Au Mema Ou no te Pupu Akaaere

I TE popongi Ruitoru, Aukute 24, 2005, te au pamiri Betela i Marike e i Kanata, tei kapitiia mai na runga i te vitio, kua akarongo atu i tetai akakiteanga mataora tikai. Akamataanga ia Tepetema 1, 2005, ka kapitiia mai e rua nga mema ou​—ko Geoffrey W. Jackson raua ko Anthony Morris III​—ki te Pupu Akaaere no te Au Kite o Iehova.

Kua akamata te Taeake ko Jackson i te painia anga i roto ia Peperuare 1971 i Tasmania, te tuanga airani o Autireria. I roto ia Tiunu 1974, kua akaipoipo aia ia Jeanette (Jenny). I muri poto ua ake, kua ikiia raua kia tavini ei nga painia takake. Mei te 1979 ki te 2003, kua tavini atu raua ei nga mitinari i Tuvaru, Amoa, e i Viti​—au pa enua i te Patipika Tonga. Ia raua i te airani, kua tauturu maata katoa te Taeake e te Tuaine Jackson i te angaanga no te urianga i te au puka Pipiria. Akamataanga i te 1992, kua tavini atu te Taeake ko Jackson i runga i te Kumiti Manga i Amoa, e mei te 1996, i runga i te Kumiti Manga i Viti. I roto ia Aperira 2003, kua riro mai raua ko Jenny ei tuanga no te pamiri Betela o Marike e kua akamata i te angaanga i roto i te Tipatimani no te Au Angaanga no te Urianga Reo. I muri poto ua ake, kua tukunaia te Taeake ko Jackson ei tauturu ki te Kumiti Apii Anga no te Pupu Akaaere.

Kua akamata te Taeake ko Morris i te angaanga painia i te 1971 i Marike. I roto ia Titema i taua mataiti ra, kua akaipoipo aia ia Susan, e kua painia ua atu rai raua e vaitata rai e a mataiti e anau mai ei ta raua tamaiti mua, ko Jesse. Aere rai, kua anau akaou mai ta raua e tamaroa, ko Paul. Kua akamata akaou te Taeake ko Morris i te angaanga tavinianga tamou i te 1979 ei painia tamou. Kua piri mai tana vaine kiaia i te akamata anga te nga tamaroa i te apii. Kua tavini atu te pamiri i te ngai e umuumu maataia ra te tauturu i Rhode Airani e North Carolina, i Marike. I North Carolina, kua tavini atu te Taeake ko Morris ei akaaere kotinga komono, e kua akono te nga tamaroa i te angaanga painia tamou. Kua patiia atu a Jesse raua ko Paul kia aere atu ki te manga i Marike i to raua 19 mataiti anga. I taua taime ra, kua akamata te Taeake ko Morris i te angaanga kotinga. I reira, i te 2002 kua patiia atu raua ko Susan kia aere atu ki Betela, akamataanga i ta raua tukuanga angaanga ou ia Aukute 1. Kua angaanga te Taeake ko Morris i roto i te Tipatimani Tavini Anga i Patterson e muri akera ei tauturu ki te Kumiti Tavini Anga no te Pupu Akaaere.

I te pae mai i teia nga mema ou, te aronga i roto i te Pupu Akaaere ko C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; e D. Sydlik. Pouroa te au mema no te Pupu Akaaere e au Kerititiano akatainuia.