Ukucindama kwa “Cipe Canaka”

UMUTUMWA Petro alembele ukuti: “Mwe balume, ikaleni na [bakashi benu] umwabela ukwishiba, mulebacindika nge cipe icanaka, umwanakashi.” (1 Petro 3:7) Apo Amalembo yalanda ukuti umwanakashi “cipe canaka,” bushe cilepilibula ukuti abanakashi balisuulwa? Natumone ifyo kalemba uwapuutilwemo apilibwile ilyo alandile ifi.

Ishiwi lya ciGriki ilipilibulwa ukuti ‘ukucindika’ lipilibula “umutengo, . . . umucinshi.” E ico kanshi, abaume Abena Kristu balingile ukulatentemba abakashi babo, ukubasunga nge cipe canaka ica mutengo. Ici tacipilibula ukuti abalume balingile ukusuula abakashi. Ku ca kumwenako, tontonkanyeni pe lampi ilyo beta ukuti Tiffany lotus lamp. Ili lampi talyakosa, kuti lyatobeka ukwabula ukupoosa inshita. Bushe ukukanakosa kwa ili lampi kuti kwalenga lishitwe pa mutengo uunono? Awe na kalya! Mu 1997 ilampi bapangile kale sana ilya Tiffany lotus balishitile pa ndalama mupepi na 10 bilioni kwacha [K9,800,000,000]! Ukukanakosa kwe lampi takwalengele ukuti libe no mutengo uunono.

Cimo cine no kutila umwanakashi cipe canaka, tacilenga umucinshi akwata ukupwa. Ukwikala no mukashi “umwabela ukwishiba” cipilibula ukuti umulume alingile ukutontonkanya pa maka no kunakuka kwa mukashi wakwe. Kabili alingile ukwishiba ifyo umukashi atemwa ne fyo ashatemwa, ifyo atontonkanya ne fyo ayumfwa. Umulume uusakamana aleshiba ukuti umukashi wakwe alipusanako kuli wena mu mipangilwe. Alamulangulukilako ‘pa kuti amapepo [yakwe] yepelela.’ (1 Petro 3:7) Umulume uushicindika umukashi wakwe te kuti abe na bucibusa na Lesa. Twamona ukuti Icebo ca kwa Lesa tacasuula abanakashi. Lelo, cilabapeela umucinshi.

[Abatusuminishe Ukubomfya Icikope pe bula 32]

© Christie’s Images Limited 1997