“Bodi Bilong Ol Meri i No Strong Tumas”
“Bodi Bilong Ol Meri i No Strong Tumas”
APOSEL Pita i tok: “Yupela ol maritman, yupela i mas bihainim gutpela tingting na sindaun gut wantaim ol meri bilong yupela. Bodi bilong ol meri i no strong tumas, olsem na yupela i mas mekim gutpela pasin long ol.” (1 Pita 3:7) Olsem wanem? Taim Baibel i stori long “bodi bilong ol meri i no strong tumas,” dispela i daunim ol meri? Orait nau bai yumi skelim mining bilong dispela tok aposel Pol i raitim.
Long dispela ves, hap tok Grik ol i tanim olsem “gutpela pasin” i olsem “pe bilong samting, samting i dia tumas, . . . rispek.” Olsem na maritman Kristen i mas tingim gut na mekim gut long meri bilong em olsem samting i dia tumas, tasol i no strong tumas. Dispela i no daunim meri, nogat. Yumi ken tok piksa long wanpela kain lam ol i kolim Tiffany lotus. Ol i save wokim dispela lam long glas na em i naispela tru. Dispela lam i no strong tumas—em inap bruk hariap—tasol yu ting dispela samting i daunim pe bilong en? Nogat. Long 1997, namba wan Tiffany lotus lam em ol i bin wokim, ol i salim long 2.8 milion dola! Maski dispela lam i no strong tumas, dispela samting yet i bin apim pe bilong en, i no daunim pe bilong en, nogat.
Olsem tasol taim Baibel i tok bodi bilong meri i no strong tumas, dispela i no daunim meri. Man i “bihainim gutpela tingting na sindaun gut” wantaim meri bilong em, em i save tingim gut meri bilong em—em i mas save long tingting bilong meri na strong bilong em na ol samting em i no inap mekim, na ol laik bilong meri na ol samting em i no save laikim. Gutpela maritman i luksave olsem pasin na filings bilong meri bilong em i no wankain long pasin na filings bilong em, olsem na em i tingim gut meri bilong em. Em i save mekim gutpela pasin long meri bilong em bambai ‘i no gat wanpela samting i pasim ol prea’ bilong em. (1 Pita 3:7) Man husat i no save tingim na rispektim meri bilong em, dispela inap mekim na em i no inap pas gut wantaim God. Em nau, Tok Bilong God i no daunim ol meri, nogat, em i save givim biknem long ol meri.
[Piksa Kredit Lain long pes 32]
© Christie’s Images Limited 1997