Ang Kabilihanan sang “Isa ka Maluya nga Suludlan”

“KAMO nga mga bana, padayon kamo sa pagpuyo [kaupod sang inyo mga asawa] sa kaanggid nga paagi suno sa ihibalo,” sulat ni apostol Pedro, “nga nagahatag sa ila sing dungog subong sang isa ka mas maluya nga suludlan, ang isa nga may pangbabayi nga kinaiya.” (1 Pedro 3:7) Daw ginapakanubo bala sang Kasulatan ang mga babayi sang ginhinambitan sila subong “isa ka mas maluya nga suludlan”? Tan-awon naton kon ano gid ang luyag ipahangop sang inspirado nga manunulat.

Ang Griegong nombre nga “dungog” nagakahulugan sing “balor, bili, . . . pagtahod.” Gani, dapat pakig-angutan sang isa ka Cristianong bana ang iya asawa sing mahigugmaon kag pakitaan sia sing nagakaigo nga konsiderasyon kaangay sang isa ka halalungan, malahalon nga suludlan. Indi gid ini pagpakanubo sa mga babayi. Halimbawa, binagbinaga ang Tiffany lotus lamp (isa ka sahi sang suga). Ining tuman katahom nga suga halalungan gid. Manubo bala ang bili sini bangod madali ini mabuka? Indi gid! Sang 1997 ang orihinal nga Tiffany lotus lamp ginbaligya sa isa ka subastahan sing 2.8 milyones dolyares! Sa baylo nga naganubo ang bili, labi pa ini nga nagamahal bangod nga halalungan ang materyales nga gingamit sa paghimo sini.

Sing kaanggid, ang pagpadungog sa babayi subong isa ka mas maluya nga suludlan wala nagapakanubo ukon nagapakadiutay sa iya. Ang pagpuyo sang bana upod sa iya asawa “suno sa ihibalo” nagakahulugan nga ginabinagbinag niya kon ano ang masarangan kag di-masarangan sang iya asawa, luyag kag indi luyag, pagtamod kag balatyagon. Ginabaton kag ginatahod sang isa ka matinatapon nga bana ang kinatuhayan sing personalidad nila nga mag-asawa. Ginapakitaan niya sing nagakaigo nga konsiderasyon ang iya asawa “agod indi masablagan ang [iya] mga pangamuyo.” (1 Pedro 3:7) Ang bana nga wala nagapabalor sang maayo nga mga kinaiya sang iya asawa nagabutang sa katalagman sang iya kaangtanan sa Dios. Maathag gid nga ang Pulong sang Dios wala nagapakanubo sa mga babayi. Sa baylo, nagapabalor kag nagapadungog ini sa ila.

[Credit Line sang retrato sa pahina 32]

© Christie’s Images Limited 1997