Bag-ong mga Katapo sang Nagadumala nga Hubon

SANG Mierkoles sang aga, Agosto 24, 2005, ang pamilya Bethel sa Estados Unidos kag Canada, nga nakonektar sang video, nakabati sing isa ka makakulunyag nga pahibalo. Sugod sa Septiembre 1, 2005, duha ka bag-ong katapo—sanday Geoffrey W. Jackson kag Anthony Morris III—ang idugang sa Nagadumala nga Hubon sang mga Saksi ni Jehova.

Si Utod Jackson nagsugod sa pagpayunir sang Pebrero 1971 sa Tasmania, ang isla nga estado sang Australia. Sang Hunyo 1974, nagpakasal sila ni Jeanette (Jenny). Wala magdugay pagkatapos sadto, gintangdo sila nga mag-alagad subong mga espesyal payunir. Halin sang 1979 tubtob 2003, nag-alagad sila subong mga misyonero sa Tuvalu, Samoa, kag Fiji—mga isla nga pungsod sa Bagatnan nga Pasipiko. Samtang yara sa sini nga mga isla, daku ang nabulig sang mag-asawa nga Jackson sa pagbadbad sang mga literatura sa Biblia. Sugod sang 1992, nag-alagad si Utod Jackson subong katapo sang Komite sang Sanga sa Samoa, kag sugod naman sang 1996, sang Komite sang Sanga sa Fiji. Sang Abril 2003, nangin katapo sila ni Jenny sang pamilya Bethel sa Estados Unidos kag nagtrabaho sa Translation Services Department. Wala magdugay, si Utod Jackson ginhimo nga kabulig sa Teaching Committee sang Nagadumala nga Hubon.

Si Utod Morris nagsugod sa pagpayunir sang 1971 sa Estados Unidos. Sang Disiembre sina nga tuig, ginpangasawa niya si Susan, kag nagpadayon sila sa pagpayunir sa sulod sang halos apat ka tuig tubtob nga nabun-ag ang ila subang nga si Jesse. Sang ulihi, nag-anak sila liwat sing lalaki, si Paul. Si Utod Morris nagsulod liwat sa bug-os tion nga pag-alagad sang 1979 subong regular payunir. Ang iya asawa nagbuylog sa iya sang nag-eskwela na ang mga kabataan. Ang pamilya nag-alagad sa duog diin daku ang pagkinahanglan sa Rhode Island kag North Carolina, sa Estados Unidos. Sa North Carolina, si Utod Morris nag-alagad subong tal-us nga manugtatap sang sirkito, kag ang ila mga anak nga lalaki nagregular payunir. Gin-agda sanday Jesse kag Paul sa sanga sang Estados Unidos sa edad nga 19. Samtang si Utod Morris naman nagsugod sa pag-alagad sa sirkito. Nian, sang 2002 gin-agda sila ni Susan sa Bethel kag nagsugod sila sa ila bag-ong asaynment sang Agosto 1. Si Utod Morris nagtrabaho sa Service Department sa Patterson kag sang ulihi subong kabulig sa Service Committee sang Nagadumala nga Hubon.

Ang iban pa nga katapo sang Nagadumala nga Hubon magluwas sa ila amo sanday C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; kag D. Sydlik. Ang tanan nga katapo sang Nagadumala nga Hubon hinaplas nga mga Cristiano.