Batutu Bapya ba mu Kitango Kyendeji

LUBANGA mu Dya Busatu, mafuku 24 Kweji 8, 2005, bisaka bya Betele bya mu États-Unis ne mu Kanada, byāivwene musapu usangaja pobyadi bilungilwe pamo ku bingidilwa bya video. Tamba mu difuku 1 Kweji 9, 2005 batutu babidi bapya—ba Geoffrey Jackson ne Anthony Morris III—babwejibwe mu Kitango Kyendeji kya Batumoni ba Yehova.

Tutu Jackson wāshilwile mwingilo wa bupania mu Kweji 2, 1971 mu Tasmania, mu kisanga kya ntanda ya Ostrali. Mu Kweji 6, 1974, wasonga Jeanette (Jenny). Kinondanonda’tu na pene’pa, batumwa bu bapania ba pa bula. Tamba mu mwaka wa 1979 kutūla mu 2003, baingile bu bamishonele mu Tuvalu, mu Samoa, ne mu Fidji—bisanga bya Pasifike wa Kunshi. Pobadi bajokoloka mu bino bisanga, Tutu ne Kaka Jackson baelele bininge kuboko ku mwingilo wa bwalamuni bwa mabuku esambila pa Bible. Tutu Jackson waingile tamba mu 1992 mu Komite wa Musambo wa Samoa, ebiya mu 1996, wakengila mu Komite wa Musambo wa Fidji. Mu Kweji 4, 2003, aye ne Jenny baikala ke bana ba mu kisaka kya Betele ya mu États-Unis bengila mu Kitango kya Mingilo ya Bwalamuni. Kepaijijepo, Tutu Jackson washilula kukwasha mu Komite wa Bufundiji wa Kitango Kyendeji.

Tutu Morris nandi wāshilwile mwingilo wa bupania mu 1971. Mu Kweji wa 12 mu mwine mwaka’o, wasonga Susan, kupwa abo bonso baendelela na mwingilo wa bupania mu myaka iná kufika ne byobabutwile wabo mwana umbajinji, Jesse. Mwenda myaka, babutula mwana mukwabo, Paul. Tutu Morris washilula monka mwingilo wa kitatyi kyonso mu 1979 bu pania wa lonso. Wandi mukaji walonda’po kupwa’tu kwa bana kutwela ku masomo. Kino kisaka kyakengile mu Kisanga kya Rhode ne mu Carolina wa Kungala kwadi kusakibwa basapudi bavule. Mu Carolina wa Kungala, Tutu Morris waingila’mo bu mutadi wa kipindi mpingakani kadi bandi bana papo bengila bu bapania ba lonso. Ba Jesse ne Paul pa kubwanya myaka 19, baitwa ku musambo wa mu États-Unis. Papo Tutu Morris waikadidila mutadi wa kipindi. Ebiya mu 2002 aye ne Susan nabo baitwa ku Betele, ne kushilula mwingilo wabo mupya mu difuku 1 Kweji 8. Tutu Morris waingile ku Bilo ya Mingilo ku Patterson kupwa ke mukwashi mu Komite wa Mingilo wa Kitango Kyendeji.

Bano batutu babidi i bebweje ku bano batutu badi kala mu Kitango Kyendeji: Carey Barber; John Barr; Samuel Herd; Stephen Lett; Gerrit Lösch; Theodore Jaracz; Guy Pierce; Albert Schroeder; David Splane; ne Daniel Sydlik. Bano bonso babundile Kitango Kyendeji i Bene Kidishitu bashingwe māni.