Ahwo Ọkpokpọ erọ Ugboma Esuo NA

EVAỌ ohiohiẹ Edesa-Oka, August 24, 2005, iviuwou Ebẹtẹle nọ e rrọ obọ United States gbe Canada, enọ a rehọ ifi ividio dhẹ duwu re a sae ruẹ ohwohwo nọ a te bi se obe okpẹdẹ, a yo owhowhovia isiuru jọ. Muhọ evaọ September 1, 2005, a kuọ imava jọ gbe Ugboma Esuo ọrọ Isẹri Jihova—Geoffrey W. Jackson gbe Anthony Morris III.

Brọda Jackson o muọ iruo ọkobaro họ evaọ February 1971 evaọ Tasmania, ubrotọ jọ evaọ Australia. Evaọ June 1974, o te wo aye, odẹ aye riẹ Jeanette (a tẹ gwọlọ se odẹ na kpẹkpẹe, a ve sei Jenny). U kri hi, a tẹ rehọ ae mu ekobaro obọdẹ. No 1979 rite 2003, a ruiruo imishọnare evaọ Tuvalu, Samoa, gbe Fiji—erẹwho ukoliko evaọ Obọze Ovatha-Ọre Pacific. Okenọ a jọ erẹwho ukoliko na, Brọda Jackson avọ aye riẹ a fi obọ họ gaga evaọ ẹfa ebe ukoko na. Muhọ evaọ 1992, Brọda Jackson ọ jọ omọvo Ogbẹgwae Uwou-Ogha evaọ Samoa, yọ muhọ evaọ 1996, ọ jọ omọvo Ogbẹgwae Uwou-Ogha evaọ Fiji. Evaọ April 2003, tei te Jenny a te muọ iruo họ evaọ Ebẹtẹle United States evaọ oria Ẹko-Iruo Efafa. U kri hi, Brọda Jackson o te muọ obọ họ efihọ kẹ Ogbẹgwae Ewuhrẹ ọrọ Ugboma Esuo na.

Brọda Morris o muọ iruo ọkobaro họ evaọ 1971 evaọ United States. Evaọ amara Akpegbivẹ ọrọ ukpe yena, o te wo aye, odẹ aye riẹ Susan, a te ru iruo ọkobaro kugbe kẹle ikpe ene bẹsenọ a ro yẹ ọmọ ọsosuọ rai, Jesse. U kri hi, a te yẹ ọmọ ọfa, Pọl. Brọda Morris ọ tẹ wariẹ ruọ iruo odibọgba oke-kpobi evaọ 1979 wọhọ ọkobaro oke-kpobi. Aye riẹ o te kuomagbei nọ emọ na a ruọ isukulu no. Uviuwou na soso a kwa kpohọ oria nọ ẹgwọlọ ọ mae jọ rro evaọ Ukoliko Rhode gbe Ẹkpẹlobọ Ovatha-Ọre Carolina, evaọ United States. Evaọ Ẹkpẹlobọ Ovatha-Ọre Carolina, Brọda Morris ọ jọ ethabọ ọsẹro okogho, emezae riẹ a te muọ iruo ọkobaro họ. A zizie Jesse kpohọ uwou ogha United States nọ ọ kpako te ikpe 19 no, uwhremu na a te je zizie Pọl nọ ọ kpako te ere no re. Oke yena, yọ Brọda Morris o muọ iruo ọsẹro ọnyawariẹ họ no. Kẹsena, evaọ 2002, a te zizie tei te aye riẹ ziọ Ebẹtẹle evaọ August 1. Brọda Morris o ruiruo evaọ Ẹko-Iruo Iruẹru Ukoko na evaọ Patterson yọ uwhremu na, o te muọ obọ họ efihọ kẹ Ogbẹgwae Iruo Usiuwoma Ota ọrọ Ugboma Esuo na.

U te no imava nana no, enọ e rrọ Ugboma Esuo na họ C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; gbe D. Sydlik. Ahwo nana kpobi nọ e rrọ Ugboma Esuo na yọ Ileleikristi nọ a wholo.