Miembronan Nobo di e Cuerpo Gobernante

DIARANSON mainta, 24 di augustus 2005, e famianan di Betel di Merca y Canada, conecta cu otro via television, a tende un anuncio excitante. Entrante prome di september 2005, lo a agrega dos miembro nobo na e Cuerpo Gobernante di Testigonan di Yehova. Nan ta Geoffrey W. Jackson y Anthony Morris.

Ruman Jackson a cuminsa traha pionero na februari 1971 riba e isla di Tasmania, un estado di Australia. Na juni 1974, el a casa cu Jeanette (Jenny). Poco despues nan a haya e nombramento pa sirbi como pionero special. Di 1979 pa 2003, nan a sirbi como misionero na Tuvalu, Samoa y Fidji, islanan den Oceano di Sur Pacifico. Tempo cu pareha Jackson tawata riba e islanan aki, nan a duna un gran aporte tambe na e trabou di traduci literatura biblico. Na aña 1992, Ruman Jackson a cuminsa sirbi den e Comite di Sucursal di Samoa, y for di 1996, den e Comite di Sucursal di Fidji. Na april 2003, e cu Jenny a bira parti di e famia di Betel di Merca y a cuminsa traha na e Departamento di Servicionan di Traduccion. Poco despues, Ruman Jackson a wordo asigna como ayudante di e Comite di Siñansa di e Cuerpo Gobernante.

Ruman Morris a drenta sirbishi di pionero na aña 1971 na Merca. Na december di e aña ei el a casa cu Susan, y nan a sigui traha pionero pa casi cuater aña te ora nan prome yiu homber, Jesse, a nace. Mas despues, nan a haya un otro yiu homber, Paul. Ruman Morris a bolbe drenta den sirbishi di tempo completo na 1979 como pionero regular. Su casa Susan a join e ora cu nan yiunan a cuminsa bai scol. E famia a sirbi caminda tawatin mas necesidad na Rhode Island y Nort Carolina, Merca. Na Nort Carolina, Ruman Morris a sirbi como superintendente di sircuito substituto, y nan yiu hombernan a drenta den sirbishi di pionero regular. Jesse cu Paul a haya invitacion pa bin traha na sucursal di Merca ora cu cada un a haci 19 aña. Mientrastanto, Ruman Morris a cuminsa cu trabou di sircuito. Anto na aña 2002, e cu Susan a haya e invitacion pa bin Betel pa cuminsa cu nan asignacion nobo dia prome di augustus. Ruman Morris a bai traha na e Departamento di Sirbishi na Patterson y despues como un ayudante di e Comite di Sirbishi di e Cuerpo Gobernante.

Fuera di e dos miembronan nobo aki, e Cuerpo Gobernante ta consisti di C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; y D. Sydlik. Tur e miembronan di e Cuerpo Gobernante ta cristiannan ungi.