Sâm Bu 1-na Aṭanga Thu Pawimawh Hrilhfiahna
Jehova Thu Chu A Nung
Sâm Bu 1-na Aṭanga Thu Pawimawh Hrilhfiahna
MIN Siamtu, Pathian Jehova fakna deuh hlîra khat Bible bu atân hian eng hming nge maw inchawih ber ang le? Fakna Hlate, a nih loh leh Sâm tih bâka hming inchawih tûr hi a awm thei lo vang. He Bible bu sei berah hian Pathian mize ropui tak leh a thiltih ropui takte leh hrilh lâwkna tam tak telna hla phuah mawi tak tak a awm a. Hla zînga tam tak hian a ziaktute’n dinhmun hrehawm tak an tawh laia an rilru awm dân a hril a ni. Chu thu hrilte chuan kum sângkhat vêl—zâwlnei Mosia hun aṭanga Judate Babulon sal tânna ata an chhuah leh hnu lam thleng—a awh a ni. A ziaktute chu Mosia, Lal Davida, leh mi dangte an ni a. Puithiam Ezra chu a bu anga siam chhuaktu nia ngaih a ni.
Hmân lai aṭangin, Sâm bu hi hla bu nga, a nih loh leh ṭhen ngaa ṭhen hran a ni a, chûngte chu: (1) Sâm 1-41; (2) Sâm 42-72; (3) Sâm 73-89; (4) Sâm 90-106; leh (5) Sâm 107-150 te a ni. He thuziak hian hla thlankhâwm ṭhenkhatna chungchâng chu a sawi dâwn a. He mi bu 1-naa Fakna hla pathumte tih loh hi chu hmân lai Israel Lal Davida phuah nia ngaih a ni. Sâm 1-na, 10-na, leh 33-na phuahtute chu hriat an ni lo.
“KA PATHIAN, KA LUNGPUI NGHET TAK”
(Sâm 1:1–24:10)
Fakna hla pakhatnain Jehova dâna lâwmna nei mi a eng thâwl thu a sawi hnuah, a pahnihna chuan Lalram chungchâng a thlûr bing a ni. * He fakna hla bu 1-na hi Pathian ngenna lam pang deuh vek a ni a. Entîr nân, Sâm 3-5, 7, 12, leh 17-te chu hmêlma laka chhan chhuak tûra ngenna a ni. Sâm 8-na chuan Jehova ropuina nêna khaikhin chuan mihringte chu eng tham mah an nih lohzia a târ lang bawk.
Jehova chu a mite Vênghimtu anga sawiin: “Ka Pathian, ka lungpui nghet tak a ni a, amahah chuan rinna ka nghat ang,” tiin Davida chu a zai chhuak a ni. (Sâm 18:2) Sâm 19-naah chuan Jehova chu Siamtu leh Dân Petu ang, Sâm 20-naah chuan Chhandamtu ang, leh Sâm 21-naah chuan a hriak thih Lal Chhandamtu anga fak a ni a. Sâm 23-na chuan Berâm Vêngtu Ropui angin a sawi a, Sâm 24-na erawh chuan Lal ropui tak angin a sawi thung.
Bible Chungchânga Zawhnate Chhânna:
2:1, 2—Eng ang “thil sâwt lo” nge mi tinin an ngaihtuah? Heta “thil sâwt lo” tih hi mihring sawrkârin mahni thuneihna humhalh dân engtik lai pawha an ngaihtuahna hi a ni. An thiltum chu a hlawhchham ngei dâwn avângin hei hi thil sâwt lo a ni a. Hnam tin chuan “LALPA leh a hriak thiha . . . phiar” reng chungin hlawhtlin an inbeisei thei dâwn em ni?
2:7—Eng nge ‘LALPA thuruat’ chu? He thuruat hi Jehova’n a fapa duh tak Isua Krista nêna a siam Lalram atâna thuthlung chu a ni.—Luka 22:28, 29.
2:12—Eng kawngin nge hnam rorêltute chuan ‘fapa chu an fawh’ theih? Bible hun lai chuan, infawh chu inṭhianna leh rinawmna lantîrna a ni a. Chu chu mikhual lawm dân phung pawh a ni. Leia lalte chu fapa fâwp tûra thu pêk an ni a—chu chu, Messia Lal anga lo lâwm tûra thu pêk an ni tihna a ni.
