Nin-paals n wa n paas Siglgã taoor lʋɩtb Sulli

ETAZĨNI la Kanada, b tũnugda ne video tɩ Betɛllã zak neb fãa tũud daar verse wã wɛgsgo. La yʋʋmd 2005, sa-sik kiuug rasem 24 sẽn yɩ arb daarã yibeoogo, daar verse wã vaeesg sasa, b wʋma koe-noogo: A Geoffrey Jackson ne a Anthony Morris na n zĩnda a Zeova Kaset rãmbã Siglgã taoor lʋɩtb Sull pʋgẽ, sẽn sɩng ne yʋʋmd 2005, bõn-bɩʋʋng kiuugã pipi daar tɛka.

Saam-biig a Jackson sɩnga so-pakrã tʋʋmd yʋʋmd 1971, wao-fugdg kiuugu, Tasmani sẽn yaa Ostrali babg ning sẽn yaa ko-sʋk tẽngã. Yʋʋmd 1974 sigr kiuugã, a kẽe kãadem ne a Jeanette. Rẽ poor bilfu, b lebga so-pakdb sẽn yaa zalle. Yʋʋmd 1979 n tɩ tãag yʋʋmd 2003, b yɩɩ misioneer dãmb Tuvalu, Samoa, la Fidzi, sẽn yaa Pasifikdisiid ko-sʋk tẽnsã. A Geoffrey Jackson ne a pag a Jeanette sẽn da wa n be tẽn-kãens pʋsẽ wã, b sõnga wʋsg ne sɛb sẽn tik Biiblã zugã lebgre. Yʋʋmd 1992 tɛkã, saam-biig a Jackson yɩɩ Samoa Tʋʋmdã Will neda, la yʋʋmd 1996, tɛka, a yɩɩ Fidzi Tʋʋmdã Will neda. Yʋʋmd 2003 wã, yẽ ne a pagã lebga Etazini Betɛllã zak neba, la b sɩnga tʋʋm sɛbã lebgrã zĩigẽ. Rẽ poor bilfu, b yãka saam-biig a Jackson t’a sõngd Siglgã taoor lʋɩtb Sull ning sẽn get zãmsgã yellã.

Saam-biig a Morris kẽe so-pakrã tʋʋmdẽ yʋʋmd 1971 Etazĩni. Yʋʋm-kãng yʋʋm-sar kiuugã, a kẽe kãadem ne a Susan, la b kell n kẽnga taoor ne so-pakrã tʋʋmd sẽn kolg yʋʋm a naase, tɩ wa tãag b pipi bi-ribl a Jesse rogem. Rẽ poor bilf bala b ye paama bi-ribl a to, a Paul. Saam-biig a Morris lebs n dɩka wakat fãa so-pakrã tʋʋmd yʋʋmd 1979. B kambã sẽn wa n kẽ lekolle, a pagã me lebga wakat fãa so-pakda. B tɩ moona koɛɛgã zĩis nins koe-moondb raab sẽn yaa wʋsgã, Roodhailãnd la Karolindinoor Etazĩni. B sẽn wa n be Karolindinoorã, saam-biig a Morris yɩɩ tigims sull yel-gɛtã lɛdgda, la a kom-dibli wã lebga wakat fãa so-pakdba. B boola a Jesse ne a Paul Etazĩni Betɛllẽ wã, b ned kam fãa sẽn wa n paam yʋʋm 19. Sʋkendã, saam-biig a Morris lebga tigims sull yel-gɛta. La yʋʋmd 2002 wã, b boola a Morris ne a Susan Betɛllẽ wã, tɩ b sɩng b tʋʋmdã be sa-sik kiuugã pipi daare. Saam-biig a Morris tʋma Patɛrson, biru ning sẽn get koe-moonegã yellã zĩigẽ, la rẽ poore, b yãk-a lame t’a sõngd Siglgã taoor lʋɩtb Sull ning sẽn get koe-moonegã yellã.

Sẽn paas ne nin-paals kãensã b yiibã, Siglgã taoor lʋɩtb Sull neb yaa a Carey Barber, a John Barr, a Samuel Herd, a Stephen Lett, a Gerrit Lösch, a Theodore Jaracz, a Guy Pierce, a Albert Schroeder, a David Splane, la a Daniel Sydlik. Siglgã taoor lʋɩtb Sull neb fãa yaa kiris-neb sẽn paam vʋʋsem sõngã zaeebo.