“Nɔ ni He Waaa Tuutu” Lɛ He Sɛɛnamɔ

BƆFO Petro ŋma akɛ: “Nakai nɔŋŋ kɛ̃ nyɛ wumɛi, nyɛkɛ [nyɛŋamɛi] ahia shi yɛ nilee naa, ni nyɛkɛ woo awoa yoo akɛ nɔ ni he waaa tuutu ko.” (1 Petro 3:7) Ani Ŋmalɛ nɛɛ ní wieɔ yoo he akɛ “nɔ ni he waaa tuutu” lɛ baa yei ashi yɛ gbɛ ko nɔ? Nyɛhaa wɔpɛia nɔ̃ diɛŋtsɛ ni no mli lɛ mɔ ni Nyɔŋmɔ kɛ emumɔ tsirɛ lɛ ni eŋma nakai wiemɔ lɛ taoɔ etsɔɔ lɛ mli wɔkwɛa.

Hela wiemɔ ni atsɔɔ shishi akɛ “woo” lɛ tsɔɔ “bɔ ni nɔ ko jara wa ha, bɔ ni ehe yɔɔ sɛɛnamɔ ha, . . . kɛ bulɛ ni mli kwɔ ni ayɔɔ kɛha nɔ̃ lɛ.” Ni tsɔɔ akɛ, esa akɛ wu ni ji Kristofonyo lɛ kɛ eŋa aye yɛ mlijɔlɛ mli, ni ekɛ bulɛ fɛɛ ni sa eŋa lɛ aha lɛ ákɛ nɔ ko ni he waaa ni he yɔɔ sɛɛnamɔ jogbaŋŋ. Enɛ etsɔɔɔ yɛ gbɛ ko kwraa nɔ akɛ aaba mɔ shi. Ákɛ nɔkwɛmɔnɔ lɛ, susumɔ Tiffany glase kane ní aye samai awo he lɛ he okwɛ. Yɛ anɔkwale mli lɛ, abaanyɛ awie kane ni yɔɔ fɛo jogbaŋŋ nɛɛ he ákɛ nɔ ko ni jwaa waaa. Ani bɔ ni kane nɛɛ jwaa waaa lɛ haa ejara baa shi? Kɔkɔɔkɔ! Yɛ afi 1997 lɛ mli lɛ, atswa kane ni Tiffany diɛŋtsɛ fee lɛ eko ahunyade ahé dɔlai 2, 800,000! Bɔ ni afee lɛ ni ejwaa waaa lɛ ha ejara moŋ tee hiɛ, shi no haaa ejara agbee shi.

Nakai nɔŋŋ woo ni akɛhaa yoo ákɛ nɔ ko ni he waaa tuutu lɛ baaa lɛ shi yɛ gbɛ ko kwraa nɔ. Ní wu kɛ eŋa aaahi shi “yɛ nilee naa” lɛ tsɔɔ akɛ ebaasusu nibii tamɔ yoo lɛ hewalɛ kɛ egbɔjɔmɔ, nibii ni esumɔɔ kɛ nibii ni ehiɔ, bɔ ni esusuɔ nii ahe kɛ bɔ ni enuɔ nii ahe ehaa lɛ ahe. Wu ni sumɔɔ eŋa lɛ kpɛlɛɔ nɔ akɛ esoro bɔ ni amɛteŋ mɔ fɛɛ mɔ feɔ enii ehaa, ni emli fuuu yɛ srɔtofeemɔ nɛɛ he. Ejieɔ bulɛ ni sa kpo etsɔɔ eŋa lɛ “koni akatsĩmɔ [e]sɔlemɔi lɛ agbɛ.” (1 Petro 3:7) Wu fɛɛ wu ni ebuuu yei asui ni yɔɔ eŋa he lɛ fiteɔ wekukpãa ni kã lɛ diɛŋtsɛ kɛ Nyɔŋmɔ teŋ lɛ. Eyɛ faŋŋ akɛ, Nyɔŋmɔ Wiemɔ lɛ baaa yei ashi. Yɛ no najiaŋ lɛ, ehaa akɛ bulɛ kɛ woo haa amɛ.

[He ni Mfoniri ni yɔɔ baafa 32 lɛ Jɛ]

© Christie’s Images Limited 1997