Nyun memre fu a Tiri Skin

TAPU dridewroko 24 augustus 2005, den Bethelfamiri na ini Amerkankondre nanga Kanada, di ben e luku a mamanten programa nanga yepi fu telefisi, yere wan moi nyunsu. Bigin nanga 1 september 2005, a Tiri Skin fu Yehovah Kotoigi kisi tu nyun memre, namku Geoffrey W. Jackson nanga Anthony Morris III.

Brada Jackson bigin pionier na ini februari 1971 na ini Tasmania, wan èilanti di de ondro a tiri fu Australia. Na ini yuni 1974 a trow nanga Jeanette (Jenny). Syatu baka dati, den tron spesrutu pionier. Fu 1979 te go miti 2003, den dini leki zendeling na ini Tuvalu, Samoa, nanga Fidyi; disi na èilanti na ini a Stille Zuidzee. Di Brada nanga Sisa Jackson ben de na den èilanti, den ben du furu fu yepi vertaal Bijbel publikâsi. Na ini 1992, Brada Jackson tron wan memre fu a Bijkantoro Komte na ini Samoa, èn sensi 1996, a ben e dini leki memre fu a Bijkantoro Komte na ini Fidyi. Na ini april 2003, en nanga Jenny tron memre fu a Bethelfamiri na ini Amerkankondre, èn den bigin wroko na a kantoro di e yepi nanga vertaalwroko. Syatu baka dati, Brada Jackson tron wan fu den yepiman fu a Leri Komte fu a Tiri Skin.

Brada Morris bigin pionier na ini 1971 sosrefi. Na ini december fu a yari dati, a trow nanga Susan, èn den tan pionier sowan fo yari langa, teleki den kisi den fosi manpikin di nen Jesse. Bakaten den kisi wan tra manpikin, Paul. Brada Morris bigin nanga a furuten diniwroko baka na ini 1979, leki gewoon pionier. A wefi fu en go pionier makandra nanga en di den boi bigin go na skoro. Na osofamiri go dini na Rhode Island nanga North Carolina, na ini Amerkankondre, pe moro preikiman ben de fanowdu. Na ini North Carolina, Brada Morris ben e teki presi gi a kring-opziener ten na ten, èn den boi fu en ben go na ini a gewoon pionierwroko. Di Jesse nanga Paul ben abi 19 yari, den kisi a kari fu dini na a bijkantoro fu Amerkankondre. Na a srefi ten, Brada Morris bigin dini leki kring-opziener. Na ini 2002, en nanga Susan kisi a kari fu go dini na Bethel, èn tapu 1 augustus den bigin nanga a nyun wroko fu den na Bethel. Brada Morris ben wroko na a Dienst Afdeling na Patterson, èn bakaten a tron wan fu den yepiman fu a Dienst Komte fu a Tiri Skin.

Boiti den tu nyun memre disi, a Tiri Skin abi leki memre C. W. Barber, J. E. Barr, S. F. Herd, M. S. Lett, G. Lösch, T. Jaracz, G. H. Pierce, A. D. Schroeder, D. H. Splane, nanga D. Sydlik. Ala den memre fu a Tiri Skin na salfu Kresten.