Olketa Niu Member Bilong Governing Body

LONG Wednesday morning, August 24, 2005, olketa Bethel famili long United States and Canada herem wanfala barava spesol announcement thru long video. Start long September 1, 2005, tufala niu member—Geoffrey W. Jackson and Anthony Morris III—bae serve long Governing Body bilong Olketa Jehovah’s Witness.

Brata Jackson start for pioneer long February 1971 long Tasmania, datfala island state bilong Australia. Long June 1974, hem maritim Jeanette (Jenny). No longtaem bihaen, tufala kasem appointment for serve olsem spesol pioneer. From 1979 go kasem 2003, tufala serve olsem missionary long Tuvalu, Samoa, and Fiji—olketa island long South Pacific. Taem tufala stap long olketa island hia, Brata and Sista Jackson help long bigfala wei tu for transleitim Bible literature. Start long 1992, Brata Jackson serve long Branch Komiti long Samoa, and start long 1996, hem serve long Branch Komiti long Fiji. Long April 2003, hem and Jenny kamap member bilong Bethel famili long United States and tufala start for waka long Transleison Service Department. No longtaem bihaen datwan, Brata Jackson kasem assignment for waka olsem man for helpem Teaching Komiti bilong Governing Body.

Brata Morris start for pioneer long 1971 long United States. Long December long datfala sem year, hem maritim Susan, and tufala gohed for pioneer klosap fofala year go kasem taem Susan bornem first pikinini bilong tufala, wanfala boy, Jesse. Klosap tufala year bihaen datwan, tufala garem nara boy, Paul. Brata Morris startim moa full-taem service long 1979 olsem wanfala regular pioneer. Waef bilong hem joinim hem taem tufala boy start for go long skul. Bihaen, olketa serve long Rhode Island and North Carolina, long United States, wea garem bigfala need. Long North Carolina, Brata Morris hem serve olsem wanfala substitute circuit overseer, and tufala boy bilong hem start for regular pioneer. Jesse and Paul kasem invitation for serve long United States branch taem each wan kasem 19 year. Long semtaem, Brata Morris hem start for duim circuit waka. Then, long August 1, 2002, hem and Susan kasem invitation for go long Bethel for startim niu assignment bilong tufala long there. Brata Morris hem waka long Service Department long Patterson and bihaen datwan hem waka olsem man for helpem Service Komiti bilong Governing Body.

Olketa nara member bilong Governing Body nao C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; and D. Sydlik. Evri member bilong Governing Body hem olketa anointed Christian.