3:a chunga thuziak—Fakna hla ṭhenkhat chunga thuziakte hi eng atân nge? A chunga thuziak chuan Sâm 3-naa mi ang hian, a châng chuan a ziaktu a kawhhmuh a, a nih loh leh chu fakna hla phuah a nihna dinhmun chu min hriattîr a. A chunga thuziak chuan chu hlain (Sâm 4 leh 5) a tum emaw, a hmanna emaw a hrilhfiah thei bawk a; tin, rimawi tum dân tûr kaihhruaina (Sâm 6) a pe thei bawk.
3:2—Eng nge “Selah” tih chu? He ṭawngkam hi a tlângpui thuin mahnia zai lai emaw, rimawi nêna zai lai emawa ngawi reng chunga ngun taka ngaihtuah nâna rei lo te chhûng han chawlh lawkna hun nia ngaih a ni. Chu chu fakna hlain a sawi zawh chiah thute leh rilru veizâwng uar nân tea hman a ni a. Mipui hmaa chhiar a nih hunah “Selah” tih chu chhiar chhuah kher a ngai lo.
11:3—Eng lungphûmte nge tihchhiata awm chu? Hêng lungphûmte hi mihringte innghahna—dân, thupêk, leh rorêlna te a ni a. Hêngte hi a fel loh chuan, khawtlângah buaina lo chhuakin, rorêlna dik a awm thei lo va. Chutiang dinhmunah chuan ‘mi felte’ chuan Pathian an rinchhan tak zet tûr a ni.—Sâm 11:4-7.
21:3—“Rangkachak thianghlim lallukhum” chuan eng nge a entîr? Lallukhum chu a tak tak nge ni a, Davida’n hnehna tam tak a chan avânga a ropuina belhchhahtu sawina tih chu sawi lan a ni lo. Amaherawhchu, he Bible châng hi Isua’n kum 1914-a Jehova hnên aṭanga a dâwn lalna lallukhum hrilh lâwkna a ni. Rangkachaka siam lallukhum hian Isua rorêlna chu rorêlna ṭha ber a ni tih a târ lang.
22:1, 2—Engvângin nge Davida chuan Jehova’n a kalsan ta nia a inhriat? Hmêlmate nêksâwrna nasa tak avângin Davida ‘thinlung chu khawihnûn, a rîl zînga tui zo ta ang a ni.’ (Sâm 22:14) A tân chuan Jehova’n a kalsan ta ang niin a lang mai thei. Khenbeh a nih khân, Isua pawhin hetiang tho hian a ngai a ni. (Matthaia 27:46) Davida thusawi chuan manganna tâwp khâwk a chhân lêt dân chu a târ lang a. Amaherawhchu, a ṭawngṭaina Sâm 22:16-21-a chhinchhiah aṭang chuan, Davida’n Pathian a rinna chu a hloh lo tih a lang fiah a ni.
Kan Zir Tûrte:
1:1. Jehova hmangaih lotute chu kawm loh tûr an ni.—1 Korinth 15:33.
1:2. Thlarau lam thilte ngaihtuah lovin ni khat pawh kan liamtîr tûr a ni lo.—Matthaia 4:4.
4:4. Kan thinrim laiin a hnua kan inchhîr lehna tûr thu sawi loh nân kan lei vên ṭhat, a nih leh leh ngawih ṭhiap mai chu a finthlâk a ni.—Ephesi 4:26.
4:5. Thlarau lama kan inpêknate chu rilru put hmang dik tak aṭanga lo chhuak leh kan nungchangin Jehova thil min phûtte a tlin hunah chauh “felna inthawinate” a ni thei a ni.
6:5. Hei aia dam chhan tûr ṭha zâwk a awm thei dâwn em ni?—Sâm 115:17.
9:12. Jehova chuan thisen chhuahtute chu an thiltih avânga hrem tûrin a zawng a; mahse, “mi retheite au thâwm chu” a hre reng a ni.
15:2, 3; 24:3-5. Betu dikte chuan thu dik sawiin, dâwt thu hmanga chhechham leh mite sawichhiat chu an pumpelh tûr a ni.
15:4. Pathian thu nêna inmil lo thutiam kan siam tih kan hre chhuak a nih ngawt si loh chuan, thu kan tiam tawh chu tih harsa pawh nise hlen tûrin theih tâwp kan chhuah tûr a ni.
15:5. Jehova betute kan nih angin, sum leh pai hman dik lohna lakah kan invêng fîmkhur tûr a ni.
