Bag-o nga mga Membro han Nagmamando nga Lawas

HAN Mierkoles nga aga, Agosto 24, 2005, an pamilya han Bethel han Estados Unidos ngan Canada, nga iginkonektar ha Brooklyn pinaagi hin video, nakabati hin makalilipay hinduro nga pahibaro. Tikang ha Septyembre 1, 2005, duha nga bag-o nga membro—hira Geoffrey W. Jackson ngan Anthony Morris III—an idudugang ha Nagmamando nga Lawas han mga Saksi ni Jehova.

Nagtikang pagpayunir hi Bugto Jackson han Pebrero 1971 ha Tasmania, an isla nga estado han Australia. Han Hunyo 1974, ginkasal hira ni Jeanette (Jenny). Waray pag-iha katapos hito, igintoka hira ha pag-alagad sugad nga mga espesyal payunir. Tikang han 1979 tubtob han 2003, nag-alagad hira sugad nga mga misyonero ha Tuvalu, Samoa, ngan Fiji—mga nasud nga isla ha Sur Pasipiko. Samtang nakadto ha mga isla, daku gud liwat an ira naibulig ha paghubad hin mga literatura nga basado ha Biblia. Tikang han 1992, hi Bugto Jackson nag-alagad ha Komite han Sanga ha Samoa, ngan tikang han 1996, ha Komite han Sanga ha Fiji. Han Abril 2003, hira ni Jenny nagin bahin han pamilya han Bethel ha Estados Unidos ngan nagtikang magtrabaho ha Translation Services Department. Waray pag-iha katapos hito, hi Bugto Jackson nagin kabulig ha Teaching Committee han Nagmamando nga Lawas.

Hi Bugto Morris nagpayunir han 1971 ha Estados Unidos. Han Disyembre hito nga tuig, ginkasal hira ni Susan, ngan nagpadayon hira ha pagpayunir ha sulod hin haros upat ka tuig tubtob natawo an ira suhag nga lalaki, hi Jesse. Paglabay hin mga 20 ka bulan, nagkaanak pa hira, hi Paul. Han 1979, binalik hi Bugto Morris ha bug-os-panahon nga pag-alagad sugad nga regular payunir. Nagpayunir liwat an iya asawa han nangiskwela na an ira mga anak. Nag-alagad an pamilya ha lugar nga may-ada daku nga panginahanglan ha Rhode Island ngan ha North Carolina, ha Estados Unidos. Ha North Carolina, hi Bugto Morris nag-alagad sugad nga kasaliwan nga paramangno han sirkito, ngan nagregular payunir an ira mga anak. Han an kada tagsa kanda Jesse ngan Paul nag-19 anyos na, gintawag hira ha pagboluntaryo ha sanga nga opisina han Estados Unidos. Samtang hito nga panahon, hi Bugto Morris nagtikang ha sirkito nga buruhaton. Katapos, han 2002 hira ni Susan gintawag ha Bethel, ngan gintikangan nira an ira bag-o nga toka han Agosto 1. Nagtrabaho hi Bugto Morris ha Service Department ha Patterson ngan ha urhi sugad nga kabulig ha Service Committee han Nagmamando nga Lawas.

Dugang pa hinin duha nga bag-o nga membro, an Nagmamando nga Lawas ginkukompwesto nira C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; ngan D. Sydlik. An ngatanan nga membro han Nagmamando nga Lawas mga dinihogan nga Kristiano.