Amalungu Amatsha EQumrhu Elilawulayo

KUSASA ngoLwesithathu, ngoAgasti 24, 2005, intsapho yaseBheteli eUnited States naseKhanada, eziqhagamshelene ngevidiyo, zeva isaziso esichwayitisayo. Ukususela ngoSeptemba 1, 2005, kwakuza kongezelelwa amalungu amabini amatsha kwiQumrhu Elilawulayo LamaNgqina KaYehova—uGeoffrey W. Jackson noAnthony Morris III.

UMzalwan’ uJackson waqalisa ubuvulindlela ngoFebruwari 1971 eTasmania, esisiqithi saseOstreliya. NgoJuni 1974 watshata noJeanette (uJenny). Kamsinya emva koko, bamiselwa ukuba bakhonze njengoovulindlela abakhethekileyo. Ukususela ngowe-1979 ukusa kowama-2003 bakhonza njengabavangeli basemazweni eTuvalu, eSamoa naseFiji—iziqithi ezikuMzantsi wePasifiki. Ngoxa babekwezo ziqithi, uMzalwana noDade Jackson baba negalelo elikhulu emsebenzini wokuguqulela uncwadi lweBhayibhile. Ekuqaleni kowe-1992 uMzalwan’ uJackson wakhonza kwiKomiti Yesebe eSamoa, waza ukususela ngowe-1996 wakhonza kwiKomiti Yesebe eFiji. NgoAprili 2003 yena noJenny baba yinxalenye yentsapho yaseBheteli eUnited States, baza basebenza kwiSebe Lokuguqulela. Ngokukhawuleza emva koko, uMzalwan’ uJackson wabelwa ukuba ancedise kwiKomiti Yokufundisa yeQumrhu Elilawulayo.

UMzalwan’ uMorris wangenela inkonzo yobuvulindlela ngowe-1971 eUnited States. NgoDisemba waloo nyaka watshata noSusan, yaye baqhubeka nobuvulindlela phantse iminyaka emine de kwazalwa unyana wabo olizibulo, uJesse. Ekuhambeni kwexesha baba nomnye unyana, uPaul. UMzalwan’ uMorris wabuyela kwinkonzo yexesha elizeleyo ngowe-1979 waba nguvulindlela othe ngxi. Umfazi wakhe wamthelela xa oonyana babo baqalisa ukuhamba isikolo. Le ntsapho yakhonza apho kukho imfuneko enkulu khona kwiSiqithi iRhode nakuMntla Carolina, eUnited States. KuMntla Carolina uMzalwan’ uMorris wakhonza njengomveleli wesiphaluka obambelayo, yaye oonyana bakhe bangenela inkonzo yobuvulindlela obuthe ngxi. UJesse noPaul bamenyelwa ukuya kukhonza kwisebe laseUnited States ukugqiba nje kwabo iminyaka eli-19 ubudala. Ngelo xesha yena uMzalwan’ uMorris waba ngumveleli wesiphaluka. Kwathi ngowama-2002, yena noSusan bamenyelwa ukuya kukhonza eBheteli, ukususela ngoAgasti 1. UMzalwan’ uMorris ebesebenza kwiSebe Lenkonzo ePatterson waza kamva wancedisa kwiKomiti Yenkonzo yeQumrhu Elilawulayo.

Ukongezelela kula malungu mabini matsha, amanye amalungu eQumrhu Elilawulayo nguC. W. Barber; uJ. E. Barr; uS. F. Herd; uM. S. Lett; uG. Lösch; uT. Jaracz; uG. H. Pierce; uA. D. Schroeder; uD. H. Splane; noD. Sydlik. Onke amalungu eQumrhu Elilawulayo angamaKristu athanjisiweyo.