17:14, 15. “Khawvêl mihringte” chu hausak nân leh chhûngkaw châwm nân an inhmang nasa a, an fate hnênah ro an hnutchhiah bawk a ni. Davida’n a nuna a ngaih pawimawh ber erawh chu Pathian ‘hmêl hmu,’ a nih loh leh Jehova duhsakna dawng tûr khawpa hming ṭha chher hi a ni. Jehova thutiamte hmu tûra a ‘men’ hunah, Davida chu ‘Pathian anna a neih avângin a lungawi tâwk,’ a nih loh leh Jehova’n a awmpui avângin a lâwm hle ang. Davida angin kan thinlung chu thlarau lam rohlu lamah chuan kan hawitîr tûr a ni dâwn lâwm ni?
19:1-6. Thil siam ṭawng thei lo leh ngaihtuahna nei lote mahin Jehova an chawimawi si chuan, keini ngaihtuah thei, ṭawng thei, leh chibai bûk thei te hian eng ang fakauva chawimawi nasa zâwk tûr nge kan nih le?—Thu Puan 4:11.
19:7-11. Jehova thil phûtte chu kan tân a va han ṭha tak êm!
19:12, 13. Thil tihsual leh tihsual luihna te chu kan pumpelh tûr sualte zînga mi a ni.
19:14. Kan thiltih chauh ni lovin, kan thu sawi leh ngaihtuahte pawh kan ngai pawimawh tûr a ni.
“RILRU ṬHA TAK KA PUTNAAH HIAN NANGIN MIN CHELH RENG A”
(Sâm 25:1–41:13)
He fakna hla hlâwm zînga a hmasa pahnihte hian Davida’n rilru ṭha put a duhzia leh a tum nasatzia a va han sawi lang chiang êm! “Nimahsela kei zawng rilru ṭha puin ka awm ang,” tiin a zai a. (Sâm 26:11) Sual ngaihdam dîla a ṭawngṭainaah: “Ka ngawih reng lai khân, nilênga ka rûm ṭhinna lamah ka ruhte hi a chang zo vek a ni,” tiin a sawi. (Sâm 32:3) Davida chuan Jehova mi rinawmte hnênah: “LALPA mit chuan mi felte lam a en ṭhîn a, a beng chuan an au hre tûrin a ngaithla reng ṭhîn,” tih a tiam a ni.—Sâm 34:15.
Sâm 37-a thurâwn pêk chu Israelte tâna a hlut ang bawkin, keini ‘ni hnuhnûnga’ awmte tân pawh a va han hlu tak êm! (2 Timothea 3:1-5) Isua Krista chungchâng hrilh lâwkin, Sâm 40:7, 8 chuan: “Ngai teh, ka lo kal e; lehkhabu zialah chuan ka thu ziak a ni a: Aw ka Pathian, i duhzâwng tih hi ka lâwmzâwng tak a ni; a ni, i dân thu chu ka thinlungah a awm reng e,” tiin a sawi. Sâm bu 1-na tâwp lam hi Davida’n Bath-sebi a chêtsualpui hnua hun hrehawm tak a hman laia Jehova ṭanpuina a dîlna a ni a. Ani chuan: “Kei zawng rilru ṭha tak ka putnaah hian nangin mi chelh reng a,” tiin a zai a ni.—Sâm 41:12.
Bible Chungchânga Zawhnate Chhânna:
26:6—Engtin nge Davida angin Jehova maichâm kan kal hual? Maichâm chuan Jehova’n mihringte tlan nâna Isua Krista tlanna inthawina pawm a duhna chu a entîr a. (Hebrai 8:5; 10:5-10) Chu inthawinaa rinna lantîrna hmang chuan maichâm chu kan kal hual a ni.
29:3-9—Mak tihna min neihtîrtu khawpui ri dur dur anga sawi Jehova aw hian eng nge a târ lan? Chu chu Jehova thiltihtheihna mak ropui tak târ lanna mai a ni.
31:23—Engtin nge mi chapo chu ‘nasa taka rulh’ a nih? Heta rulhna a sawi hi hremna a ni. Mi fel chuan a tum rêng vâng ni lova thil a tihsualin, Jehova hnên aṭangin rulhna, zilhna chu a dawng a. Mi chapo chu a kawng sual ata a hawi kîr loh avângin, nasa taka hremna hmanga nasa taka rulh a ni.—Thufingte 11:31; 1 Petera 4:18.
33:6—Eng nge Jehova kâa “thaw” chu? He thaw hi vân siam nâna Pathian thil hman, a thiltihtheihna che vêl reng, a nih loh leh thlarau thianghlim hi a ni. (Genesis 1:1, 2) Hei hi hmun hla aṭanga thil ti zo tûra tirh theih a nih avângin, kâa thaw thiltithei tak tia koh a ni.
