Mushinga udi nawu ‘tshivuadi tshitambe butekete’

MUPOSTOLO Petelo wakafunda ne: ‘Nuenu balume muomumue, nuikale ne bakaji benu bu mudi lungenyi luimpe, [nubapeshe lumu bu mudi bivuadi bitambe butekete, NW],’ bivuadi bia buntu bukaji. (1 Petelo 3:7) Bible udi ufuanyikija muntu mukaji ne ‘tshivuadi tshitambe butekete.’ Ndimupuekesha milongo mu mushindu kampanda anyi? Tuanjayi kutangila lungenyi luvua nalu mufundi wa mukanda eu.

Muaku wa tshiena-Greke udibu bakudimuna ne: “lumu” udi umvuija “mushinga, . . . kunemeka.” Nanku, mulume muena Kristo udi ne bua kuenzela mukajende malu ne buimpe, umupesha lumu ludi lumukumbanyine bu tshivuadi tshia mushinga mukole nansha muditshi mua kutayika bipepele. Kuenza nunku kakuena kupuekesha muntu milongo to. Tuangatayi tshilejilu tshia muendu wa nzembu wa Tiffany wa lumuenu. Mmuendu mmuimpe wa dikema, kadi udi mua kutayika lukasa. Muendu eu udi mua kuikala ne mushinga mukese bualu udi mua kutayika bipepele anyi? Nansha kakese! Mu 1997, bakapana muendu uvua Tiffany mudienzele nkayende ku dolare 2 800 000! Nansha mudi muendu eu wa lumuenu, udi anu mushinga mukole.

Bia muomumue, kupesha mukaji lumu bu tshivuadi tshitambe butekete kakuena kukepesha mushinga wende to. Padi mulume usomba ne mukajende ‘bu mudi lungenyi luimpe’ anyi dimanya, bidi biumvuija ne: mulume udi utangila bukole buende bua mubidi ne malu adiye kayi mua kukokesha, malu adiye munange ne mukine, tshimuenekelu tshiende ne mudiye udiumvua. Mulume udi utabalela muena diende udi umunemeka ne mmumanye dishilangana dia bumuntu didi pankatshi pende ne pa mukajende. Udi umutua mushinga bua ‘masambila ende kaapangi njila.’ (1 Petelo 3:7; MMM) Mulume udi kayi utua mukajende mushinga, udi uteka malanda ende yeye muine ne Nzambi mu njiwu. Bushuwa, Dîyi dia Nzambi kadiena dipuekesha bantu bakaji milongo to. Kadi didi dibapesha butumbi ne lumu.

[Mêyi a dianyisha bua tshimfuanyi mu dibeji 32]

© Christie’s Images Limited 1997