Nouvo Manm Konsey Direkter

MERKREDI bomaten, le 24 Out, 2005, en lanons enteresan ti ganny fer dan fanmiy Betel Letazini ek Kanada. Apartir le 1 Septanm, 2005, i annan de nouvo manm lo Konsey Direkter Temwen Zeova. Zot apel Geoffrey W. Jackson ek Anthony Morris III.

Frer Jackson ti konmans fer pionye Fevriye 1971 Tasmania, en zil Lostrali. An Zen 1974, i ti marye avek Jeanette (Jenny). Pa bokou letan apre, zot ti ganny apwente pionye spesyal. Depi 1979 ziska 2003 zot in fer travay misyonner Tuvalu, Samoa, ek Fiji, ki bann zil dan Sid Pasifik. Frer ek Ser Jackson in osi fer en kantite dan travay tradiksyon nou bann piblikasyon letan zot ti lo sa bann zil. An 1992, Frer Jackson ti vin en manm Komite Brans Samoa, e apartir 1996, i ti lo Komite Brans Fiji. An Avril 2003, li ek Jenny ti vin manm fanmiy Betel Letazini e zot ti konmans travay dan Departman Servis Tradiksyon. En pe letan apre, Frer Jackson ti ganny demande pour ede lo Komite Lansennyman Konsey Direkter.

Frer Morris ti konmans servis pionye an 1971 Letazini. Dan sa menm lannen an Desanm, i ti marye avek Susan, e zot ti kontinyen fer pionye pour preski kat an ziska nesans zot premye garson, Jesse. Apre zot ti ganny en lot garson, apele Paul. Frer Morris ti rekonmans servis aplentan an 1979 konman en pionye ordiner. Ler zot de garson ti konmans al lekol, son madanm ti osi vin pionye ordiner. Ansanm konman en fanmiy zot ti servi kot ti annan en pli gran bezwen lo Rhode Island ek North Carolina, Letazini. Ler zot ti North Carolina, Frer Morris ti servi konman en ranplasan pour sirveyan rezyonal, e son de garson ti konmans fer pionye ordiner. Jesse ek Paul ti ganny envite dan brans Letazini alaz 19 an. Antretan, Frer Morris ti vin en sirveyan rezyonal. Apre, an 2002, li ek Susan ti ganny envite Betel e zot ti konmans zot nouvo servis le 1 Out. Frer Morris ti travay dan Departman Servis, Patterson e plitar i ti ganny demande pour ede lo Komite Servis Konsey Direkter.

Apard sa de nouvo manm, ozordi lo Konsey Direkter i annan C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; ek D. Sydlik. Tou manm Konsey Direkter i bann Kretyen swazir.