Fel’ngin “e An Mmeewar”

KE YOLOY Peter ni apostal ni gaar, “Ma ku er rogomed e piin ni pumoon ni nguum pired e pi leengimed ma thingar um nanged ni yad mmeewar ko pumoon.” (1 Peter 3:7) Re thin nu Bible ney be yip’ fan e ppin ni “mmeewar” ere ngan dariyfannagrad? Ngad guyed ko mang e be weliy faen ni ke yoloy ere thin ney.

Thin ni Greek ni “liyor” e be yip’ fan “puluwon, nge fel’ngin, . . . nge tay fan.” Arfan, ni an figirngiy ni Kristiano e nge ayuweg leengin u fithik’ e sumunguy, ma nge dag ni be lemnag nib mmeewar, mab tolang puluwon. Gathi nguun darifannag. Baaray rogon, ngan lemnag fare magal ni Tiffany lotus. Re magal nem ni rib fel’ yaan, ni rayog ni ngam guy ko re page ney, e riyul’ nib mom nra pil. Ere fare magal nib mom nra pil e aram e daki ga’ fan? Danga’! Bin som’on e magal ni Tiffany lotus e kan pi’ nchuway’ ko 2.8 milyon dola ko duw ni 1997! Rogon ni kan ngongliy nib mom ni ra kireb e ke tolangnag puluwon, ma gathi ke sobut’nag.

Maku arrogon reb e ppin ni yima tay fan nib mmeewar ma gathi de ga’ fan ara ngan darifannag. Ngi i par rok leengin e ‘thingari nang ni mmeewar’ be yip’ fan ni an figirngiy e nga i lemnag gelngin fare pin nge gin ra mus riy, nge tin baadag nge tin dubun nge rogon laniyan’. Figirngiy e ma ayuweg ma ma tay fan e tin ni ba thil u thilin nge leengin. Ma dag ngak ni ri ma lemnag nbochan e ‘nge dabi magawon ban’en ko meybil ni be pi’ ngak Got.’ (1 Peter 3:7) Figirngiy ni de yog rok ni nge tay fan leengin e ra magawonnag e tha’ u thilrow Got. Ba tamilang, e Thin rok Got ndab un darifannag e ppin. Arfan, ni nguun tayfarad.