Afini zo so aga na yâ ti Wabatango Bungbi

NA MERCREDI, lango 24 ti août ngu 2005, na ndapre, aita ti Béthel ti Amerika nga na ala ti Canada so abâ ye ni na televizion amä mbeni pendere tokua. A to nda ni ande na lango 1 ti septembre ngu 2005, afini zo use ayeke ga na ndo ti aita ti Wabatango Bungbi ti aTémoin ti Jéhovah. A yeke Ita Geoffrey Jackson na Ita Anthony Morris.

Ita Jackson ato nda ti kusala ti pionnier na nze ti février ti ngu 1971 na gbata ti Tasmanie, so ayeke mbeni zoa na kodoro ti Australie. Na nze ti juin ti ngu 1974, lo sara mariage na Jeanette (so a iri lo Jenny). Kete na pekoni, a iri ala ti sara kua tongana apionnier spécial. Ti londo na ngu 1979 ti si na 2003, ala sara kua ti missionnaire na Tuvalu, Samoa nga na Fidji, so ayeke azoa na Pacifique ti Mbongo. Na ngoi so ala yeke lani na ndo ti azoa so, Ita Jackson na wali ti lo asara kua ngangu na yâ kiringo peko ti ambeti ti e na ayanga ti kodoro ni kâ. A to nda ni na ngu 1992, Ita Jackson asara kusala na yâ ti Komite ti filiale ti Samoa; nga, ti londo na ngu 1996, lo yeke na yâ ti Komite ti filiale ti Fidji. Na nze ti avril ti ngu 2003, lo na wali ti lo Jenny aga na Béthel ti Amerika na ala to nda ti sara kua na yâ ti Ndokua so abâ tënë ti kiringo peko ti ambeti ti e na ayanga nde. Kete na pekoni, a iri Ita Jackson ti mû maboko na yâ ti Komite ti Wabatango Bungbi so abâ tënë ti fango ye.

Ita Morris nga ato nda ti kusala ti pionnier na ngu 1971 na Amerika. Na nze ti décembre ti oko ngu ni so, lo sara mariage na Susan, na ala ngbâ ti sara kusala ti ala ti pionnier teti nduru na ngu osio tongaso, juska na ngoi so ala dü Jesse, kozo molenge ti ala ti koli. Na pekoni, ala dü mbeni molenge ni so iri ti lo ayeke Paul. Ita Morris akiri na kusala ti ngoi kue tongana pionnier permanent na ngu 1979. Wali ti lo akiri nga na kusala ni na ngoi so amolenge ni ato nda ti sara ekole. Sewa ni asara kusala na Rhode Island nga na Caroline ti Banga (Amerika), ando so lani bezoin ti awafango tënë ayeke dä mingi. Na Caroline ti Banga, Ita Morris asara kua tongana use surveillant ti circonscription, na amolenge ni amû kusala ti pionnier permanent. Tongana Jesse awara ngu 19, a iri lo na Béthel ti Amerika, na Paul nga kue a iri lo na ngoi so lo wara ngu 19. Na yâ ti ngoi ni so, Ita Morris ato nda ti kusala ti surveillant ti circonscription. Na ngu 2002, a iri lo na Susan na Béthel, na ala to nda ti sara kusala kâ na lango 1 ti août ti oko ngu ni so. Ita Morris asara kua na Ndokua so abâ tënë ti kusala na gbata ti Patterson nga na pekoni a iri lo ti mû maboko na yâ ti Komite ti Wabatango Bungbi so abâ tënë ti kusala.

Na ndo ti afini zo use so, iri ti tanga ti aita ti Wabatango Bungbi ayeke so: C. W. Barber; J. E. Barr; S. F. Herd; T. Jaracz; M. S. Lett; G. Lösch; G. H. Pierce; A. D. Schroeder; D. H. Splane na D. Sydlik. Aita ti Wabatango Bungbi kue ayeke aChrétien so a sa yingo na ndo ti ala.