Yunaeted Stet blong harem wan nambawan mesej. Stat long Septemba 1, 2005, i gat tu niufala memba oli joen long Hed Kampani blong ol Witnes blong Jeova​—hemia Geoffrey W. Jackson mo Anthony Morris III.

Brata Jackson i statem wok blong paenia long Februari 1971 long Tasmania, wan aelan blong Ostrelia. Long Jun 1974, hem i maredem Jeanette (we narafala nem blong hem Jenny). Smoltaem biaen, oli askem tufala blong wok olsem ol spesel paenia. Stat long 1979 go kasem 2003, tufala i wok olsem ol misinari long Tuvalu, Samoa, mo Fiji​—hemia ol aelan blong Saot Pasifik. Taem tufala i stap long ol aelan ya, tufala i givhan bigwan long wok ya blong tanem ol buk blong Baebol i go long ol narafala lanwis. Stat long yia 1992, Brata Jackson i kam wan memba blong Branj Komiti long Samoa, mo long 1996, hem i memba blong Branj Komiti long Fiji. Long Eprel 2003, hem mo Jenny tufala i kam joen long Betel famle blong Yunaeted Stet mo tufala i stat blong wok long Translesen Sevis Dipatmen. Smoltaem biaen, Brata Jackson i givhan long Tijing Komiti blong Hed Kampani.

Brata Morris tu i joen long wok blong paenia long 1971 long Yunaeted Stet. Long Disemba long sem yia ya hem i maredem Susan, mo tufala i gohed long wok blong paenia blong klosap fo yia go kasem taem we fasbon boe blong tufala, Jesse, i bon. Biaen, tufala i gat wan narafala boe, nem blong hem Pol. Long 1979, Brata Morris i joen bakegen long wok blong fultaem paenia. Waef blong hem i joenem hem long wok ya taem tufala boe i stat blong go long skul. Famle Morris oli go prij long Rhode Island mo North Carolina long Yunaeted Stet, we i gat nid long hem. Long North Carolina Brata Morris i wok olsem seket elda sam samtaem mo ol boe blong hem oli mekem fultaem paenia. Jesse mo Pol, tufala i kasem leta blong go wok long branj ofis blong Yunaeted Stet taem tufala i gat 19 yia. Afta, Brata Morris i mekem wok blong seket elda. Biaen, long 2002, hem mo Susan tufala i go long Betel, mo statem niufala wok long Ogis 1. Brata Morris i wok long Sevis Dipatmen long Patterson mo biaen hem i givhan long Sevis Komiti blong Hed Kampani.

Wetem tu niufala memba ya, Hed Kampani i gat ol brata ya: C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; mo D. Sydlik. Olgeta memba blong Hed Kampani oli ol Kristin we tabu spirit i makemaot olgeta.