Ol Woman Oli Sas Nating Se ‘Oli No Strong Olsem Man’

APOSOL Pita i raetem se: “Yufala ol man we i mared, yufala i mas tingbaotgud ol woman blong yufala long laef blong yufala long mared. Yufala i mas ona long ol woman blong yufala, from we oli no strong olsem yufala.” (1 Pita 3:7) ?Taem vas ya i talem se ol woman oli ‘no strong olsem man,’ tok ya i daonem ol woman? I gud yumi luk wanem we Pita i wantem minim taem hem i raetem tok ya.

Grik tok ya we oli tanem i kam “ona” i minim “praes, sas, . . . respek.” Taswe wan Kristin hasban i mas soem kaen fasin long waef blong hem, i mas tingbaot waef blong hem olsem wan plet we i save brok isi mo we i sas. Tok ya i no daonem wan waef nating. Wan eksampol, tingbaot samting we man ya Louis Tiffany i wokem. Hem i yusum glas we i tintin nomo blong wokem wan ples blong putum laet we hem i flasem wetem ol pija blong flaoa ya Lotus. Laet ya oli kolem Tiffany Lotus Lamp. ?Olsem wanem? ?Laet ya i no sas from we hem i save brok isi nomo? Nogat. !Long wan oksen long 1997, oli salem laet ya we Louis Tiffany i wokem blong 2.8 milian dola! Fasin blong wokem laet ya wetem glas we i tintin nomo, i no mekem we laet ya i nating, be hemia nao samting we i mekem se hem i sas we i sas.

Sem mak, taem Baebol i talem se woman i no strong olsem man, samting ya i no daonem hem mo i no minim se hem i olsem nating nomo. Taem ol hasban oli ‘tingbaotgud ol woman blong olgeta long laef blong olgeta long mared’, hemia i minim se hasban ya i tingbaot samting we waef i naf blong mekem mo samting we hem i no naf blong mekem, samting we hem i laekem mo samting we hem i no laekem. Hasban i tingbaot tu ol tingting mo filing blong waef blong hem. Wan hasban we i kea i luksave mo i tingbaot se fasin blong hem mo waef blong hem oli no sem mak. Hem i tingbaotgud waef blong hem “blong bambae i no gat samting we i save blokem ol prea blong [hem].” (1 Pita 3:7) Wan hasban we i no tingbaot ol nambawan fasin blong waef blong hem, hem i save lusum fasin fren blong hem wetem God. I klia we Baebol i no daonem ol woman. Defren olgeta, Baebol i soem respek mo ona long olgeta.

[Foto Credit Line blong pija long pej 32]

© Christie’s Images Limited 1997