Swirho Leswintshwa Swa Huvo Leyi Fumaka

HI Ravunharhu nimixo, hi August 24, 2005, ndyangu wa Bethele wa le United States ni wa le Canada, yi twe xitiviso lexi tsakisaka. Ku sukela hi September 1, 2005—Geoffrey W. Jackson na Anthony Morris wa Vunharhu—va ta va swirho swa Huvo leyi Fumaka ya Timbhoni ta Yehovha.

Makwerhu Jackson u sungule ku phayona hi February 1971 le Tasmania, exihlaleni lexi nga etikweni ra Australia. Hi June 1974, u tekane na Jeanette (Jenny). Endzhakunyana ka kwalaho, va ve maphayona yo hlawuleka. Ku sukela hi 1979 ku ya eka 2003, va ve varhumiwa eTuvalu, Samoa ni le Fiji—swihlala leswi nga ePacific Dzonga. Loko va ha ri eswihlaleni swoleswo, va ka Jackson va pfunete swinene entirhweni wo hundzuluxela tibuku leti sekeriweke eBibeleni. Ku sukela hi 1992, Makwerhu Jackson u ve xirho xa Komiti ya Rhavi le Samoa, naswona ku sukela hi 1996, u ve xirho xa Komiti ya Rhavi le Fiji. Hi April 2003, yena na Jenny va ve swirho swa ndyangu wa Bethele ya le United States naswona va sungule ku tirha eka Ndzawulo ya Mintirho ya Vuhundzuluxeri. Endzhakunyana ka kwalaho, Makwerhu Jackson u komberiwe ku pfuneta eka Komiti yo Dyondzisa ya Huvo leyi Fumaka.

Makwerhu Morris u sungule ku phayona hi 1971 eUnited States. Hi December lembe rero, u tekane na Susan, naswona va hambete va phayona ku ringana malembe ya kwalomu ka mune ku kondza ku velekiwa Jesse, mativula ya vona ya mufana. Hi ku famba ka nkarhi, va kume n’wana un’wana wa mufana, la vuriwaka Paul. Hi 1979 Makwerhu Morris u tlhele a va phayona ra nkarhi hinkwawo. Nsati wa yena u n’wi joyinile loko vana lava se va nghena xikolo. Ndyangu lowu wu tirhe laha a ku ri ni xilaveko lexikulu le Xihlaleni xa Rhode ni le North Carolina, eUnited States. Le North Carolina, Makwerhu Morris u ve mulanguteri wa xifundzha la khomelaka, kasi vafana lava vona va ve maphayona ya nkarhi hinkwawo. Loko va ri ni malembe ya 19, Jesse na Paul va vitaniwile va ya tirha erhavini ra le United States. Hi nkarhi lowu fanaka, Makwerhu Morris u sungule ntirho wo endzela mavandlha. Kutani hi 2002, yena na Susan va rhambiwile leswaku va ta tirha eBethele, va sungule xiavelo xa vona lexintshwa hi August 1. Makwerhu Morris u tirhe eNdzawulweni ya Ntirho le Patterson ivi endzhakunyana a pfuneta eka Komiti ya Ntirho ya Huvo leyi Fumaka.

Handle ka swirho leswimbirhi leswintshwa, swirho swin’wana swa Huvo leyi Fumaka i C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; na D. Sydlik. Swirho hinkwaswo swa Huvo leyi Fumaka i Vakreste lava totiweke.