Ditho tše Difsa tša Sehlopha se Bušago

KA Laboraro mesong, August 24, 2005, malapa a Bethele e lego la United States le la Canada, a ile a kwa tsebišo e kgahlišago a kgokagantšwe ka bidio. Go thoma ka September 1, 2005, Sehlopha se Bušago sa Dihlatse tša Jehofa se ile sa oketšwa ka ditho tše pedi tše difsa, e lego Geoffrey W. Jackson le Anthony Morris III.

Ngwanabo rena Jackson o ile a thoma bobulamadibogo ka February 1971 kua Tasmania yeo e lego naga ya sehlakahlakeng ya Australia. Ka June 1974, o ile a nyala Jeanette (Jenny). Kapejana ka morago ga moo, ba ile ba kgethelwa gore ba hlankele bjalo ka babulamadibogo ba kgethegilego. Go tloga ka 1979 go ya go 2003, ba ile ba hlankela e le baromiwa kua Tuvalu, Samoa le Fiji e lego dinaga tša dihlakahlakeng tšeo di lego ka Leboa la Pacific. Ge ba le moo dihlakahlakeng, Ngwanabo rena le Kgaetšedi Jackson ba ile ba thuša kudu modirong wa go fetolela dikgatišo tša Beibele. Go thoma ka 1992, Ngwanabo rena Jackson o ile a hlankela Komiting ya Lekala kua Samoa, gomme go tloga ka 1996, a hlankela Komiting ya Lekala kua Fiji. Ka April 2003, yena le Jenny ba ile ba ba karolo ya lapa la Bethele la kua United States gomme ba thoma go šoma Lefapheng la Tirelo ya tša Bofetoledi. Kapejana ka morago ga moo, Ngwanabo rena Jackson o ile a šoma e le mothuši Komiting ya go Ruta ya Sehlopha se Bušago.

Ngwanabo rena Morris le yena o tsenetše tirelo ya bobulamadibogo ka 1971 kua United States. Ka December ya wona ngwaga woo, o ile a nyala Susan, gomme ba ile ba tšwela pele e le babulamadibogo mo e ka bago ka nywaga e mene go fihlela ge morwa wa bona wa mathomo e lego Jesse a belegwa. Ge nako e dutše e tšwela pele, ba ile ba ba le morwa yo mongwe e lego Paul. Ngwanabo rena Morris o ile a tsenela tirelo ya nako e tletšego gape ka 1979 e le mmulamadibogo wa ka mehla. Mosadi wa gagwe le yena o ile a mo thekga ka go tšea bobulamadibogo ge barwa ba bona ba šetše ba thomile go tsena sekolo. Lapa le le ile la hlankela moo go nyakegago thušo e kgolo kua sehlakahlakeng sa Rhode le North Carolina, kua United States. Kua North Carolina, Ngwanabo rena Morris o ile a hlankela bjalo ka mothuši wa molebeledi wa tikologo, gomme barwa ba gagwe ba tsenela tirelo ya bobulamadibogo bja ka mehla. Jesse le Paul ba ile ba laletšwa gore ba tle ba hlankele lekaleng la United States ge ba e-na le nywaga e 19. Ditaba di sa le bjalo, Ngwanabo rena Morris o ile a thoma modiro wa tikologo. Ke moka, ka 2002 yena le Susan ba ile ba laletšwa go tla Bethele, gomme ba ile ba thoma kabelo ya bona e mpsha ka August 1. Ngwanabo rena Morris o ile a šoma Lefapheng la tša Tirelo kua Patterson gomme ka morago a ba mothuši wa Komiti ya Tirelo ya Sehlopha se Bušago.

Ditho tše tše pedi di oketša palo ya ditho tša Sehlopha se Bušago e lego C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; le D. Sydlik. Ditho ka moka tša Sehlopha se Bušago ke Bakriste ba tloditšwego.