35:19—Davida’n amah hawtute chu an mita inbiaktîr lo tûra a ngenna awmzia chu eng nge ni? Mita inbiakna chuan Davida hmêlmate’n amah an phiarna a hlawhtlin avânga nuam an tihna chu a kâwk a. Davida chuan he thil hi thleng lo tûrin a ngên a ni.
Kan Zir Tûrte:
26:4. Internet chat room-a mi vervêk, a nih loh leh an nihna thuptute; school emaw, hna thawhna hmun emawa thil sual tih duh vânga ṭhiana min siamtute; rinawm taka inlantîr kalpêngte; leh nun kawng chi hniha nungtute pumpelh chu a finthlâk a ni.
26:7, 12; 35:18; 40:9. Jehova chu Kristian kalkhâwmnaa mi dangte hriatah kan fak tûr a ni.
26:8; 27:4. Kristian inkhâwmnaa tel chu nuam kan ti em?
26:11. Davida chuan rilru ṭha put, a nih loh leh rinawm a tum thu a sawi hian amah tlan tûrin a dîl bawk a. Kan ṭha famkim lo chung pawhin rinawmna kan vawng thei a ni.
29:10. “Tuilêt,” a nih loh leh vân lam tuipui chunga lala ṭhutna hmangin, Jehova chuan a thiltihtheihna pumhlûm a kenkawhzia a târ lang a ni.
30:5. Jehova mize langsâr ber chu thinurna ni lovin, hmangaihna a ni.
32:9. Jehova chuan lakam thîr barh emaw, vuakna hruihrual emaw hmanga thunun an nih avânga thu awih sakawr emaw, sabengtung emaw ang ni tûrin min duh lo. Chu ai chuan, a duhzâwng kan hriat avânga a thuâwih thlang tûrin min duh a ni.
33:17-19. Mihring siam kalphung a enga mahin, eng anga thiltithei pawh ni se, chhandamna an pe thei lo. Kan rinna chu Jehova leh a Lalram ruahmannaah a innghat tûr a ni.
34::10. Hei hi an nuna Lalram zawng hmasatute tân thlamuanna a va ni tak êm!
39:1, 2. Mi suaksualin kan rinpuite tihnat tuma an chanchin min zawh hunah, ‘hmui phuarnaa kan kâ phuar a’ ngawih tlat mai chu a finthlâk a ni.
40:1, 2. Jehova nghah fan fanna chuan lungngaihna tuar thei tûr leh “boralna khuarkhurum ata, chirhdûp ban tak ata” chu chhuak thei tûrin min ṭanpui thei a ni.
40:5, 12. Malsâwmna kan dawnte hi “chhiar sên rual a ni lo” tih kan hriat reng chuan, chhiatna leh khawlohna kan neihte chu eng anga nasa pawh ni se, chûng chuan min hneh lo vang.
‘Jehova Chu Fakin Awm Rawh Se’
Fakna hla ṭhen khatnaa hla 41 te hi a va thlamuanthlâkin, mi a va han tichak tehrêng êm! Fiahna kan tâwk emaw, inthiam lohna kan nei reng emaw pawh ni se, he Pathian Thu thiltithei tak, Sâm bu 1-na aṭang hian chakna leh thlamuanna kan nei thei a ni. (Hebrai 4:12) Hêng fakna hlate hian nun dân kawnga kaihhruaina ṭha tak a pai a. Harsatna engpawh tuar mah ila, Jehova chuan min thlahthlam ngai lo vang tih tiam nawn kan ni.
Fakna hla bu 1-na chu: “LALPA, Israela Pathian chu, chatuan ata chatuan thlengin fakin awm rawh se. Amen, Amen,” tih thu hian a tâwp a. (Sâm 41:13) Fakna hla bu 1-na kan ngaihtuah hnu hian, Jehova fak tûra chêttîrin kan awm a ni lâwm ni? (w06 5/15)
[Footnote]
^ par. 3 Sâm 2-na hian Davida dam chhûngin thlen famkimna hmasa zâwk a nei.
[Phêk 3-naa Thlalâk Hawhtîrtu]
Arsite: Courtesy United States Naval Observatory
[Phêk 5-naa Thlalâk Hawhtîrtu]
Arsite, phêk 5 leh 6: Courtesy United States Naval Observatory